លោក លី សូវ៉ាន់ មន្រ្តីនាំពាក្យក្រសួងសុខាភិបាលបានសរសេរនៅលើហ្វេសប៊ុកថា វីរុសកូរ៉ូណាថ្មីឬCovid-19 គឺឆ្លងតាមតំណក់ទឹកតូចៗ ដែលខ្ទាតចេញពីមាត់របស់អ្នកជំងឺ តាមរយៈការកណ្ដាស់ឬក្អក។ លោកបន្តថា តំណក់ទឹកមេរោគនេះ អាចខ្ទាតពីអ្នកជំងឺចម្លងទៅកាន់អ្នកផ្សេង គឺក្នុងរង្វង់៩០សង់ទីម៉ែត្រ។
លោកសរសេរថា៖«មេរោគកូរ៉ូណាវីរុសប្រភេទថ្មី ឆ្លងតាមរយ:តំណក់ទឹកតូចៗ ដែលខ្ទាតចេញមកក្រៅតាមរយ:ក្អកឬកណ្តាស់។ ត្រូវចងចាំថា តំណក់ទឹកតូចៗ អ្នកជំងឺដល់ទីណា មេរោគនឹងទៅដល់ទីនោះ»។
លោកបន្ថែមថា៖«អ្នកវិទ្យាសាស្រ្តរកឃើញថា ចំងាយខ្ទាតចេញពីមុខមនុស្សយើងចំងាយបាន៣ហ្វីត បើគិតពីរង្វាស់ម៉ែត្រគឺ៩០សង់ទីម៉ែត្រ។ ដូច្នេះបើយើងនៅឆ្ងាយពីអ្នកជំងឺលើសពី១ម៉ែត្រ យើងនឹងគេចផុតពីតំណក់ទឹកតូចៗទាំងនោះ»។
លោកបានបញ្ជាក់ទៀតថា ពេលអ្នកជំងឺក្អកឬកណ្តាស់ម្តងៗបណ្តាលឱ្យខ្ទាតទៅលើផ្ទៃផ្សេងៗដូចជាលើតុ លើជញ្ជាំងលើបង្កាន់ដៃ។ល។ និងដៃអ្នកជំងឺញីច្រមុះប្រលាក់សំបោរហើយបានទៅប៉ះដៃទ្វារប៉ះជញ្ជាំង ប៉ះបង្កាន់ដៃដែលការប៉ះផ្ទៃទាំងនេះ បណ្តាលឱ្យឆ្លងបាន ពេលអ្នកផ្សេងទៅប៉ះរបស់ទាំងនោះ រួចយកមកប៉ះមុខនិងច្រមុះ។
អ្នកវិទ្យាសាស្រ្តរកឃើញថាក្នុងមួយថ្ងៃមនុស្សម្នាក់ៗប៉ះមុខជាមធ្យម៦០ដង។ ហេតុដូច្នេះតម្រូវឱ្យអ្នកជំងឺត្រូវពាក់ម៉ាស់ដើម្បីកុំឱ្យខ្ទាតចេញមកក្រៅនិងទាំងអ្នកឈឺនិងអ្នកមិនឈឺ ត្រូវតែឧស្សាហ៍លាងដៃជាមួយសាប៊ូអាល់កុល ជេល ជាដើម៕
ផ្ដល់សិទ្ធិដោយ៖ khmernas