ការសិក្សាមួយរបស់ក្រុមអ្នកស្រាវជ្រាវនៃសាកលវិទ្យាល័យHarvardបានអះអាងថា យោងតាមរូបភាពទទួលបានពីប្រព័ន្ធផ្ការណប ដែលបង្ហាញអំពីការធ្វើចរាចរណ៍កើន ឡើងខុសពីធម្មតានៅខាងក្រៅនៃមន្ទីរពេទ្យចំនួន៥ នៅក្នុងទីក្រុងវ៉ូហានប្រទេសចិន គឺអាចសន្និដ្ឋានថា វីរុសកូរ៉ូណាថ្មីឬកូវីដ១៩កើតឡើងនៅក្នុងទីក្រុងនេះតាំងពីខែសីហា គឺមុនពេលដែលអាជ្ញាធរប្រទេសចិនបានរាយការណ៍ថា វីរុសនេះបានផ្ទុះឡើងនៅក្នុងខែធ្នូឆ្នាំ២០១៩។
រូបភាពពីផ្ការណបបង្ហាញអំពីចរាចរណ៍ខុសធម្មតានៅខាងក្រៅមន្ទីរពេទ្យទាំងនោះ គឺជួនពេលគ្នានឹងការកើនឡើងនូវការស្វែងរកព័ត៌មាននៅតាមបណ្ដាញអនឡាញរបស់ប្រជាជនចិន រពាក់ព័ន្ធនឹងរោគសញ្ញាមួយចំនួនដែលដូចគ្នានឹងរោគសញ្ញា ក្អក និងរាគរូស។
ប៉ុន្តែប្រទេសចិនបានចាត់ទុកការសិក្សានេះ គឺជារឿងគួរឱ្យអស់សំណើចណាស់ ហើយជាការសិក្សាផ្អែកលើព័ត៌មានមិនពិត។
ក្រុមអ្នកស្រាវជ្រាវនៃសាកលវិទ្យា Harvard គឺបានពិនិត្យមើលទិន្នន័យផ្កាយរណបបង្ហាញពីសកម្មភាពនៅខាងក្រៅមន្ទីរពេទ្យចំនួនទាំង៥ក្នុងទីក្រុងវ៉ូហាន ដោយបានប្រៀបធៀបទិន្នន័យពីចុងរដូវក្តៅនិងរដូវស្លឹកឈើជ្រុះកាលឆ្នាំ២០១៨ ទៅនឹងរយៈពេលដូចគ្នាក្នុងឆ្នាំ ២០១៩។
ក្រុមអ្នកស្រាវជ្រាវបានរាប់ចំនួនរថយន្តមានទាំងអស់១៧១គ្រឿង ដែលចតនៅក្នុងមន្ទីរពេទ្យធំមួយគឺមន្ទីរពេទ្យTianyouស្ថិតក្នុងទីក្រុងវ៉ូហានកាលពីខែតុលាឆ្នាំ២០១៨ ហើយទិន្នន័យផ្កាយរណនៅពេលតែមួយដូចគ្នាក្នុងឆ្នាំ ២០១៩ បានបង្ហាញថា មានយានចំនួន២៨៥គ្រឿងនៅកន្លែងចងតែមួយ ដែលចំនួនរថយន្តនោះបានកើនឡើង៦៧%។
ជាមួយគ្នានោះ ការកើនឡើងនៃការស្វែងរកតាមអ៊ីនធឺរណែតសម្រាប់ពាក្យមួយចំនួន ដែលទាក់ទងនឹងរោគសញ្ញារបស់វីរុសកូរ៉ូណា ក៏ហាក់បានលេចឡើងក្នុងពេលតែមួយដែរ។
លោក John Brownstein ដែលដឹកនាំការសិក្សានេះបាននិយាយថា៖«ការសិក្សាជាច្រើន គឺត្រូវការធ្វើឡើងបន្ថែមទៀត ដើម្បីបង្ហាញឱ្យបានពេញលេញនូវអ្វីដែលបានកើតឡើង ហើយសម្រាប់ឱ្យមនុស្សដឹងឱ្យបានពិតប្រាកដ ពីរបៀបដែលជំងឺទាំងនេះបានលេចឡើង និងលេចឡើងនៅក្នុងចំណោមប្រជាជន។ ដូច្នេះ នេះគឺគ្រាន់តែជាចំណុចមួយផ្សែងទៀតនៃភស្តុតាង»៕
ផ្ដល់សិទ្ធិដោយ៖ khmernas