header ads

សង្គម

អាម៉ាប៉ាប៉ាញ៉ូស

ការធ្វើញត្តិតាមអនឡាញបានចាប់ផ្ដើមកាល​ពី​ថ្ងៃ​ទី​៥​​សីហា និង​គិត​មក​ដល់​ត្រឹម​ព្រឹក​ថ្ងៃទី៧សីហានេះ មានអ្នកចូលទៅចុះហត្ថលេខាជាង១ម៉ឺន៤ពាន់នាក់ហើយ។ ​យុទ្ធ​នា​ការ​នេះ គឺមាន​បំណង​​ប្រមូល​ហត្ថលេខា​ឱ្យ​បាន​១​ម៉ឺន​៥ពាន់នាក់ ដើម្បីដាក់​ជូន​ទៅ​រដ្ឋា​ភិបាល ​ក្នុងការ​ប្រឆាំង​​ការតាក់​តែង​សេចក្តី​ព្រាង​ច្បាប់​ដែលនឹង​អនុញ្ញាត​ឱ្យសមត្ថកិច្ច​ផាក​ពិន័យ​អ្នក​ដែល​ស្លៀកពាក់​មិនសមរម្យនៅទីសាធារណៈ។

សេចក្តីព្រាងច្បាប់ស្ដីពីសណ្ដាប់ធ្នាប់សាធារណៈ ដែលរៀបចំឡើងដោយ​ក្រសួង​មហា​ផ្ទៃ ស្ដីពីការ​ហាម​ឃាត់សកម្មភាពជាច្រើននៅតាមទីសាធារណៈ នឹងត្រូវបញ្ជូន​ឱ្យ​ក្រ​សួង​​ពាក់​ព័ន្ធ​របស់​រដ្ឋា​ភិ​បាលនិង​រដ្ឋ​សភា ពិនិត្យនិងអនុម័តខាងមុខ ហើយ​អាច​ចាប់​អនុ​វត្ត​​ពី​ឆ្នាំ​ក្រោយ​នេះទៅ។ ច្បាប់នេះ នឹងហាមប្រាមស្រ្ដីមិនឱ្យស្លៀកពាក់ខ្លីពេក ឬស្លៀក​ពាក់​​ស្ដើរ​ហួស​ហេតុ​ពេក​រហូតបង្ហាញ​កេរ​ភេទ រួមទាំងហាមបុរសមិនឱ្យចេញ​ទៅក្រៅ​ដោយ​មិនពាក់អាវដែរជាដើម។

ក្រសួងមហាផ្ទៃបានអះអាងថា សេចក្ដីព្រាងច្បាប់ស្ដីពីសណ្ដាប់ធ្នាប់សាធារណៈ​ដែល​មាន​​៨​ជំពូក និង៤៣មាត្រា មានគោលបំណង ដើម្បីធានាការគ្រប់គ្រងសណ្ដាប់​សា​ធា​រ​ណៈ ឱ្យមាន​របៀប​រៀបរយ សោភ័ណភាព អនាម័យ បរិស្ថាន ភាពស្ងប់ស្ងាត់ សុវត្ថិភាព​សង្គម រក្សាប្រពៃណីជាតិ និងសេចក្ដីថ្លៃថ្នូររបស់ប្រជាពលរដ្ឋ។

ទោះជាយ៉ាងណា អ្នកផ្ដួចផ្ដើមធ្វើញត្តិតាមតាមអនឡាញដើម្បីថ្កោលទោស​សេចក្តី​ព្រាង​​ច្បាប់នេះ​ បាន​បញ្ជាក់ថា សេចក្តីព្រាងច្បាប់នេះ​ ហាក់ដូចមានគោលបំណងពង្រឹង​វប្ប​​ធម៌​និទណ្ឌភាព​ជុំវិញ​អំពើ​ហិង្សា​ផ្លូវភេទ។ ផ្ទុយទៅវិញ ច្បាប់នេះគួរតែត្រូវបានតាក់​តែងឡើង​ដើម្បីការ​ពារ​សិទ្ធិ​សេរី​ភាព​របស់​ប្រជា​ជន​ និងមិនមែនគាបសង្កត់នោះទេ។

ស្លៀកខ្លី

ពួកគេយល់ថា ស្ត្រីគួរតែអាចប្រើប្រាស់សិទ្ធិសេរីភាពជាមូលដ្ឋានរបស់ពួកគេ រួមបញ្ចូល​ទាំងការ​បង្ហាញ​ខ្លួនឯងតាមរយៈសម្លៀកបំពាក់ដែលពួកគេជ្រើសរើស។ ការមិន​អនុ​ញ្ញា​ត​ ឬ​ការស្តីបន្ទោស​ស្ត្រី​ចំពោះ​ជម្រើសសម្លៀកបំពាក់ បានជម្រុញឱ្យកាន់តែមាន​ការ​យល់​​ខុសដែលថា​ ស្ត្រីសមនឹង​ត្រូវ​ស្តី​បន្ទោសចំពោះអំពើហិង្សា​ផ្លូវភេទ​ដែល​ពួក​គេ​ទទួល​រង និងធ្វើឱ្យវប្បធម៌និទណ្ឌភាពជុំវិញ​អំពើ​ហិង្សា​លើ​យេនឌ័រ​កាន់តែចាក់ឬស​ជ្រៅ​ទៅ​ៗនៅក្នុងសង្គមកម្ពុជា៕

@Amapapa.News
លោកអ្នកអាចបញ្ចេញមតិនៅទីនេះ!

Feature Ads

Previous Post Next Post