ភ្នំពេញ៖ ចម្លាក់សត្វ«មករ» ដ៏ធំមួយ ត្រូវបានមន្ត្រីជំនាញ និងអាជ្ញាធរប្រទះឃើញនៅក្នុងភូមិទឹកលិច ឃុំបឹងមាលា ស្រុកស្វាយលើ ខេត្តសៀមមរាប ដែលមានទីតាំងខាងកើតទំនប់បុរាណមួយឈ្មោះថា ទំនប់ទឹកងូត ៣០ម៉ែត្រ កាលពីថ្ងៃទី១៩ មករា។ នេះបើតាមមន្ទីរបរិស្ថានខេត្តសៀមរាប។
បើតាមមន្ទីរបរិស្ថានខេត្តសៀមរាប រូបចម្លាក់សត្វ«មករ»ដែលមានទំហំធំ និងមានបណ្តោយ ២,១៤ម៉ែត្រ កម្ពស់០,៩៧ ម៉ែត្រ ទទឹង០,៧៩ ម៉ែត្រ គឺមិនធ្លាប់ឃើញនៅចម្លាក់លើផ្តែរ និងប្រាសាទព្រហ្មញ្ញសាសនានា ក្នុងប្រវត្តិសិល្បៈខ្មែរឡើយ។
«ជាលទ្ធផលក្រៅពីចម្លាក់មករនេះយើងបានរកឃើញបំណែកថ្មសរុបចំនួន១៣ដុំ»។នេះជាការបញ្ជាក់របស់មន្ទីរបរិស្ថានខេត្តសៀមរាប ដែលបានសហការជាមួយអង្គការមូលនិធិបុរាណវិទ្យានិងអភិវឌ្ឍន៍កម្មវិធីភ្នំគូលែន និងលោក រិទ្ធី ម្ចាស់FACEBOOK Rithy Angkor និងក្រុមការងារ ចុះទៅពិនិត្យរូបចម្លាក់សត្វមករនេះ។
សត្វមករនេះ ក៏មានពន្យល់នៅក្នុងវចនានុក្រមសម្ដេចព្រះសង្ឃរាជជួនណាតដែរ។ បើតាមវចនានុក្រមសម្ដេចសង្ឃនោះ ពាក្យ«មករ» ឬមៈក គឺមកពី សំ. បា. ( ន. ) (មករ ឬ មង្ករ) គឺជាឈ្មោះត្រីសមុទ្រមួយប្រភេទ ដែលមានខ្លួនធំ ក្បាលខ្លីក្រមុប ធ្មេញនឹងចង្កូមស្ញាញគួរស្បើម (មានតំណាលក្នុងរឿងរ៉ាវពីព្រេងនាយ); ខ្មែរហៅសំដៅ ត្រីថ្ករ ក៏មាន, ហើយមនុស្សជំនាន់មុន ភាគច្រើននិយាយថា «ឆ្លាមមករ» ៕
ផ្ដល់សិទ្ធិដោយ៖ KhmerNas
