បឹងតាមោក ក្នុងរាជធានីភ្នំពេញ ដែលនៅជិតពហុកីឡដ្ឋានជាតិមរតកតេជោ, ខេត្តព្រះសីហនុ ដែលមានបឹងទឹកសាប គឺបឹងកង្កែប និងខេត្តកែប គឺជាទីតាំងគោលដៅ ដើម្បីរៀបចំប្រភេទកីឡាលើទឹក ក្នុងព្រឹត្តិការណ៍ស៊ីហ្គេម ២០២៣ ដែលកម្ពុជាធ្វើជាម្ចាស់ផ្ទះ។ នេះគឺជាខ្លឹមសារ ក្នុងកិច្ចប្រជុំជាមួយសហព័ន្ធកីឡាជាតិ ដែលមានការចូលរួមពីលោក ថោង ខុន អនុប្រធានអចិន្ត្រៃយ៍គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (SEA Games) លើកទី៣២ ឆ្នាំ២០២៣ (CAMSOC) នៅគណៈកម្មាធិការជាតិអូឡាំពិកម្ពុជា (NOCC) ថ្ងៃទី ១៣ខែឧសភានេះ។
នៅក្នុងកិច្ចប្រជុំនោះ ក៏កំណត់ថា កីឡាលើទឹក ដែលកម្ពុជា ត្រូវដាក់ក្នុងព្រឹត្តិការណ៍កីឡាស៊ីហ្គេម ឆ្នាំ ២០២៣ រួមមានដូចជា ការប្រកួតកីឡាទូកកានូ ទូករ៉ូអ៊ីង ទូកប្រពៃណី ម៉ូតូទឹក ទូកក្តោង និងប្រភេទកីឡាទ្រីយ៉ាត្លុង។ ដូច្នេះ ប្រភេទកីឡាទាំងនេះ គឺត្រូវតែមានទីលានប្រកួត ដែលមានការរៀបចំហេដ្ឋារចនាសម្ព័ន្ធ តាមតម្រូវការស្តង់ដារបច្ចេកទេស។ នេះបើតាមការបញ្ជាក់ពីលោកវ៉ាត់ ចំរើន អគ្គលេខាធិការ CAMSOC ក្រោយកិច្ចប្រជុំនោះ។
តាមលោកវ៉ាត់ ចំរើន ក្រៅពីការកំណត់ប្រភេទកីឡា និងទីតាំងសម្រាប់ការប្រកួតកីឡាលើទឹកហើយ ក្នុងកិច្ចប្រជុំនោះ ក៏មានរបៀបវារៈទាក់ទងនឹងការពិនិត្យមើលទៅលើនិមិត្តសញ្ញា (Mascot) ខណៈស្លាកសញ្ញា (LOGO) នៅតែបន្តការកែសម្រួលបន្ថែមទៀត ដើម្បីពិនិត្យចុងក្រោយ អំពីការជ្រើសរើសបេក្ខភាព ដែលដាក់ប្រឡងស្នាដៃ៕
ផ្ដល់សិទ្ធិដោយ៖ khmernas