Tuesday, July 30, 2019

ចិនបើករថយន្តទំនើប LAMBORGHINI តម្លៃកប់ពពក បោះពួយយ៉ាងលឿន ទៅបុករថយន្ត ២គ្រឿងទៀត នៅបឹងកេងកង

ភ្នំពេញៈ បុរសជនជាតិចិនម្នាក់ បើករថយន្តស៊េរីទំនើប LAMBORGHINI យ៉ាងលឿនជ្រុលទៅបុករថយន្តស៊េរីទំនើប ២គ្រឿងទៀត បណ្ដាលឱ្យរងការខូចខាតយ៉ាងដំណំ តែសំណាងល្អ មិនបណ្ដាលឱ្យមានអ្នករងរបួសនោះទេ។

គ្រោះថ្នាក់ចរាចរណ៍មួយនេះ កើតឡើងនៅវេលាម៉ោង១០៖១៥នាទីយប់ថ្ងៃទី២៩ ខែកក្កដា ឆ្នាំ២០១៩ ស្ថិតនៅតាមបណ្ដោយផ្លូវព្រះនរោត្តម សង្កាត់បឹងកេងកងទី១ ខណ្ឌបឹងកេងកង។

សាក្សីដែលឃើញហេតុការណ៍ផ្ទាល់ បានប្រាប់ឱ្យដឹងថា មុនពេលកើតហេតុគេឃើញ រថយន្តស៊េរីទំនើបមួយគ្រឿងម៉ាក LAMBORGHINI ពណ៌ខៀវ ពាក់ស្លាកលេខភ្នំពេញ 2BX-6666 បើកបរដោយបុរសជនជាតិចិនម្នាក់ ក្នុងល្បឿនលឿន លុះមកដល់ចំណុចកើតហេតុបានជ្រុល ទៅបុករថយន្តស៊េរីទំនើប២គ្រឿងម៉ាក LEXUS RX350 ពណ៌សពាក់ស្លាកលេខ ព្រះសីហនុ 2B-7272 ត្រូវចំជំហៀងខាងស្ដាំ រួចក៏ជ្រុលបន្តទៅបុករថយន្តស៊េរីទំនើបមួយគ្រឿងទៀត ម៉ាក BMW 528I ពណ៌ទឹកប្រាក់ពាក់ស្លាកលេខភ្នំពេញ 2AM-1099 ចំពីមុខពេញមួយទំហឹងបណ្ដាលឱ្យរងការខូចខាតយ៉ាងដំណំ។

ភាមៗនោះគេឃើញបុរសជនជាតិចិនខាងលើ ដែលបើករថយន្តបង្កចុះពីរថយន្តដើរ មកមើលរួចដើរឡើងរថយន្តវិញ បើកគេចខ្លួនចេញ ពីកន្លែងកើតហេតុបាត់ស្រមោលតែម្ដង។ មិនបានប៉ុន្មានផងស្រាប់តែឃើញមានតំណាងខាងរថយន្តបង្កមកចរចាជាមួយភាគី រថយន្តស៊េរីទំនើបទាំង២ ដោយភាគីខាងរថយន្ត LAM BORGHINI ព្រមទទួលសងសំណង ដើម្បីបញ្ចប់រឿងនៅនឹងកន្លែងតែម្តង។

ក្រោយពេលកើតហេតុសមត្ថកិច្ចមូលដ្ឋាន បានចុះមកដល់ទីតាំងកើតហេតុរួចធ្វើការសម្របសម្រួលភាគីទាំង៣ ដោយខាងរថយន្តស៊េរីទំនើប LAMBORGHINI បានសងទៅឱ្យភាគីទាំង២ ដើម្បីបញ្ចប់រឿងនៅនឹងកន្លែងតែម្ដង៕

Feature Ads