header ads

ភ្នំពេញ៖ ពិភពលោកកំពុងមានការព្រួយបារម្ភអំពីជំងឺឆ្លងដ៏កាចសាហាវ គឺវីរុសកូរ៉ូណា ឬCOVID19 ដែលជំងឺនេះបានសម្លាប់មនុស្សជាច្រើននាក់រៀងរាល់ថ្ងៃ និងបានចម្លងពី​១ទៅ១ស្ទើរពេញពិភពលោក។

ប៉ុន្តែវីរុសកូរ៉ូណា ឬCOVID19នេះ មិនទាន់មានវត្តមានឆ្លងមកពលរដ្ឋកម្ពុជាណា​ម្នាក់​នៅ​ឡើយ ចាប់តាំងពីមានមួយករណីនៅខេត្តព្រះសីហុ នៅលើជនជាតិចិន។ មិនមាន​ឆ្លងវីរុសកូវីដ១៩ ក៏ពិតមែន ប៉ុន្តែកម្ពុជា កើតមានជំងឺមិនឆ្លង មិនធ្វើឲ្យភ័យខ្លាច នោះគឺ​បញ្ហាគ្រោះថ្នាក់ចរាចរណ៍។

តាមការប៉ាន់ស្មានរបស់មន្រ្តីជំនាញបានឲ្យដឹងថា គ្រោះថ្នាក់ចរាចរណ៍បានសម្លាប់​មនុ​ស្ស​ជាមធ្យមជាង ៥នាក់ជារៀងរាល់ថ្ងៃ និងបង្កឲ្យរបួសធ្ងន់ស្រាលជាប្រចាំផងដែរ។

គ្រោះថ្នាក់ចរាចរណ៍ គឺជាមូលហេតុនៃការស្លាប់នាំមុខគេនៅកម្ពុជា ដែលមិនត្រឹមតែ​បានបំផ្លាញអាយុជីរិតមនុស្ស ប៉ុន្តែវាបានបំផ្លាញទាំងសីលធម៌ជាតិ សេចក្តីថ្លៃថ្នូរ ទ្រព្យស​ម្បត្តិ និងកិច្ចខិតខំប្រឹងប្រែងក្នុងការអភិវឌ្ឍនានា។

ប្រមុខដឹកនាំក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍​ផ្លូវគោក គឺសម្តេច ស ខេង បានលើកឡើងនាពេលថ្មីៗនេះថា គ្រោះថ្នាក់ចរា​ចរណ៍​មានការកើនឡើងយ៉ាងគំហុក ពិសេសនៅឆ្នាំ ២០១៩។

កាលពីចុងខែកុម្ភៈ នៅក្នុងពិធីបិទសន្និបាតត្រួតពិនិត្យលទ្ធផលការងារឆ្នាំ២០១៩ និងលើក​ទិសដៅការងារ​ឆ្នាំ​ ២០២០ របស់ក្រសួងមហាផ្ទៃ សម្តេចនាយករដ្ឋមន្រ្តី ហ៊ុន សែន បាន​ជំរុញឱ្យមានការសិក្សា ដើម្បីដាក់ពិន័យឱ្យបានតឹងរឹងចំ​ពោះអ្នកមិនគោរព​ច្បាប់​ចរាចរណ៍ហើយសាងកំហុសចំនួន​បីដង ត្រូវដកហូតប័ណ្ណបើកបរ ឬឈប់ឲ្យកា​ន់ដៃចង្កូត ១ឆ្នាំឬ២ឆ្នាំ។

អគ្គស្នងការនគរបាលជាតិបានឲ្យដឹងថា គ្រោះថ្នាក់ចរាចរណ៍កើតឡើងដោយសារបើក​បរមិនគោរពច្បាប់ បើកហួសល្បឿនកំណត់ បើកបរក្នុងស្ថានភាពស្រវឹង និងវ៉ាជែង​មិនប្រុងប្រយ័ត្នជាដើម។

ក្នុងរយៈពេលពេញ ១ឆ្នាំ២០១៩ មានអ្នកស្លាប់ ដោយសារគ្រោះថ្នាក់ ចរាចរណ៍ចំនួន ១៩៨១នាក់ និងរងរបួសចំនួនជាង ៦ពាន់នាក់ ។ នេះបើយោងតាមរបាយការណ៍ ស្ដីពី គ្រោះថ្នាក់ចរាចរណ៍ ឆ្នាំ២០១៩ របស់គណៈកម្មាធិការជាតិ សុវត្ថិភាពចរាចរណ៍ផ្លូវ​គោក។ របាយការណ៍បានឲ្យដឹងទៀតថា ចំនួនមនុស្សស្លាប់ឆ្នាំ ២០១៩ កើនលើសពី​ឆ្នាំ២០១៨ ចំនួន២២០នាក់៕ អត្ថបទ៖ ពង្សាវតា

ផ្ដល់សិទ្ធិដោយ៖ khmernas
លោកអ្នកអាចបញ្ចេញមតិនៅទីនេះ!

Feature Ads

Previous Post Next Post