header ads

សង្គម

អាម៉ាប៉ាប៉ាញ៉ូស

លោក Sir Mark Walport សមាជិកក្រុមប្រឹក្សាវិទ្យាសាស្ត្រសម្រាប់ភាពអាសន្ន (Sage) នៅ​ចក្រ​អង់​គ្លេស​បាន​និយាយ​ថា មេរោគកូរ៉ូណាថ្មីឬកូវីដ១៩នឹងមានវត្តមាន​ជា​រៀង​រហូត​ក្នុងទម្រង់ខ្លះឬទម្រង់ផ្សេងទៀត។ លោក​បន្ត​ថា ប្រជាជនទាំងអស់នឹងត្រូវទទួល​ថ្នាំ​បង្ការជំងឺឆ្លងនេះនៅចន្លោះពេលទៀងទាត់ណាមួយ។

ការលើកឡើងរបស់លោក Sir Mark Walport គឺបន្ទាប់ពីប្រធានអង្គការសុខភាពពិភព​លោក​(WHO) លោក Tedros Adhanom Ghebreyesus បាននិយាយថា ជំងឺរាតត្បាត​នេះ​ អាច​នឹង​ត្រូវ​បញ្ចប់​ក្នុង​រយៈ​ពេល​ត្រឹម​ពីរ​ឆ្នាំ​ប៉ុណ្ណោះ គឺឆាប់ជាងជំងឺផ្តាសាយ​អេ​ស្ប៉ាញ​ដែលបានផ្ទុះឡើងកាលពីឆ្នាំ១៩១៨។

ប៉ុន្តែលោក Sir Mark បាននិយាយថា ចំនួនប្រជាជនកាន់តែច្រើនកកកុញ និងការធ្វើ​ដំណើរ គឺមានន័យថា វីរុស​នេះ​អាចរាលដាលយ៉ាងងាយស្រួល។ លោកបន្តថា ប្រជា​ជន​ពិភពលោកបច្ចុប្បន្ន គឺ​មាន​ចំនួន​ច្រើន​ជាង​កាល​ពី​ឆ្នាំ​១៩១៨។

ថ្លែងប្រាប់វិទ្យុBBCនៅថ្ងៃទី២២សីហានេះថា៖«ដើម្បីគ្រប់គ្រងជំងឺរាតត្បាតនេះ ការចាក់​វ៉ាក់សាំងជាសកល នឹង​ត្រូវ​បាន​ទាមទារ ប៉ុន្តែវីរុសកូរ៉ូណានេះ នឹងមិនក្លាយជាជំងឺមួយ ដូចជំងឺអុតស្វាយនោះទេ ដែល​អាច​ត្រូវ​បាន​លុប​បំបាត់​ចោល​ដោយការ​ចាក់​វ៉ាក់​សាំង​»​។

លោកបន្តថា៖«នេះគឺជាវីរុសដែលនឹងនៅជាមួយយើងជារៀងរហូតក្នុងទម្រង់ខ្លះឬផ្សេងទៀត ហើយស្ទើរ​តែ​ប្រាកដ​ថា នឹងត្រូវការការចាក់វ៉ាក់សាំងម្តងហើយម្តងទៀត។ ដូច្នេះ​ដូច​ជំងឺផ្តាសាយបន្តិចដែរ គឺមនុស្ស​នឹង​ត្រូវ​ការ​ចាក់​វ៉ាក់​សាំង​ម្តងទៀតនៅ​ចន្លោះ​ពេល​ទៀង​ទាត់»។

លោក Tedros Adhanom Ghebreyesus ប្រធានអង្គការសុខភាព​ពិភព​លោក​ធ្លាប់​និយាយ​​កាលពីពេលថ្មី​ៗ​នេះ​ថា ជំងឺផ្តាសាយអេស្ប៉ាញឆ្នាំ១៩១៨ គឺត្រូវបានចំណាយ​ពេលអស់ពីរឆ្នាំ ទើបអាចយកឈ្នះជំងឺនេះបាន ហើយ​លោកសង្ឃឹមថា បច្ចេកវិទ្យា​កាន់​តែជឿនលឿនក្នុងបច្ចុប្បន្ន នឹងអាចឱ្យ​ពិភព​លោកបញ្ឈប់ការ​ឆ្លងជំងឺ​កូវីដ​១៩​ បានឆាប់​រហ័សជំងឺគ្រុនផ្ដាសាយអេស្ប៉ាញទៅទៀត៕

@Amapapa.News
លោកអ្នកអាចបញ្ចេញមតិនៅទីនេះ!

Feature Ads

Previous Post Next Post