វេជ្ជបណ្ឌិតកំពូលម្នាក់របស់សហរដ្ឋអាមេរិក បានស្នើសុំឱ្យពលរដ្ឋបញ្ឈប់ការទិញម៉ាស់។
ឧត្តមសេនីយ៍វេជ្ជបណ្ឌិតអាមេរិកលោក Jerome Adams បានសរសេរនៅក្នុង Twitter កាលពីថ្ងៃសៅរ៍ថា៖«វា(ម៉ាស់)មិនមានប្រសិទ្ធភាពក្នុងការការពារមនុស្សទូទៅពីការឆ្លងមេរោគកូរ៉ូណាវីរុសទេ ប៉ុន្តែប្រសិនបើអ្នកផ្តល់សេវាថែទាំសុខភាព មិនអាចមានម៉ាស់ដើម្បីពាក់ការពារនៅពេលមើលថែអ្នកជំងឺនោះទេ វាធ្វើឱ្យពួកគេនិងសហគមន៍របស់យើងប្រឈមនឹងគ្រោះថ្នាក់»។
លោក Adams បានទទូចឱ្យពលរដ្ឋអាមេរិកត្រូវលាងដៃ និងស្នាក់នៅក្នុងផ្ទះនៅពេលឈឺ ដែលត្រូវអនុវត្តសកម្មភាពបង្ការទាំងនេះជារៀងរាល់ថ្ងៃ ទើបជាការការពារដ៏ល្អបំផុត។ លោកក៏បានជម្រុញឱ្យប្រជាជនចាក់ថ្នាំបង្ការជំងឺផ្តាសាយជាដើម។
ការឆ្លងរាលដាលនៃវីរុសCovid-19ទៅដល់សហរដ្ឋអាមេរិក បានធ្វើឱ្យប្រជាជនមួយចំនួនក្នុងប្រទេសនេះ បានចាប់ផ្តើមទិញម៉ាស់ ដែលពួកគេគិតថា គឺជាទម្រង់នៃការការពារ ថ្វីត្បិតមជ្ឈមណ្ឌលការពារនិងគ្រប់គ្រងជំងឺអាមេរិក និងអនុប្រធានាធិបតីលោក Mike Pence និយាយថា ការទិញម៉ាស់មិនចាំបាច់ក៏ដោយ។
លោក Adams បានព្រួយបារម្ភថា ប្រសិនបើម៉ាស់អស់ ដូច្នោះនឹងខ្វះម៉ាស់សម្រាប់ឱ្យក្រុមមន្រ្តីពេទ្យជំនាញប្រើ ដែលកំពុងស្ថិតក្នុងតំបន់ហានិភ័យខ្ពស់ក្នុងការចម្លងជំងឺCovid-19។
ដោយសារមានតម្រូវការម៉ាស់ច្រើនពេក បានធ្វើហាងជាច្រើននៅទូទាំងសហរដ្ឋអាមេរិក លែងមានម៉ាស់លក់ ហើយតាមអនឡាញ ក៏ពិបាករកទិញដែរ៕
ប្រភព៖CNN
ផ្ដល់សិទ្ធិដោយ៖ khmernas