អង្គការសុខភាពពិភពលោកបានលើកឡើងថា ខ្លួនបានគាំទ្រផ្នែកប្រតិបត្តិការនិងបច្ចេកទេស ទៅដល់ក្រសួងសុខាភិបាលកម្ពុជា ដើម្បីឆ្លើយតបទៅនឹងករណីរកឃើញលើកទី១ នៃវីរុសកូរ៉ូណាថ្មីឬហៅថាកូវិដ-១៩នៅក្នុងប្រទេសកម្ពុជា និងព្រឹត្តការណ៍កើតឡើងនៅលើកប៉ាល់Westerdamផងដែរ។
WHOបានបន្តថា បន្ទាប់ពីឆ្លងកាត់ករណីទាំងនេះ វាក៏ជារឿងសំខាន់ដែលកម្ពុជាត្រូវត្រៀមលក្ខណៈ សម្រាប់លទ្ធភាពនៃឆ្លងរាលដាលដ៏ច្រើននៃវីរុសកូរ៉ូណាថ្មី ដែលការត្រៀមនេះ គឺដើម្បីធានាអំពីការឆ្លើយតបឱ្យបានឆាប់រហ័សនិងទាន់ពេលវេលា។នេះបើតាមការចេញផ្សាយព័ត៌មានមួយរបស់អង្គការ(WHO) នៅថ្ងៃទី១៩កុម្ភៈនេះ ស្ដីពីការឆ្លើយតបទៅនឹងវីរុសឆ្លងកូវិដ-១៩(Covid-19) នៅក្នុងប្រទេសកម្ពុជា។
អង្គការពិភពលោកនេះបញ្ជាក់ថា«ដើម្បីត្រៀមសម្រាប់ការឆ្លងនៅក្នុងសហគមន៍ អង្គការWHOកំពុងធ្វើការងារជាមួយក្រសួងសុខាភិបាល និងដៃគូផ្សេងទៀត ដើម្បីធ្វើបច្ចុប្បន្នភាពដល់ប្រទេសកម្ពុជា នូវផែនការត្រៀមលក្ខណៈនិងការឆ្លើយតបថ្នាក់ជាតិ និងកំណត់ចំណុចខ្វះខាតសម្រាប់សកម្មភាពត្រៀមជាអាទិភាព»។
អង្គការសុខភាពពិភពលោកបានបន្ថែមថា វិធានការត្រៀមសម្រាប់ការឆ្លងនៅសហគមន៍ ដូចការគ្រប់គ្រងឧប្បត្តិហេតុ ការធ្វើផែនការ និងការសម្របសម្រួលពហុវិស័យ ការវាយតម្លៃតាមដាននិងវាយតម្លៃហានិភ័យ មន្ទីរពិសោធន៍ ការគ្រប់គ្រងគ្លីនិកនិងសេវាកម្មថែទាំសុខភាព ការការពារនិងការត្រួតពិនិត្យការឆ្លង វិធានការសុខភាពសាធារណៈមិនមែនឱសថ និងការទំនាក់ទំនងដែលប្រឈមនឹងហានិភ័យជាដើម៕
ផ្ដល់សិទ្ធិដោយ៖ Khmernas