រដ្ឋបាលសហរដ្ឋអាមេរិករបស់លោកប្រធានាធិបតី ដូណាល់ ត្រាំ បានពិភាក្សាអំពីការ សាកល្បងអាវុធ នុយក្លេអ៊ែរឡើងវិញ ក្រោយពីបានអាក់ខានសាកល្បងតាំងពីឆ្នាំ១៩៩២ ដើម្បីជាការព្រមានដ៏មានសក្តានុពលមួយដល់ប្រទេសរុស្ស៊ីនិងចិន។
អ្នកវិភាគព្រួយបារម្ភថា ប្រសិនបើសហរដ្ឋអាមេរិកពិតជាសាកល្បងអាវុធនុយក្លេអ៊ែរឡើងវិញមែន នោះ នឹងត្រូវបានគេមើលឃើញថា គឺជាការចាប់ផ្តើមឆ្ពោះទៅរកការប្រណាំងប្រជែងអាវុធនុយក្លេអ៊ែរ នៅក្នុងពិភពលោក ដែលមិនធ្លាប់មានកាលពីពេលមុនមក។
សេចក្ដីរាយការណ៍ដែលបានដកស្រង់សំដីមន្ត្រីរដ្ឋបាលអាមេរិកជាន់ខ្ពស់ម្នាក់ និងអតីតមន្ត្រីពីររូប ដែល និយាយ ដោយ មិន បញ្ចេញ ឈ្មោះរបស់សហរដ្ឋអាមេរិកបានបញ្ជាក់ថា ការពិភាក្សាបានធ្វើឡើងនៅ ក្នុងកិច្ចប្រជុំមួយកាលពីថ្ងៃទី១៥ខែឧសភា។
កិច្ចប្រជុំនេះបានកើតឡើងបន្ទាប់ពីមន្ត្រីអាមេរិកមួយចំនួនបានរាយការណ៍ថា ប្រទេសរុស្ស៊ី និងចិនបានធ្វើការសាកល្បងអាវុធនុយក្លេអ៊ែរសមត្ថភាពទាបរបស់ខ្លួនប ប៉ុន្តែទីក្រុងមូស្គូនិងទីក្រុងប៉េកាំងបានបដិសេធការអះអាងនេះ ហើយសហរដ្ឋអាមេរិកមិនបានផ្តល់ភស្តុតាងអ្វីដែរ។
មន្ត្រីរដ្ឋបាលជាន់ខ្ពស់អាមេរិកបាននិយាយថា ការបង្ហាញពីសមត្ថភាពរបស់ក្រុងវ៉ាស៊ីនតោនដែលហៅថា ការធ្វើតេស្តលឿននឹងក្លាយជាវិធីសាស្ត្រចរចាដ៏មានប្រយោជន៏មួយ នៅពេលដែលសហរដ្ឋអាមេរិកស្វែងរកកិច្ចព្រមព្រៀងត្រីភាគី ជាមួយប្រទេសរុស្ស៊ីនិងប្រទេសចិន ស្តីពីអាវុធនុយក្លេអ៊ែរ។
កិច្ចប្រជុំមិនបានបញ្ចប់ដោយមានការព្រមព្រៀងណាមួយឡើយ ហើយក៏គ្មានប្រភពបញ្ជាក់ថា ពិភាក្សានៅតែបន្តទៀតឬទេ។
លោក Daryl Kimball នាយកប្រតិបត្តិសមាគមគ្រប់គ្រងអាវុធបានបញ្ជាក់ថា វានឹងជាការចាប់ផ្តើមការប្រកួតប្រជែងអាវុធនុយក្លេអ៊ែរដែលមិនធ្លាប់មានពីមុនមក ហើយលោកបានបន្ថែមទៀតថា វាក៏ទំនងជានឹងធ្វើឱ្យរំខានដល់ការចរចាជាមួយមេដឹកនាំកូរ៉េខាងជើង ដែលនឹងធ្វើឱ្យលោក គីម ជុងអ៊ុន ប្រហែលលែងមានអារម្មណ៍បង្ខំឱ្យបញ្ឈប់ការសាកល្បងនុយក្លេអ៊ែរ។
ម្យ៉ាងទៀត ដំណឹងដែលអាមេរិកពិភាក្សាអំពីបំណងធ្វើការសាកល្បងអាវុធនុយក្លេអ៊ែរជាថ្មីនេះ គឺកើតឡើងបន្ទាប់ពីលោក ត្រាំ បានប្រកាសអំពីគម្រោងដកខ្លួនចេញពីសន្ធិសញ្ញា Open Skies ជាមួយប្រទេសរុស្ស៊ី ដែលសិទ្ធិ សញ្ញា នេះត្រូវបានបង្កើតឡើង ដើម្បីលើកកម្ពស់ការទុកចិត្តចិត្តគ្នានិងតម្លាភាពផ្នែកយោធារវាងប្រទេសមហាអំណាចទាំងពីរ។
វាគឺជាកតិកាសញ្ញាគ្រប់គ្រងអាវុធទី៣ ដែលលោក ត្រាំ បានដកហូតចាប់តាំងពីចូលកាន់តំណែង ជាប្រធានាធិបតីអាមេរិក។
ប្រទេសរុស្ស៊ីបានបញ្ជាក់ថា ខ្លួននឹងគោរពតាមកិច្ចព្រមព្រៀងដែលមានអាយុ១៨ឆ្នាំនេះ ដែលជាកិច្ចព្រម ព្រៀងដើម្បីកាត់បន្ថយហានិភ័យនៃសង្គ្រាម ដោយអនុញ្ញាតឱ្យយោធានៃប្រទេសហត្ថលេខីនីមួយៗ ធ្វើការហោះហើរតាម ចំនួនជាក់លាក់លើប្រទេសសមាជិកមួយទៀតក្នុងមួយឆ្នាំៗ។
បណ្តាប្រទេសនៅអឺរ៉ុបក៏បានជំរុញឱ្យលោក ត្រាំ ពិចារណាឡើងវិញអំពីការដកខ្លួនចេញពីកិច្ចព្រមព្រៀងនេះ។
ប្រឈមមុខនឹងការបោះឆ្នោតឡើងវិញនៅខែវិច្ឆិកា លោក ត្រាំ ក៏បានធ្វើឱ្យមានវោហារសាស្ត្រកាន់តែខ្លាំងប្រឆាំងនឹងប្រទេសចិននៅក្នុងប៉ុន្មានសប្តាហ៍ថ្មីៗនេះ ដោយរិះគន់ម្តងហើយម្តងទៀត នូវការគ្រប់គ្រងរបស់ទីក្រុងប៉េកាំងអំពីការឆ្លងរាលដាលនៃវីរុសកូរ៉ូណាថ្មី ដែលមានប្រភពចេញពីប្រទេសថៃនិងកំពុងបំផ្លិចបំផ្លាញពិភពលោក។
លោក ត្រាំ ក៏បានគំរាមម្តងហើយម្តងទៀត ប៉ុន្តែមិនបានបញ្ជាក់ច្បាស់អំពីការសងសឹកប្រឆាំងនឹងចិនដែលជាគូប្រជែងសេដ្ឋកិច្ចអាមេរិកឡើយ។
ការគំរាមនេះ គឺកើតឡើងស្របពេលលោក ត្រាំ បានអំពាវនាវឱ្យមានការចូលរួមពីប្រទេសចិននៅក្នុងកិច្ចពិភាក្សាស្តីពីការគ្រប់គ្រងអាវុធថ្មី មួយជាមួយប្រទេសរុស្ស៊ី ដោយប្រាប់សមភាគីរុស្ស៊ីរបស់លោកប្រធានាធិបតី វ្ល៉ាឌីមៀរ ពូទីន ប្រទេសទាំង៣ចាំបាច់ត្រូវចៀសវាង«ការប្រណាំងអាវុធដែលមានតម្លៃថ្លៃ»៕
ផ្ដល់សិទ្ធិដោយ៖ khmernas