header ads

Sponsor

កំពត​ ៖ ​ស្ត្រី​មាន​ផ្ទៃពោះ​ជិត​គ្រប់​ខែ​ម្នាក់​ រួម​និង​កូនស្រី​អាយុ​ប្រហែលជា​៦​ឆ្នាំ​ម្នាក់ទៀត​ បាន​ស្លាប់​បាត់​បង់ជីវិត​យ៉ាង​អាណោចអាធ័ម ខណៈ​រថយន្ត​ក្រឡុក​ស៊ីម៉ងត៍​ម៉ាក SHACMAN ពណ៌​ស បុក​ពេញទំហឹង ហើយ​កិន​ពីលើ ទើប​បណ្តាល​ឲ្យ​ស្ត្រី​រូបនេះ និង​កូនស្រី​តូចស្លាប់​ភ្លាមៗ នៅ​នឹង​កន្លែង​កើតហេតុ​ កាលពី​វេលា​ម៉ោង​៤​ និង​១០​នាទី រសៀល ថ្ងៃ​ទី​២៦ ខែ​កក្កដា ឆ្នាំ​២០២០ ត្រង់​ចំណុច​រង្វង់​មូល​ទឹក​រលក​(​ខាងលិច​ស្ពាន​ថ្មី​) នៃ​កំណាត់​ផ្លូវជាតិ​លេខ​៣ កំពត​-​វាលរេញ ស្ថិត​ក្នុង​ភូមិ​ទ្វី​ខាងជើង សង្កាត់​អណ្តូង​ខ្មែរ ក្រុង​កំពត ខេត្តកំពត​។​

សព​ស្ត្រី​រងគ្រោះ​មានឈ្មោះ សេង កក្កដា អាយុ​៣៣​ឆ្នាំ មាន​ទីលំនៅ ភូមិ​សុវណ្ណ​សាគរ សង្កាត់​កំពង់​កណ្តាល ក្រុង​កំពត និង​កូនស្រី​ម្នាក់​រួម​ដំណើរ​មិន​ស្គាល់​អត្តសញ្ញាណ​អាយុ​ប្រហែល​៦​ឆ្នាំ ដែល​ស្លាប់​ជាមួយ​ម្តាយ ​ដែល​មាន​ផ្ទៃពោះ​ខាងលើ​។

បើ​តាម​ប្រភព​ព័ត៌មាន​ នៅ​កន្លែង​កើត​ហេតុ​បាន​និយាយ​ថា មុន​ពេល​ជួប​គ្រោះថ្នាក់ដ៏រន្ធត់មួយនេះ គេ​ឃើញ​រថយន្ត​បង្ក​ម៉ាក Shacman ពណ៌​ស ពាក់​ស្លាក​លេខ​ភ្នំពេញ 3F- 0923 បើក​មកពី​ពី​ត្បូង​ទៅ​ជើង លុះ​មកដល់​កន្លែង​កើតហេតុ បាន​បុក​ម៉ូតូ​ម៉ាក​ស្កុប​ពី​ ពណ៌​ស​ ពាក់​ស្លាក​លេខ​ កំពត​ 1Q-8833 បើកបរ​ដោយ​ស្ត្រី​រងគ្រោះ​ និង​រួម​ដំណើរ​ជាមួយ​កូនស្រី ​ក្នុង​ទិសដៅ​ស្របគ្នា ហើយ​រថយន្ត​បង្ក​ក៏​ជ្រុល​ទៅ​បុក​ម៉ូតូ​ពីក្រោយ​ពេញទំហឹង ហើយ​កិន​ពីលើ បណ្តាល​ឲ្យ​ស្ត្រី​ និង​កូន​ដែល​ជិះ​លើ​ម៉ូតូ​ស្លាប់​យ៉ាង​​អាណោចអាធ័ម​តែ​ម្តង​។

ប្រភព​ដដែល​បាន​បញ្ជាក់​ថា អ្នកបើកបរ​សមត្ថកិច្ច​មិនទាន់​បាន​បង្ហាញ​អត្តសញ្ញាណ​ទេ ប៉ុន្តែ​ត្រូវ​បាន​សមត្ថកិច្ច​នាំ​ខ្លួន​ទៅកាន់​ការិយាល័យ​ចរាចរណ៍​ផ្លូវគោក​នៃ​ស្នងការដ្ឋាន​នគរបាល​ខេត្ត​ ដើម្បី​ធ្វើការ​សាកសួរ​ និង​ពិនិត្យ​សំណុំ​ឯកសារ​ផ្សេងៗ​ពាក់ព័ន្ធ​នឹង​ការ​បើកបរ​បង្ក​គ្រោះថ្នាក់​។

​បន្ទាប់ពី​សមត្ថកិច្ច​ចរាចរណ៍​ខេត្ត​ធ្វើការ​ពិនិត្យ​វាស់វែង​កន្លែង​កើតហេតុ​រួចមក ក៏បាន​ទំនាក់ទំនង​រក​ក្រុម​គ្រួសារ​សាច់ញាតិ ដើម្បី​ប្រគល់​សាកសព​ស្ត្រី​រងគ្រោះ ​និង​សព​កូន​យក​ទៅ​ធ្វើបុណ្យ​តាម​ប្រពៃណី​ រីឯ​រថយន្ត​បង្ក ​និង​អ្នកបើកបរ​សមត្ថកិច្ច​កំពុង​ធ្វើ​ការ​សាកសួរ​ ដើម្បី​អនុវត្ត​តាម​នីតិវិធី​ច្បាប់​៕

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post