ភ្នំពេញៈ មនុស្សប្រុសស្រី៤នាក់ បានរងរបួស ក្នុងនោះមានស្ត្រីម្នាក់ពពោះសន្លប់ស្ដូក ត្រូវបានបងប្អូនប្រជាពលរដ្ឋជួយសង្គ្រោះយកចេញពីក្នុងរថយន្ត បន្ទាប់ពីជួបគ្រោះថ្នាក់ចរាចរណ៍ បង្កឡើងរថយន្តកាមរីមួយគ្រឿង បើកបោះពួយក្នុងល្បឿន មកដល់ផ្លូវកោង មិនប្រយ័ត្ន ស្រាប់តែបួងចង្កូតជ្រុលឡើងទៅបុកទ្វារ និងរបងផ្ទះលក់គ្រឿងសង្ហារឹមពេញទំហឹង រថយន្តមិនទាន់អស់ល្បឿន បានផ្លោងខ្ទាតទៅបោកផ្ទប់ជាមួយរបាំងថ្មពុះចែកទ្រូងផ្លូវទៀត បណ្ដាលឲ្យ របងផ្ទះ បាក់ ខ្ទាត រប៉ាត់រប៉ាយ ខូចខាតយ៉ាងដំណំ ចំណែករថយន្តបង្កខូចខាតខ្ទេចស្ទើរទាំងស្រុង។
គ្រោះថ្នាក់ចរាចរណ៍នេះ កើតមានឡើងនៅវេលាម៉ោង៣:១០នាទីទៀបភ្លឺ ឈានចូលថ្ងៃទី១៨ ខែតុលា ឆ្នាំ២០១៩នេះ នៅចំណុចផ្ទះ លក់គ្រឿង សង្ហារឹមយីហោ "បាយ័នលក់គ្រឿងសង្ហារឹម" នៅលើផ្លូវសុធារស ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
ប្រភពព័ត៌មានពីបងប្រុសជាអ្នករថយន្តតាក់ស៊ី ឃើញហេតុការណ៍ បានប្រាប់អោយដឹងថា មុនកើតហេតុ គាត់បើករថយន្តមក ចតលើចិញ្ចើមផ្លូវ រង់ចាំដឹកភ្ញៀវ មួយសន្ទុះក្រោយមក ស្រាប់តែមានរថយន្តមួយគ្រឿង ម៉ាកកាមរីហាយប្រ៊ីត (ពុំមានស្លាកលេខ ) បើកបរដោយយុវជនម្នាក់ និងមានមនុស្សប្រុសស្រី៣នាក់ទៀតជាអ្នករួមដំណើរជាមួយ បានបោះពួយក្នុងល្បឿនលឿន តាមបណ្ដោយផ្លូវសុធារស ក្នុងទិសដៅពីជើងមកត្បូង ខណៈមកដល់កន្លែងកើតហេតុខាងលើ ផ្លូវកោង រថយន្តមិនបានបន្ថយល្បឿន ស្រាប់តែបួងចង្កូតជ្រុលទៅបុកទ្វារផ្ទះលក់គ្រឿងសង្ហារឹមយីហោ "បាយ័នលក់គ្រឿងសង្ហារឹម" ពេញទំហឹងតែម្ដង បណ្ដាលឲ្យ បាក់ទ្វារ និងខូចខាតសម្ភារៈតុទូ គ្រឿងសង្ហារឹម អស់មួយចំនួនផងដែរ។
ប្រភពដដែលបន្តថា ពេលនោះ រថយន្តបង្កនៅមិនទាន់អស់ល្បឿន បានបន្តទៅបុកទម្លុះ របងថ្ម បណ្ដាលឲ្យ ប្រេះស្រាំ និងបាក់រប៉ាត់រប៉ាយពេញផ្លូវ ហើយរថយន្តក៏បានវិលខ្ទាតទៅបោកផ្ទប់ជាប់របាំងថ្មពុះចែកផ្លូវទៀត បណ្ដាលឲ្យរថយន្តរងការខូចខាតខ្ទេចស្ទើរទាំងស្រុង បើកទៅមុខលែងរួច និងហូរហៀរប្រេងម៉ាស៊ីនពេញផ្លូវ ចំណែកមនុស្សប្រុសស្រីចំនួន៤នាក់ រងរបួស (ក្នុងនោះស្ត្រីម្នាក់ មានផ្ទៃពោះ បានរងរបួសធ្ងន់ជាងគេ សន្លប់ស្ដូកស្ដឹងក្នុងរថយន្ត ) ត្រូវបានប្រជាពលរដ្ឋជួយយកចេញមកខាងក្រៅ ហើយជួយលាបប្រេងខ្យល់ និងប្រេងកូឡា ជាការសង្គ្រោះបឋមសិន ចំណែកអ្នករបួសប្រុសស្រី២នាក់ទៀត រង់ចាំហៅកង់បីឥណ្ឌា មកដឹកទៅលាងរបួសផងដែរ។
ហេតុការណ៍នេះបានបង្កឲ្យមានភ្ញាក់ផ្អើលយ៉ាងខ្លាំង រួមទាំងម្ចាស់ផ្ទះភ្ញាក់ពីដំណេក នាំគ្នាបើកចេញមកមើល ផ្អើលពេញកន្លែងកើតហេតុ ក្រោយមកគេឃើញយុវជនម្នាក់ ជាអ្នកបេីករថយន្តបង្ក ដែលរងរបួសបែកចិញ្ចើមខាងស្ដាំ បានបើកទ្វារចូលក្នុងរថយន្ត រកមើលរបស់ទ្រព្យមានតម្លៃរបស់ខ្លួន ហើយឃើញមានរថយន្តព្រូសមួយគ្រឿងទៀត ដែលជាមិត្តភក្កិបានបើកមកដល់ ហើយយុវជននោះក៏ចេញពីក្នុងរថយន្តបង្ក រត់ឡើងរថយន្តព្រូសនោះ បម្រុងបើកចេញពីកន្លែងកើតហេតុ តែត្រូវបានប្រជាពលរដ្ឋ និងម្ចាស់ផ្ទះនាំគ្នាឃាត់មិនអោយបើកចេញទៅណាឡើយ ហើយឃាត់ម្ចាស់រថយន្តបង្ក ចេញមកខាងក្រៅ ដើម្បីដោះស្រាយគ្នាសិន ទើបបង្កការភ្ញាក់ផ្អើលដល់សមត្ថកិច្ចខណ្ឌចំការមន សហការជាមួយកម្លាំងប៉ុស្តិ៍ ទន្លេបាសាក់ ចុះមកជួយអន្តរាគមន៍ នៅកន្លែងកើតហេតុ និងពិនិត្យមើល ទ្រព្យសម្បត្តិ មានតម្លៃរបស់ស្ត្រីរងគ្រោះ និងទាក់ទងហៅរថយន្តសង្គ្រោះមក ដឹកអ្នករបួសផងដែរ។
បន្តិចក្រោយមក គេឃើញរថយន្តគិលានសង្គ្រោះ របស់មន្ទីរសម្រាកព្យាបាល ហុងហាក់ បានមកដល់ ហើយបានពិនិត្យ និងលើកស្ត្រីពពោះឡើងរថយន្ត សង្គ្រោះ រួចបំពាក់ អុកស៊ីហ្សែន ស្រាប់តែអ្នករបួសប្រុសស្រី២នាក់ទៀត ដែលជិះកង់បីឥណ្ឌានោះ ក៏ឡើងរថយន្តសង្គ្រោះជាមួយគ្នាដែរ ទើបសមត្ថកិច្ចប្រគល់កាបូបរបស់ស្ត្រីពពោះទៅអោយយុវជនដែលរបួសស្រាលនោះរក្សាទុកវិញ ហើយរថយន្តសង្គ្រោះក៏ដឹកបញ្ជូនទៅសង្គ្រោះនៅឯមន្ទីរពេទ្យតែម្ដង ។
ក្រោយកើតហេតុ អ្នកបើករថយន្តបង្ក ត្រូវបានប្រជាពលរដ្ឋប្រគល់ឲ្យសមត្ថកិច្ចនាំខ្លួនទៅ ស្នាក់ការប៉ុស្តិ៍ទន្លេបាសាក់ ដើម្បីធ្វើការសាកសួរ ចំណែករថយន្តបង្ក ត្រូវបានសមត្ថកិច្ច មូលដ្ឋាន ប្រគល់អោយ សមត្ថកិច្ចជំនាញ ចុះមកវាស់វែង និងស្ទូចយកទៅរក្សាទុកបណ្ដោះអាសន្ន នៅការិយាល័យចរាចរណ៍ផ្លូវគោកនៃស្នងការដ្ឋាននគរបាល រាជធានីភ្នំពេញ ដើម្បីរង់ចាំធ្វើការដោះស្រាយគ្នាពេលក្រោយ៕