សម្តេច ហ៊ុន សែន បានផ្ញើសារទៅមន្រ្តីថ្នាក់ក្រោមថា«យើងជាអ្នកបម្រើពលរដ្ឋ មិនមែនជាចៅហ្វាយពលរដ្ឋទេ ហើយមិនត្រូវពើងទ្រូងដាក់ប្រជាជនឡើយ»។ សម្តេច ថ្លែងបែបនេះ នៅក្នុងពិធីប្រគល់សញ្ញាបត្រ និងវិញ្ញាបនបត្រជូនសិស្សសាលាភូមិន្ទរដ្ឋបាល នៅវិទ្យាស្ថានជាតិអប់រំ រាជធានីភ្នំពេញ ព្រឹកថ្ងៃទី ២៥ ខែកុម្ភៈ ឆ្នាំ ២០២០។
សម្តេច មានប្រសាសន៍ដូច្នេះថា« មន្រ្តីត្រូវរត់រកការងារធ្វើ មិនមែនទុកឲ្យការងាររត់មករកយើងទេ មានអ្នកខ្លះពេលដែលយើងតែងតាំងទៅ ថាអត់មានការងារធ្វើ បានខ្ញុំភ្ញាក់ផ្អើលថាអត់មានការងារធ្វើចុះលោកឯងធ្វើអី? ម៉េចក៏មិនរត់ទៅរកការងារធ្វើ ចង់ឲ្យការងាររត់មករកយើងហេ៎?»។
សម្តេចគូសបញ្ជាក់ថា កន្លែងណាមានការលំបាក យើងត្រូវមានវត្តមាននៅទីនោះជាចាំបាច់ នេះជាភារកិច្ចដែលយើងត្រូវធ្វើមិនអាចមើលរំលងលើចំណុចនេះបានទេ។
«ខ្ញុំគ្រាន់តែបញ្ជាក់ដល់មន្រ្តីដែលទើបចាប់ផ្តើមដំបូងថា យើងជានរណា យើងជាខ្ញុំបម្រើរបស់ប្រជាជាន មិនមែនជាចៅហ្វាយរបស់ប្រជាជនទេ ហើយអស់លោកមន្រ្តីទាំងឡាយ កុំតាំងខ្លួនជាមន្រ្តីជើង ១០ ឲ្យសោះ ត្រូវធ្វើជាមន្រ្តីជើងពីរ បើសិនធ្វើមន្រ្តីជើង១០ អស់លោកគ្មានការងារធ្វើទេ អស់លោក លោកស្រី នឹងក្លាយទៅជាមន្រ្តីឯកោនិយម ដាក់ខ្លួនឲ្យនៅឯកោ»។
សម្តេចពន្យល់ថា មន្រ្តីជើង១០ គឺជើងយើងពីរ ជើងតុ៤ជើងកៅអី៤ទៀត បូកទៅ ១០។ សម្តេចចង់មានន័យថា មន្រ្តីប្រភេទនេះ មិនទៅណាទេ គឺនៅអង្គុយតែកន្លែង៕
ផ្ដល់សិទ្ធិដោយ៖ khmernas