header ads

សម្ដេច ហ៊ុន សែន បានលើកឡើងថា អ្នកណាថ្លែងថា រដ្ឋាភិបាល​បាន​ធ្វើ​ឱ្យ​បាត់​បង់​ទឹក​ដី​ជុំ​វិញការ​បោះ​បង្គោល​ព្រំដែនជាមួយវៀតណាម នឹងត្រូវ​ចាត់ទុក​ជា​ការ​ប្រព្រឹត្ត​បទ​ល្មើស​ជាក់​ស្ដែង ហើយ​នឹង​ត្រូវ​ចាប់​ខ្លួន​ភ្លាមៗ។ សម្ដេច​បានព្រមានបែបនេះ នៅក្នុង​វិធី​បើក​​ដំណើរ​ការ​សាក​ល្បង​សួន​ទឹក​កម្សាន្តនៅភ្នំពេញ​កាល​ពីព្រឹកមិញ។

សម្ដេចថា៖«សូមបញ្ជាក់ថា ការចាប់ ហុង សុខហួ និងចាប់ អ៊ំ សំអាន ក្នុងនាម​ជា​សមា​ជិក​​ព្រឹទ្ធ​សភា​និង​សមា​ជិក​រដ្ឋសភា គឺក្នុងបទល្មើសជាក់ស្ដែង។ ឥឡូវអ្នកណា​និយាយ​ដល់​ករណី​ហ្នឹង គឺ​ត្រូវ​ចាប់​ក្នុង​បទ​ល្មើស​ជាក់​ស្ដែង​ទាំង​អស់​។ រឿងអីស្នេហាជាតិតែឯង តើរាជរដ្ឋាភិបាល រដ្ឋសភា ព្រឹទ្ធសភា និង​ព្រះ​មហាក្សត្រ​មិន​ស្នេហា​ជាតិ​ទេ​អី​។ ព្រំដែន​អត់​នៅលើមាត់អ្នកឯងទេ ព្រំដែន​នៅ​លើ​ការ​ចរ​ចា​រវាង​ប្រទេសនិងប្រទេស ហើយ​ត្រូវ​ធានា​ដោយ​ច្បាប់​អន្តរ​ជាតិ មិនមែន​ធានា​ដោយ​មាត់​ពួក​អ្នក​ឯង​ទេ​។ ឥឡូវ​ចេញ​មក​ប៉ុន្មាន ចេញ​មក​ឱ្យ​អស់​មក ទាន់​គេ​និយាយ​ថា​រដ្ឋា​ភិបាល ហ៊ុន សែន ផ្ដាច់​ការ​។ គុក​បើ​ទោះ​បី​ចង្អៀត ក៏​នៅ​មាន​កន្លែង​ដាក់​បាន អត់​បញ្ហា​»។

សម្ដេចបន្តថា៖«មានអាអ្នកចេញមកនិយាយថា រឿងដោះដូរដីគឺជារឿងក្បត់ជាតិ ក្នុង​ពេល​មាន​កិច្ច​ព្រម​ព្រៀង​ទាក់​ទង​នឹង​ការ​បោះ​បង្គោល បែងចែកខណ្ឌសីមានេះ ចុះ​ហត្ថ​លេខាដោយរាជរដ្ឋាភិបាលប្រទេសទាំងពីរ សច្ចា​ប័ន​ពី​រដ្ឋសភានិងព្រឹទ្ធសភា និង​មាន​ព្រះហស្ថលេខាដោយព្រះមហាក្សត្រ ហើយអ្នកឯងចោទថា ក្បត់ជាតិ។ ឥឡូវ​មាន​ប៉ុន្មាន​ចេញមកទៀត ចេញមកប៉ុន្មានចាប់ប៉ុននុ៎ង អត់ឱ្យមានរយ៉េរយ៉ៃទេ។ កុំថា​រដ្ឋា​ភិ​បាល ហ៊ុន សែន ផ្ដាច់ការ ព្រោះ​នេះមិនមែនជាការតស៊ូមតិទេ អ្នកខ្លះ​ចេញ​មក​ថា​នេះ​គឺ​ជាការតស៊ូមតិ អត់តស៊ូមតិទេ នេះ​ជា​រឿង​ផ្លូវ​ច្បាប់​សុទ្ធ​សាធ»។

ការព្រមាននេះ បន្ទាប់ពីអាជ្ញាធររដ្ឋាភិបាលបានចាប់ខ្លួនលោក រ៉ុង ឈុន ប្រធាន​សហ​ភាព​សហ​ជីព​កម្ពុជា​កាល​ពី​ថ្ងៃ​ទី​៣១​កក្កដា និងបន្ទាប់មក បានបន្តចាប់ខ្លួនលោក សួង សុភ័ណ្ឌ ប្រធានគណបក្សខ្មែរឈ្នះ នៅ​ថ្ងៃ​ទី​១៤​សីហា ក្រោយពីអ្នក​ទាំងពីរ​បាន​ចុះ​ទៅ​ពិនិត្យបង្គោលព្រំដែនលេខ១១៤ ១១៥ ១១៦ ១១៧ និង១១៨ នៅ​ឃុំ​ត្រពាំង​ផ្លុង ស្រុក​ពញ្ញាក្រែក ខេត្តត្បូង។

លោក រ៉ុង ឈុន និងលោក សួង សុភណ្ឌ បាន​លើកឡើង​ថា​នៅ​ក្នុង​ការ​ចុះ​ពិនិត្យ​បង្គោល​ព្រំដែនទាំងនេះ គឺ​ពល​រដ្ឋ​បាន​ប្រាប់ថា បង្គោលព្រំដែនដែលបានបោះទាំងនោះ គឺបានធ្វើ​ឱ្យ​បាត់​បង់​ដី​ស្រែ​ចម្ការ​របស់​ពួក​គាត់​ចូល​ទៅ​ក្នុ​ង​ប្រទេស​វៀតណាម។ យុវ​ជន​មួយចំនួន ដូចជាកញ្ញា ឈឿន ដារ៉ាវី និងយុវជនឈ្មោះ ហ៊ុន វណ្ណៈ ដែល​នាំ​គ្នា​តវ៉ា​សុំ​ដោះ​​លែង​លោក រ៉ុន ឈុន ក៏ត្រូវអាជ្ញាធរចាប់ខ្លួនបញ្ជូនទៅពន្ធនាគារដែរ។

ការចាប់ខ្លួនលោក រ៉ុង ឈុន ពីសំណាក់កម្លាំងរដ្ឋាភិបាលនេះ បានរង​ការ​ថ្កោល​ទោស​ពី​សំណាក់​ក្រុម​អង្គ​ការ​សង្គ​ម​ស៊ីវិល​និង​សមាគមចំនួន១៤១នៅកម្ពុជា រួមទាំង​ក្រុម​សហ​ជីព​និងក្រុមសិទ្ធិមនុស្សអន្តរជាតិផ្សេងៗទៀត ដែល​ពួក​គេបាន​ចេញ​សេចក្ដី​ថ្លែង​ការណ៍​ជាបន្តបន្ទាប់សុំឱ្យដោះលែង និងចាត់ទុកថា ការចាប់ខ្លួននេះ គឺជា​ការ​មិន​គោ​រព​សិទ្ធិ​និង​សេរីភាពជាមូលដ្ឋានដែលទទួលស្គាល់ដោយអន្តរជាតិ។

សម្ដេច ហ៊ុន សែន បានជំរុញឱ្យអង្គការខុមហ្វ្រែលផ្សព្វផ្សាយជាសាធារណៈ​អំពី​ការ​ស្ទង់​មតិ​របស់ខ្លួន ដែល​បាន​ធ្វើ​ឡើង​តាម​អនឡាញ អំពីមតិយល់ព្រមនិងជំទាស់ការ​ចាប់​​ខ្លួន​លោក រ៉ុន ឈុន។ នាយករដ្ឋមន្រ្តីអះអាងថា ការ​ចាប់​ខ្លួន​អ្នកបំភ្លៃរឿងព្រំដែន គឺ​ដើម្បីការពារកុំឱ្យមានជម្លោះព្រំដែនជាមួយប្រទេសជិតខាង៕
ផ្ដល់សិទ្ធិដោយ khnernas
លោកអ្នកអាចបញ្ចេញមតិនៅទីនេះ!

Feature Ads

Previous Post Next Post