សេដ្ឋកិច្ច
អាម៉ាប៉ាប៉ាញ៉ូសភ្នំពេញ៖ សម្ដេចនាយករដ្ឋមន្រ្តី ហ៊ុន សែន សម្រេចឱ្យផ្អាកជាបណ្ដោះអាសន្ននូវជើងហោះហើរពីម៉ាឡេស៊ី និងឥណ្ឌូណេស៊ី ចាប់ពីថ្ងៃទី១ សីហាទៅ។ សម្ដេច ហ៊ុន សែន បានសម្រេចយល់ព្រមផ្អាកជើងហោះហើរប្រទេសទាំងពីរជាបណ្ដោះអាសន្ននេះ ធ្វើឡើងតាមសំណើររបស់លោក ម៉ម ប៊ុនហេង រដ្ឋមន្រ្តីក្រសួងសុខាភិបាល នៅថ្ងៃទី២៥ កក្កដា។
រដ្ឋមន្ត្រីក្រសួងសុខាភិបាល បានប្រាប់សម្ដេច ហ៊ុន សែន នៅក្នុងលិខិតសុំគោលការណ៍ផ្អាកជើងហោះហើរថា ក្នុងរយៈពេលចុងក្រោយ គឺចាប់ពីថ្ងៃទី២០ មិថុនា ដល់ ២៥ កក្កដា នេះ អ្នកដំណើរតាមជើងហោះហើរពីម៉ាឡេស៊ី និងឥណ្ឌូណេស៊ី ត្រូវបានរកឃើញមានជំងឺកូវីដ១៩ កើនឡើងគួរឱ្យកត់សម្គាល់។
លោក ម៉ម ប៊ុនហេង បានអះអាងថា អ្នកជំងឺកូវីដ១៩ ចុងក្រោយមាន១០៨នាក់ ភាគច្រើនតាមជើងហោះហើរពីម៉ាឡេស៊ី (៥៥នាក់ លើ១០៨នាក់) និងឥណ្ឌូនេស៊ី (៥៣នាក់) លើអ្នកដំណើរសរុប ២៣, ៥៦៧នាក់។
ក្នុងលិខិតរដ្ឋមន្ត្រីក្រសួងសុខាភិបាល ដែលត្រូវបាននាយករដ្ឋមន្ត្រី អនុម័តយល់ព្រមនេះ បានបញ្ជាក់ថា ការសុំផ្អាកជើងហោះហើរពីប្រទេសទាំងពីរនេះ គឺដើម្បីកាត់បន្ថយហានិភ័យនៃការឆ្លងវីរុសកូវីដ១៩ ពីខាងក្រៅ ក្នុងការការពារសុខភាពពលរដ្ឋទូទាំងប្រទេស។ បើតាមរដ្ឋមន្រ្តីក្រសួងសុខាភិបាល ការសុំផ្អាកជើងហោះហើរនេះ គឺចាប់ពីថ្ងៃទី១ សីហា រហូតដល់គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ១៩ ពិនិត្យ និងវាយតម្លៃ ទៅលើហានិភ័យនៃការចម្លងវីរុសកូវីដ១៩ និងសុំគោលការណ៍បើកជើងហោះហើរជាថ្មី ពីនាយករដ្ឋមន្រ្តី។
ទោះជាយ៉ាងណា ការសម្រេចនេះ ហាក់ផ្ទុយទៅនឹងការប្រកាសរបស់សម្ដេច ហ៊ុន សែន កាលពីថ្ងៃអង្គារ៍នៅពេលចុះជួបសំណះសំណាលជាមួយកសិករនៅខេត្តតាកែវ ដែលសម្ដេចបានលើកឡើងថា រដ្ឋាភិបាលនឹងមិនហាមឃាត់ពលរដ្ឋនៅក្រៅប្រទេសមិនឱ្យចូលប្រទេសកំណើតវិញឡើយ។
គិតត្រឹមថ្ងៃទី២៥ កក្កដានេះ កម្ពុជា មានអ្នកឆ្លងជំងឺកូវីដ១៩ ចំនួន២២៥នាក់ ក្នុងនោះជាសះស្បើយ១៤៣នាក់ និងកំពុងសម្រាកព្យាបាល៨២នាក់៕
