តាកែវ ៖ បើយោងតាមការបញ្ជាក់ពី លោកវរសេនីយ៍ទោ យ៉ុង ប៊ុនយ៉ុន អធិការនគរបាលស្រុកអង្គរបូរីថ្មី បានឲ្យដឹងថា កាលពីរសៀលថ្ងៃទី២៩ ខែមិថុនា ឆ្នាំ២០២០ លោកបានបញ្ជាកម្លាំងពិសេស ចុះទៅធ្វើការបង្ក្រាបក្រុមអ្នកលេងល្បែងជល់មាន់នៅតាមទួលនានា យ៉ាងអនាធិបតេយ្យតាមបណ្ដឹងរបស់ពលរដ្ឋ។
លោកអធិការស្រុកអង្គរបូរី បានថ្លែងថា ក្រុមអ្នកលេងជល់ មាន់ហាក់ដូចជាមានការប្រុងប្រយ័ត្នខ្ពស់ ដោយកម្លាំងមិនទាន់និងទៅដល់គោលដៅផង ពួកគេបាននាំគ្នារត់បាតជើងសព្រាតគ្រប់ៗគ្នា គឺបានបន្សល់ទុកនៅតែសម្ភារៈមួយចំនួនតែប៉ុណ្ណោះ។
យ៉ាងណាក៏ដោយ លោកអធិការស្រុក ក៏សូមថ្លែងអំណរគុណ យ៉ាងជ្រាលជ្រៅ រាល់កិច្ចសហការបស់បងប្អូនពលរដ្ឋដែលបានជួយផ្ដល់ព័ត៏មានជូនក្រុមសមត្ថកិច្ច ហើយថា កម្លាំងសមត្ថកិច្ចរបស់លោកនៅតែបន្តចុះបង្ក្រាបទៀត បើសិនក្រុមអ្នកលេងជល់មាន់ទាំងនោះនៅតែបន្ត។
គួរបញ្ជាក់ថា ការចុះបង្ក្រាបល្បែងជល់មាន់ខាងលើស្ថិតនៅក្នុងភូមិរកា ឃុំបាស្រែ ស្រុកអង្គរបូរី ខេត្តតាកែវ ដោយចាប់យកសម្ភារៈវត្ថុតាងមួយចំនួន តែមិនមានការឃាត់ខ្លូនមនុស្សទេដោយសាពួកគាត់រត់ចែកផ្លូវគ្នាអស់៕