យោងតាមគេហទំព័រហ្វេសប៊ុកផេក របស់ស្នងការដ្ឋាននគរបាលរាជធានីភ្នំពញ កាលពីថ្ងៃទី១៩ ខែកក្កដា ឆ្នាំ២០១៩ សរសេរថា ស្នងការដ្ឋាននគរបាល រាជធានីភ្នំពញ សូមជូនដំណឹងដល់អ្នកបើកបរ និងព្រូរថយន្តធុនធំ ក៏ដូចជាម្ចាស់ក្រុមហ៊ុន និងសមាគមន៍ទាំងអស់ដែលពាក់ព័ន្ធ ឲ្យបានជ្រាបថា ចាប់ពីថ្ងៃចន្ទ ទី២២ ខែកក្កដា ឆ្នាំ២០១៩ តទៅ កម្លាំងនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ និងធ្វើការសហការជាមួយកម្លាំងតាមបណ្តាអធិការដ្ឋាននគរបាលខណ្ឌនានា ដើម្បីធ្វើការចុះត្រួតពិនិត្យសារធាតុញៀន និងជាតិស្រវឹង ចំពោះអ្នកបើកបរ និងព្រូរថយន្តធុនធំទាំងអស់។
ការចុះត្រួតពិនិត្យសារធាតុញៀន និងជាតិស្រវឹង ចំពោះអ្នកបើកបរ និងព្រូរថយន្តធុនធំទាំងអស់នេះ និងធ្វើនៅតាមគ្រប់ច្រកចេញចូលធំៗនៅក្នុងរាជធានីភ្នំពេញ។ ក្នុងករណីត្រួតពិនិត្យរកឃើញអ្នកបើកបរ ឬ ព្រូរថយន្តណា មានពាក់ព័ន្ធនិងសារធាតុញៀន ឬ ជាតិស្រវឹង សមត្ថកិច្ចនឹងធ្វើការឃាត់រថយន្តទុកនោះ ហើយបញ្ជូនអ្នកបើកបរ និងព្រូ ទៅអនុវត្តតាមនីតិវិធីច្បាប់។
ទទួលបានសេចក្តីជូនដំណឹងនេះ សូមក្រុមហ៊ុន និងសមាគមន៍ដឹកជញ្ជូនទាំងអស់ ចូលរួមសហការជាមួយកម្លាំងមានសមត្ថកិច្ចដើម្បីកាត់បន្ថយគ្រោះថ្នាក់ចរាចរណ៍ឲ្យមានប្រសិទ្ធភាពខ្ពស់៕
