ភ្នំពេញ ៖ កាលពីវេលាម៉ោង៨ និង៣០នាទីយប់ ថ្ងៃទី១៧ ធ្នូ ឆ្នាំ២០១៩ បុរសអ្នករត់ម៉ូតូកង់បីឥណ្ឌាមួយគ្រឿង បានធ្វើដំណើរមកដល់ក្បែរវត្តភ្នំស្រាប់តែមានពស់ថ្លាន់ដ៏ធំមួយក្បាលមានប្រវែងជិត២ម៉ែត្របានលូនឡើងមកសម្ងំលើម៉ូតូកង់បីរបស់គាត់ បង្កឲ្យមានការភ្ញាក់ផ្អើលនៅតាមបណ្តោយផ្លូវលេខ៥១ នៅចំណុចក្បែរវត្តភ្នំស្ថិតនៅក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ ។
មុនពេលកើតហេតុគេបានឃើញបុរសម្នាក់ជាអ្នករត់ម៉ូតូកង់បីឥណ្ឌា ពណ៌ស ពាក់ស្លាកលេខភ្នំពេញ1GT0818 បើកបរក្នុងទិសដៅពីជើងទៅត្បូងដែលគាត់អះអាងថា ទើបចេញមកពីហូបបាយរួចក៏បើកមកដល់ក្បែរវត្តភ្នំ នៅកន្លែងលោកយាយដូនពេញ ស្រាប់តែមានពស់ថ្លាន់មួយក្បាលដ៏ធំបានលូនកាត់ផ្លូវ ។
ម្ចាស់កង់បីបន្ត ពេលឃើញបែបនេះ គាត់ឈប់ដើម្បីឲ្យពស់ថ្លាន់លូនទៅឱ្យផុតសិន មិនហ៊ានបើកកិនទេ តែបែរជាពស់ថ្លាន់នោះ បានលូនឡើងម៉ូតូកង់បីរបស់គាត់កំពុងឈប់ហើយលូនចូលក្នុងចង្កូតម៉ូតូសម្ងំស្ងៀមនៅទីនោះ ធ្វើឱ្យម្ចាស់ម៉ូតូកង់៣ភ័យលស់ព្រលឹង និងធ្វើឲ្យអ្នកធ្វើដំណើរតាមដងផ្លូវនាំគ្នាចោមរោមមើល ព្រមទាំងនាំគ្នាជួយទាញយកពស់ថ្លាន់នោះចេញ ។
ប៉ុន្តែពស់ថ្លាន់នោះអត់ព្រមចេញទាល់តែសោះរហូតដល់ជិតមួយម៉ោងទើបប្រជាពលរដ្ឋនៅទីនោះជួយយកចេញបាន យកទៅលែងនៅឯវត្តភ្នំ ។
អ្នកដែលធ្លាប់ជួបប្រទះករណីនេះបាននិយាយថា នេះជាករណីថ្មីមួយទៀតដែលពស់ថ្លាន់លូនចូលម៉ូតូកង់៣ ខណៈប៉ុន្មានខែមុននេះពស់ថ្លាន់១ក្បាលក៏ធ្លាប់បានលូនចូលក្នុងរថយន្ត CRV មួយគ្រឿងធ្វើឱ្យម្ចាស់រថយន្តព្រលឹងចុងសក់រហូតបើករថយន្តចូលសាលាសង្កាត់ចោមចៅ១ ដើម្បីរកអ្នកក្លាហានជួយចាប់យកពស់នោះចេញពីក្នុងរថយន្តរបស់ខ្លួនផងដែរ ៕
