កសិកម្ម
អាម៉ាប៉ាប៉ាញ៉ូសលោក វេង សាខុន រដ្ឋមន្រ្តីក្រសួងកសិកម្ម បានឲ្យដឹងថា កសិកម្មនៅកម្ពុជាកាន់តែរឹងមាំ និងលទ្ធភាពផលិតច្រើន ហើយការវិលត្រឡប់របស់ពលរដ្ឋចំណាកស្រុក គឺជាផ្នែកមួយជំរុញឲ្យវិស័យកសិកម្មកើនឡើងក្នុងវិបត្តិកូវីដនេះ។
លោករដ្ឋមន្រ្តី បានបញ្ជាក់នៅថ្ងៃទី៤ ខែសីហា ថា៖«បច្ចុប្បន្នវិស័យឧស្សាហកម្ម និងសេវាកម្មបានធ្លាក់ចុះ ដូច្នេះកសិកម្ម ត្រូវបានចាត់ទុកជាវិស័យនាំមុខដែលមានសក្តានុពលអាចស្តារសេដ្ឋកិច្ចកម្ពុជាបាន»។
កសិករមានឱកាសច្រើនជាងមុនក្នុងការបង្កើនផលិតកម្ម ដំណាំស្បៀងអាហារត្រីសាច់ បន្ទាប់ពីការនាំចូលមានការថយចុះ និងតម្រូវការច្រើន ស្របពេលបណ្តាប្រទេសមួយចំនួននៅតែបញ្ជាទិញទំនិញស្បៀងពីកម្ពុជាមានការកើននូវបរិមាណច្រើនជាងមុន។
លោក ប្រាប់ថា ការផលិតកសិកម្មរបស់កម្ពុជាមួយចំនួន ដូចជា អង្ករ ពោត ដំឡូងមី ស្វាយ ចេក កៅស៊ូ និងត្រី សាច់មានការបញ្ជារទិញច្រើន។ ជាក់ស្តែង រយៈពេល ៧ខែ ឆ្នាំ២០២០នេះ កម្ពុជាបាននាំចេញផលិតផលកសិកម្មទៅទីផ្សារអន្តរជាតិ ប្រមាណជាង ២.៦លានតោន។ នេះបើតាមរបាយការណ៍របស់ក្រសួងកសិកម្មកាលពីថ្ងៃទី១ ខែសីហា។
របាយការណ៍ បានបង្ហាញថា ចាប់តាំងពីឆ្នាំ២០១៣ ការនាំចេញមានទំហំទឹកប្រាក់កើនជិត ១ពាន់លានដុល្លារ ដល់១៥០០ លានដុល្លារនៅឆ្នាំ២០១៩។ តាំងពីឆ្នាំ២០១០ ការនាំចេញអង្ករផ្លូវការបានកើនពី៦៣ ០០០ ដុល្លារ ដល់ ៤៤០ លានដុល្លារនៅឆ្នាំ២០១៩ ។ ការនាំចេញផលិតផលកៅស៊ូក៏មានការកើនឡើងដោយទំហំនៃការនាំចេញបានកើនពី ៤២ ពាន់តោននៅឆ្នាំ២០១០ ដល់ ២៨២ពាន់តោននៅឆ្នាំ២០១៩៕