ក្រសួងមហាផ្ទៃ ហាមឃាត់ពលករខ្មែរ ដែលទើបចូលមកកម្ពុជា ប្រមាណជាង ៨ម៉ឺននាក់ មិនឲ្យត្រឡប់ទៅក្រៅប្រទេសវិញ ដើម្បីចូលរួមទប់ស្កាត់ការរីករាលដាលនៃជំងឺកូវីដ-១៩ ដែលកំពុងរាតត្បាតនៅលើពិភពលោក។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ នៃគណៈកម្មាធិការជាតិប្រយុទ្ធប្រឆាំងការជួញដូរមនុស្សបានអំពាវនាវដល់ពលរដ្ឋខ្មែរដូច្នេះថា៖«ពលករខ្មែរចំណាកស្រុកដែលត្រឡប់មកស្រុកខ្មែរវិញនាពេលកន្លងទៅនេះ សូមមេត្តាកុំអាលវិលត្រឡប់ទៅរកប្រទេសគោលដៅវិញ ដោយសារប្រទេសគោលដៅបច្ចុប្បន្ននេះគឺមានអត្រាឆ្លងខ្ពស់ជាងយើង ប្រសិនបើវិលត្រឡប់ទៅពេលនេះ គឺជួបនឹងហានីភ័យខ្ពស់ណាស់ ហើយខាងប្រទេសគេវិញក៏រឹតបន្ដឹងដែរ អំពីការបិទព្រំដែនដែរ»។
លោកស្រី ជូ ប៊ុនអេង លើកឡើងបែបនេះ នៅក្នុងកិច្ចប្រជុំពិគ្រោះយោបល់ ដើម្បីពិនិត្យលទ្ធភាពក្នុងការឆ្លើយតបទៅនឹងតម្រូវការរយៈពេលខ្លី មធ្យម និងវែងរបស់ពលករចំណាកស្រុកក្នុងស្ថានភាពរីករាលដាលនៃជំងឺកូវីដ-១៩ នាថ្ងៃទី ២២ខែមេសាឆ្នាំ២០២០ នៅទីស្ដីការក្រសួងមហាផ្ទៃ។
លោកស្រីបន្តថា៖«បើសិនយើងរកឃើញថា មានពលករយើងណាម្នាក់មានកម្តៅ ខុសពីធម្មតា ពួកគាត់ស្ថិតនៅការតាមដានបន្ដអត់ទាន់បញ្ជូនគាត់ចេញមកទេ ហើយយើងនឹងស្នើសុំមន្ទីរពេទ្យបង្អែកព្រំដែនត្រូវពិនិត្យបន្ថែម»។ ពលករខ្មែរជាង៤០០នាក់ ដែលបានសង្ស័យថា មានអ្នកឆ្លងមេរោគកូវីដ-១៩ បានយកសំណាកទៅពិនិត្យ ប៉ុន្ដែលទ្ធផលពុំមានអ្នកឆ្លងឡើយ។
ជាមួយគ្នានេះ លោកស្រី លើកទឹកចិត្តដល់ប្រជាពលរដ្ឋទាំងអស់ត្រូវដាំដុះបន្លែបន្ថែមនៅតាមទីលំនៅដ្ឋានរៀងៗខ្លួន ដើម្បីរកប្រាក់ចំណូលក្នុងគ្រួសារបន្ថែម អំឡុងពេលកម្ពុជាកំពុងជួបបញ្ហានៃការរីករាលដាលជំងឺកូវីដ-១៩៕