header ads

ថ្ងៃស្អែក​នេះ (12 កុម្ភ: 2020) EU នឹងធ្វើ​កា​រស​ម្រេ​ចិត្ត​ដ៏​ធំ​មួយ អំពី​កម្ពុជា។ គណ:កម្ម​​ការ​ពាណិជ្ជ​កម្មស​ហគ​មន៍​នឹងធ្វើ​ការសម្រេចចិត្ត​នៅ​ថ្ងៃទី 12 កុម្ភ: ថា​តើ​ត្រូវ​រក្សាទុក ឬក៏​ដក គោលនយោបាយ​អនុគ្រោះ​ពន្ធ (អ្វីៗគ្រប់យ៉ាង​លើកលែងតែ​អាវុធ-EBA) សម្រាប់​កម្ពុជា។

សម្រាប់​ខ្ញុំ ដែលជា​អ្នកតាមដាន​ស្ថានការណ៍​នយោបាយ​យ៉ាង​យកចិត្តទុកដាក់ និង​ដែល​ធ្លាប់​ត្រូវបាន​ផ្តល់ឱកាស​ឲ្យ​បាន​ជួប​ជជែក​ផ្ទាល់​ជាមួយ​ភាគី​ពាក់ព័ន្ធសំខាន់ៗទាំងអស់ ដើម្បី​ស្វែងរក​ដំណោះស្រាយ និង​ដើម្បី​ការពារ​ផលប្រយោជន៍​ពលរដ្ឋ​កម្ពុជា ខ្ញុំ​មាន​មូលដ្ឋាន និង​ព័ត៌មាន​គ្រប់គ្រាន់​ល្មម អាច​វិភាគ ឬ​ព្យាករណ៍​ដឹង​អំពី​គោលជំហរ និង​កា​រស​ម្រេ​ចិត្ត​របស់​សហគមន៍​អឺរ៉ុប (EU)។ ដូច្នេះ​ព័ត៌មាន ដែល​យើង​នឹង​ទទួលបាន​នៅ​ថ្ងៃស្អែក​នេះ ខ្ញុំ​នឹង​គ្មាន​ការភ្ញាក់ផ្អើល​អ្វី​ឡើយ។

មុននឹង​យើង​វិភាគ​ថា​តើ EU នឹង​សម្រេចចិត្ត​បែបណា យើង​អាច​ត្រឡប់ក្រោយ​បន្តិច ដើម្បី​មើល​អំពី​ការទាមទារ​ជា​ផ្លូវការ របស់​សហគមន៍​អឺរ៉ុប​តាមរយ:សេចក្តីថ្លែងការណ៍​នៃ​អ្នកនាំពាក្យ​របស់ EU (ថ្ងៃទី 11 វិច្ឆិកា 2019) ដែល​បានបង្ហាញ​អំពី​ការចង់បាន​របស់ EU ដូចតទៅ៖
1) បើក​ឲ្យ​មាន​លំហ​នយោបាយ​ទូលំទូលាយ
២) បង្កើត​លក្ខ​ខ័​ណ្ឌ​សមប្រកប ដើម្បី​ឲ្យ​មាន​បក្សប្រឆាំង ដែល​អាច​ជឿ​ទុកចិត្តបាន និង​ដែលមាន​លក្ខណ:ប្រជាធិបតេយ្យ
៣) ចាប់ផ្តើម​ដំណើរការ​ផ្សះផ្សារ​ជាតិ​តាមរយ:ការសន្ទនា​ដោយស្មោះ​ត្រង់​ជាមួយ​គ្រប់ភាគី (geniune and inclusive dialogue)។
៤) ជាពិសេស EU ក៏បាន​រំលេច​យ៉ាងច្បាស់​ថា EU រំពឹងថា លោក កឹម សុខា នឹង​ត្រូវបាន​ដោះលែង និង​ទទួលបាន​សិទ្ធិ​ធ្វើ​នយោបាយ​ពេញលេញ ហើយ​សមាជិក​បក្សប្រឆាំង​ទាំងអស់ ដែល​ត្រូវ​តុលាការ​ហាមឃាត់​មិន​ឲ្យ​ធ្វើ​នយោបាយ មាន​សិទ្ធិ​ធ្វើ​នយោបាយ​ឡើងវិញ រីឯ​សកម្មជន និង​អ្នកគាំទ្រ ដែល​ត្រូវបាន​ឃុំឃាំង នឹង​ត្រូវបាន​ដោះលែង។

ដោយ​ពិនិត្យមើល​ចំណុច​ទាំងអស់​ខាងលើនេះ រួច​ឆ្លុះបញ្ចាំង​ការ​វិវិត្ត​នៃ​ស្ថានការណ៍​នយោបាយ​ចាប់ពី ខែវិច្ឆិកា ២០១៩ រហូតមកដល់​ថ្ងៃ ១១ខែកុម្ភ: ២០២០ យើង​អាច​សន្និដ្ឋានបានថា ថ្វី​ត្បិត​មាន​ការវិវត្ត​វិជ្ជមាន​ខ្លះ ប៉ុន្តែ​មិនទាន់​ឆ្លើយតប​ទាំងស្រុង​ទៅនឹង​ក្តី​រំពឹង និង​ការទាមទារ​របស់ EU នៅឡើយ​ទេ។

ដូច្នេះ EU ដែលជា​ស្ថាប័ន​អន្តរជាតិ​តំណាង​ឲ្យ​ប្រទេស​ចំនួន 27 នៅ​ទ្វីបអឺរ៉ុប ពិត​ជាស​ម្រេ​ចិត្ត​ដើម្បី​រក្សា​គុណ​តម្លៃ និង​កេរ្តិ៍ឈ្មោះ​របស់​ស្ថាប័ន​ខ្លួន បើទោះបីជា​ខ្លួន​មិន​ចង់​ធ្វើ​ដូច្នេះ​ក៏ដោយ។ មិន​ចង់​ព្រោះថា ពលរដ្ឋ​ខ្មែរ​ជាច្រើន​លាន​នាក់​ជា​អ្នកខាតបង់​ផលប្រយោជន៍ និង​រង​ផលប៉ះពាល់​ពី​ការសម្រេចចិត្ត​នេះ។ ក៏ប៉ុន្តែ EU យល់ឃើញថា ខ្លួន​ក៏ត្រូវ​តែ​រក្សា​គុណ​តម្លៃ​របស់​ស្ថាប័ន ដែល​តំណាង​ឲ្យ​ពលរដ្ឋ​សហគមន៍​អឺរ៉ុប​ទាំង 27 ប្រទេស​ដែរ។ ហេតុនេះ ខ្ញុំ ព្យាករណ៍​ថា EU ប្រហែល​មិនអាច​បន្ត​ផ្តល់ EBA ឲ្យ​កម្ពុជា​ដូច​សព្វថ្ងៃនេះ​តទៅទៀត​ទេ។

ទោះជា​យ៉ាងនេះ​ក្តី អ្នកតស៊ូ​មតិ ដើម្បី​ការពារ​ផលប្រយោជន៍​កម្ពុជា នៅមាន​សង្ឃឹមថា EU នឹង​ពិចារណារ​ផ្លូវកណ្តាល​មួយ គឺ EU អាច​រក្សា​ចំណែក​ខ្លះ ឬ​ផ្នែក​ខ្លះ ទៅលើ​ផលិតផល និង​ទំនិញ ដែល​អាច​ប៉ះពាល់​ដល់​ជីវភាព​របស់​ពលរដ្ឋ​ខ្មែរ ឬ​អាច​និយាយបានថា អាច​នឹង​រក្សា​ភាគរយ​នៃ​ក​ម្ច​ប់​អនុគ្រោះ​ពន្ធ ឬ​ហៅ​ម្យ៉ាង​ទៀតថា ដក​ខ្លះ ទុក​ខ្លះ (Partial Withdrawal​)​។

ខ្ញុំ​ក៏​សង្ឃឹមថា EU នឹង​នៅតែ​ផ្តល់​ឧ​៌​កាស​ឲ្យ​កម្ពុជា​អាច​ទទួលបាន EBA មកវិញ​ទាំងមូល ក្រោយពេល ដែល​មានការ​វិត្ត​ន៍​វិជ្ជមាន​បន្ថែម ដែល​ឆ្លើយតប​ទៅ​និង​លក្ខខណ្ឌ ឬ​ក្តី​រំពឹង​របស់ EU ជុំវិញ​ស្ថានការណ៍​ប្រជាធិបតេយ្យ និង​សិទ្ធិមនុស្ស​នៅ​កម្ពុជា រួមទាំង​បរិយាកាស និង​លក្ខ​ខ​ណ្ឌ័​សមប្រកប សម្រាប់​ធានា​ឲ្យ​មាន ការបោះឆ្នោត ដោយ​សេរី និង​ត្រឹមត្រូវ នៅ​ឆ្នាំ ២០២២ និង ២០២៣ ខាងមុខ។

ចំំ​ណុ​ចមួយ​ដែល​សំខាន់​ដែរនោះ គឺថា​កម្ពុជា​បានទទួល​យល់ព្រម​ធ្វើជា​ម្ចាស់ផ្ទះ​នៃ​កិច្ចប្រជុំ អា​សុ​ី-អឺរ៉ុប ដែល​នឹង​ប្រព្រឹត្តិ​ទៅ​នៅ​ខែវិច្ឆិកា ឆ្នាំ ២០២០ នេះ ពោលគឺ​នៅសល់តែ ៩ ខែ​ទៀត​ប៉ុណ្ណោះ។ ដូច្នេះ​ការវិវត្ត​វិជ្ជមាន​គួរ​ត្រូវបាន​ព​ន្លឿ​ន ដើម្បី​ឲ្យ​កម្ពុជា​អាច​ទទួល​ស្វាគមន៍​ថ្នាក់ដឹកនាំ​មកពី​អឺរ៉ុប​ដោយ​មោទន:ភាព ឬ​ដោយ​ពេញមុខ​មាត់ ផង និង​ដើម្បី​ឲ្យ​ភ្ញៀវ​ដែលមាន​ឋាន:ខ្ពស់ មកពី​សហគមន៍​អឺរ៉ុប​មានការ​ពេញចិត្ត​មក​ចូលរួម​ប្រជុំ​ផងដែរ។

ខ្ញុំ​សូម​ឲ្យ​បងប្អូន​ជនរួមជាតិ​ខ្មែរ ត្រៀម​ចិត្ត និង​ត្រៀម​កាយ កុំ​តក់ស្លុត ហើយ​បន្តដំណើរ​ទៅមុខ​ជានិច្ច៕

ផ្ដល់សិទ្ធិដោយ៖Khmernas
លោកអ្នកអាចបញ្ចេញមតិនៅទីនេះ!

Feature Ads

Previous Post Next Post