ភ្នំពេញ ៖ សម្តេច ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ស្នើឱ្យមានការត្រួតពិនិត្យចំពោះព្រះសង្ឃ ដែលទេសនាបែបកំប្លុកកំប្លែង ថាតើត្រឹមត្រូវដែរឬទេ? សម្តេចស្នើបែបនេះ ក្នុងពិធីស្រោចស្រពព្រះសុគន្ធវារី ត្រូវប្រារព្ធធ្វើឡើងនៅវត្តមុនីសុវណ្ណ ហៅវត្តចំពុះក្អែក នាព្រឹកថ្ងៃទី ២៨ ខែកុម្ភៈ ឆ្នាំ ២០២០។
សម្តេចតេជោនាយករដ្ឋមន្រ្តី បានប្រតិកម្មទៅនឹងព្រះសង្ឃមួយអង្គ ទំនងជាព្រះសង្ឃខ្មែរសូរិន្ទ ដែលបានទេសនាពេលថ្មីៗនេះ បែបកំប្លុកកំប្លែង ដោយសម្តេចបានតាំងជាសំនួរថា តើការទេសនាបែបនេះ ត្រឹមត្រូវនឹងព្រះពុទ្ធសាសនាដែរឬយ៉ាងណា?
«តាសុច ទេសនាយ៉ាងនឹង ឥឡូវនឹងចាប់ផ្តើមទេសនាកំប្លុកកំប្លែង ខ្ញុំកូណាខ្ញុំចេះតែចង់សួរថា ព្រះតេជនតើត្រូវឬអត់? លោកសម្តែងធម៌ទេសនាក៏ច្រៀងចឹងទៅ ចាបយំល្វើយៗ ហើយព្រះសង្ឃខ្លះទេសនាបែបកំប្លែងចឹងទៅ ហើយពុទ្ធបរិស័ទ្ធចេះតែសើចចឹងទៅ ដល់ចឹងទៅដណ្តើមការងាររបស់ព្រំម៉ាញអស់ចឹងទៅ»។
សម្តេចស្នើដល់មន្រ្តីសង្ឃទូទាំងប្រទេស ពិសេសក្រសួងធម្មការត្រូវធ្វើការត្រួតពិនិត្យលើបញ្ហានេះ។
ព្រះសង្ឃដែលទេសនាបែបកំប្លែង អមជាមួយនឹងអត្ថន័យបទចម្រៀង ដោយបង្កប់ខ្លឹមសារអប់រំខ្លះផងនោះ គេស្គាល់ថា ព្រះនាមលោកតាសុច។
ទន្ទឹមនឹងនេះ សម្តេចមានប្រសាសន៍ថា ការរីកចម្រើននៃជីវភាពរបស់ប្រជាពលរដ្ឋ ទើបអាចកសាងបាននូវវិហារ និងសាសន៍ដទៃទៀត។ សម្តេចបន្ថែមថា ប្រសិនជីវភាពប្រជាពលរដ្ឋជួបការលំបាក ព្រះសង្ឃនឹងដាច់ចង្ហាន់ និងមិនអាចប្រមូលថវិកាដើម្បីយកទៅកសាងឬអភិវឌ្ឍនៅក្នុងទីវត្តអារាមបានឡើយ៕
ផ្ដល់សិទ្ធិដោយ៖ khmernas