√ ជនជាតិចិន៤នាក់ វាយបុរសម្នាក់ សង្ស័យអ្នកបកប្រែ រួចរុញចូលឡានដឹកចេញពីកន្លែងកើតហេតុបាត់ សមត្ថកិច្ចខេត្តព្រះសីហនុ ហាក់លាក់បាំងព័ត៌មាន

ព្រះសីហនុៈ ជនជាតិចិនមានគ្នា៤នាក់ មិនដឹងមូលហេតុអ្វីនោះទេ បានធ្វើសកម្មភាពវាយបុរសម្នាក់ ដែលគេសង្ស័យថា ជាអ្នកបកប្រែជនជាតិខ្មែរ បណ្ដាលឲ្យហើមមុខ ហើមមាត់ រួចញាត់ចូលរថយន្តដឹកចេញពីកន្លែងកើតហេតុបាត់ស្រមោល។

ករណីហិង្សាខាងលើនេះ បង្កឲ្យមានការភ្ញាក់ផ្អើលដល់ប្រជាពលរដ្ឋកាលពីវេលាម៉ោង៦៖៣០នាទីល្ងាចថ្ងៃទី២៣ ខែសីហា ឆ្នាំ២០១៩ ស្ថិតនៅផ្ទះសំណាក់មួយកន្លែង ក្រោយផ្សារលើ ស្ថិតក្នុងភូមិ២ សង្កាត់៤ ក្រុងព្រះសីហនុ ខេត្តព្រះសីហនុ។

យោងតាមប្រភពពីបងប្អូនប្រជាពលរដ្ឋជាអាជីវករលក់ដូរនៅក្បែរកន្លែងកើតហេតុ បានប្រាប់ដល់ភ្នាក់ងារ CAMPOST ឲ្យដឹងថា នាល្ងាចថ្ងៃទី២៣ ខែសីហា ឆ្នាំ២០១៩ ម៉ោងជិត៦ មានជនជាតិចិនមានគ្នា៤ នាក់ បានវាយធ្វើបាបបុរសម្នាក់ សង្ស័យជាអ្នកបកប្រែ ជនជាតិខ្មែរ បណ្ដាលឲ្យរងរបួសប៉ោងមុខប៉ោងមាត់ ហើយចងដៃនឹងក្រមា រួចរុញដាក់ចូលរថយន្តមួយគ្រឿងម៉ាកហាយឡែនឌ័រ មិនចាំស្លាកលេខ និងបើកចេញពីកន្លែងកើតហេតុបាត់ស្រមោល។

ជុំវិញហិង្សាបង្កឡើងដោយជនជាតិចិនខាងលើនេះ អ្នកយកព័ត៌មាន CAM POST ប្រចាំខេត្តព្រះសីហនុ បានទំនាក់ទំនងសាកសួរព័ត៌មានពីសមត្ថកិច្ចនគរបាលព្រហ្មទណ្ឌកម្រិតធ្ងន់ និងកម្រិតស្រាលក្រុងព្រះសីហនុដែរ តែលោកបានឆ្លើយយ៉ាងខ្លីថា មិនដឹង។

ប្រជាពលរដ្ឋនៅក្រុងព្រះសីហនុ បានរិះគន់សមត្ថកិច្ចថា ហាក់ដូចមានការបិទបាំងករណីហិង្សាខាងលើនេះ ព្រោះរឿងវាយតបគ្នាផ្អើលក្រុងព្រះសីហនុ បែរជាសមត្ថកិច្ចឆ្លើយថា អត់ដឹង។ ពលលរដ្ឋលើកឡើងទៀតថា បើបណ្ដែតបណ្ដោយឲ្យមានរឿងបែបនឹងកើតឡើងទៀតនោះ ពួកគាត់មានការព្រួយបារម្ភពីសុវត្ថិភាពណាស់ ព្រោះជនជាតិចិនតែងតែបង្កភាពអនាធិបតេយ្យ បាញ់បោះសេរី និងវាយបតគ្នាជាដើម គ្មានខ្លាចក្រែងសមត្ថកិច្ចបន្តិចសោះឡើយ៕