សេដ្ឋកិច្ច
អាម៉ាប៉ាប៉ាញ៉ូសបើទោះជាមានវិបត្តិជំងឺកូវីដ១៩យ៉ាងណាក៏ដោយ ក៏កម្ពុជា បាននាំចេញកសិផលសរុបប្រមាណ១,៩លានតោនទៅទៅកាន់ទីផ្សារអន្តរជាតិ។ នេះបើតាមការឲ្យដឹងរបស់លោកងិន ឆាយ អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ នៅក្នុងសន្និសីទសារព័ត៌មានស្តីពី សក្ដានុពលនាំចេញកសិផលកម្ពុជាទៅកាន់ទីផ្សារអន្តរជាតិកាលពីព្រឹកថ្ងៃទី ១៧ មិថុនា។
បើតាមមន្រ្តីជាន់ខ្ពស់ក្រសួងកសិកម្មរូបនេះ ចំនួននៃការនាំចេញនេះ គឺបានកើនឡើងប្រមាណ៧,៣៥% បើប្រៀបធៀបទៅនឹងរយៈពេលដូចគ្នាកាលពីឆ្នាំ២០១៩។
លោក ងិន ឆាយ បានគូសបញ្ជាក់ថា នៅក្នុងចំណោមកសិផលដែលនាំចេញជិត២លានតោននេះ គឺអង្ករបាននាំមុខគេ ដោយមានចំនួននាំចេញក្នុងរយៈពេល៥ខែឆ្នាំ២០២០ ជាង៣៥ម៉ឺនតោន បានកើនឡើងប្រមាណ៤២,៣៤%បើប្រៀបធៀបនឹងរយៈពេលដូចគ្នាកាលពីឆ្នាំ២០១៩កន្លងទៅ។ លោក ងិន ឆាយ បានឱ្យដឹងទៀតថា នៅក្នុងរយៈពេលនេះ ការនាំចេញអង្ករកម្ពុជាទៅកាន់ប្រទេសចិនមានចំនួនជាង១៣ម៉ឺនតោន បានកើនឡើង២៥,៦% ទៅកាន់សហភាពអឺរ៉ុប មានចំនួនជាង១២ម៉ឺនតោន គឺបានកើនឡើងដល់ទៅ៥៦%។
ចំណែកការនាំចេញទៅកាន់ទីផ្សារអាស៊ាន មានប្រមាណ ៤ម៉ឺន៥ពាន់តោន បានកើនឡើង៤៥,៣៩% ខណៈនាំចេញទៅប្រទេសផ្សេងទៀតមានឥណ្ឌាជាដើម គឺបានកើនឡើងប្រមាណ៧៩%។
មន្រ្តីជាន់ខ្ពស់ក្រសួងកសិកម្ម បានបញ្ជាក់ថា កម្ពុជា បាននាំចេញអង្ករទៅកាន់ប្រទេសចំនួន៦០នៅទូទាំងពិភពលោក។ ជាងនេះទៀត លោក ងិន ឆាយ បានព្យាករណ៍ថា នៅដំណាច់ឆ្នាំ២០២០នេះ កម្ពុជាអាចនាំចេញអង្ករកើនឡើងដល់ទៅ៨០ម៉ឺនតោនទៅ១លានតោន ខណៈកាលពីឆ្នាំ២០១៩ ការនាំចេញសម្រេចបានប្រមាណ៦២ម៉ឺនតោន ហើយការនាំចេញកសិផលកសិកម្មទាំងអស់អាចនឹងកើនដល់ជាង៥លានតោន៕
