header ads

ភ្នំពេញ៖ សហភាពអឺរ៉ុប បានប្រកាសគាំទ្រការអភិវឌ្ឍវិស័យទេសចរណ៍នៅកម្ពុជា ក្រោយ​ពេល​​ចប់ជំងឺកូវីដ១៩ ពិសេសអភិវឌ្ឍអេកូទេសចរណ៍ និងធនធានមនុស្សក្នុងវិស័យ​ទេសចរណ៍​ ដោយសហភាពអឺរ៉ុបប្ដេជ្ញាចិត្តបង្កើនកិច្ចសហប្រតិបត្តិការឱ្យកាន់ខ្លាំងជា​មួយរាជរដ្ឋាភិបាល ក៏ដូចជាក្រសួងទេសចរណ៍កម្ពុជា។

ការប្តេជ្ញាបែបនេះ ក្នុងជំនួបពិភាក្សាការងាររវាងលោក ថោង ខុន រដ្ឋមន្រ្តីក្រសួង​ទេសចរណ៍​ ជាមួយលោកស្រី ខាមិន ម៉រីណូ (Carmen Moreno) ឯកអគ្គរដ្ឋទូតសហភាពអឺរ៉ុបប្រចាំកម្ពុជា នៅថ្ងៃទី២៨ ខែឧសភា នៅទីស្ដីការក្រសួងទេសចរណ៍។

ក្នុងឱកាសនោះ លោក ថោង ខុន បានលើកឡើងពីស្ថានភាពទេសចរណ៍នៅកម្ពុជា ​ដូច្នេះថា បច្ចុប្បន្ន វិស័យទេសចរណ៍កម្ពុជា កំពុងរងផលប៉ះពាល់យ៉ាងខ្លាំងដោយសារវិបត្តិជំងឺកូវីដ១៩ ធ្វើឱ្យប្រជាជនមួយចំនួនបាត់បង់ការងារក្នុងវិស័យនេះ។ លោកបានបន្ថែម​​ថា​ ក្នុង​រយៈពេល៣សប្ដាហ៍នៃខែឧសភានេះ មានភ្ញៀវទេសចរក្នុងស្រុកប្រមាណជិត ៤​ សែន​នាក់បានចេញដើរទស្សនាទូទាំងប្រទេស។

លោករដ្ឋមន្ត្រីក៏បានស្នើដល់សហភាពអឺរ៉ុបឲ្យជួយគាំទ្រ និងផ្ដល់កិច្ចសហប្រតិបត្តិការដ៏ចំាបាច់នេះ ពិសេសចែករំលែកបទពិសោធន៍លើការរៀបចំវិធានការដោះស្រាយ​បញ្ហា​ជំងឺ​កូវីដ​១៩​ និងការស្ដារវិស័យទេសចរណ៍ឡើងវិញតាមបែបផែនថ្មី New Normal life ​ក្នុង​ប្រទេស​កម្ពុជា ក៏ដូចជាក្នុងតំបន់អាស៊ានទាំងមូល ដើម្បីជំរុញឱ្យមានចលនាទេសចរ​អន្តរ​ជាតិ​មក​កម្ពុជាវិញ នៅក្រោយវិបត្តិជំងឺកូវីដ១៩។

ឆ្លើយតបនឹងការស្នើរបស់លោករដ្ឋមន្រ្តីនេះ លោកស្រី ខាមិន ម៉រីណូ បានទទួល​យក​​សំណើរ​ និង​បានប្ដេជ្ញាបន្តកិច្ចសហប្រតិបត្តិការឱ្យកាន់តែជិតស្និទ្ធជាមួយរាជរដ្ឋាភិបាល​កម្ពុជា ​ពិសេសកិច្ចសហប្រតិបត្តិការលើវិស័យទេសចរណ៍ជាមួយក្រសួងទេសចរណ៍។​លោក​ស្រី​ ក៏​បានកោតសរសើរពីការខិតខំរបស់កម្ពុជា ដែលបានអភិវឌ្ឍវិស័យទេសចរណ៍ប្រកបដោយចីរភាព និងមានទំនួលខុសត្រូវខ្ពស់៕

ផ្ដល់សិទ្ធិដោយ៖ khmernas

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post