header ads

សង្គម

អាម៉ាប៉ាប៉ាញ៉ូស

ភ្នំពេញ ​៖ ក្រសួង​អប់រំ បានសម្រេច​ប្ដូរ​គោលការណ៍ ​មិន​តម្រូវឲ្យ​គ្រប់​សិស្សានុសិស្ស​ និង​គ្រប់​បុគ្គលិក ​នៃ​សាលា​ឯកជន​ទាំង​២០ ​ដែល​នឹង​បើក​ដំណើរការ​ក្នុង​ខែ សីហា​នេះ ​ត្រូវ​ធ្វើ​តេស្ត​រក​ជំងឺ កូវីដ​-19 ​ទាំងអស់គ្នា​នោះទេ​។​

ក្រសួងបញ្ជាក់ថា ការ​ធ្វើ​តេស្ត​ស្វែងរក​ជំងឺ​កូ​វីដ​-19 ​គឺ​តម្រូវ​តែ​សិស្ស ឬ អាណាព្យាបាល និង​បុគ្គលិក​សាលា​ដែល​មាន​ប្រវត្តិ​ធ្លាប់​ចាកចេញ​ទៅ​ក្រៅប្រទេស ​ក្រោយ​ដើមខែ មិថុនា​ឆ្នាំ ២០២០​ប៉ុណ្ណោះ​។

កន្លងមក​តាម​សេចក្ដីជូនដំណឹង​របស់​ក្រសួង​អបរំ បាន​បញ្ជាក់ថា សាលារៀន​ឯកជន​ចំនួន ២០ ដែលមាន​ស្តង់ដារ​សុវត្ថិភាព​ខ្ពស់​មាន​ទីតាំង​ក្នុង​រាជធានី​ភ្នំពេញ ក្រុង​បាត់ដំបង​ និង​ក្រុង​សៀមរាប​អាច​បើក​ដំណើការ​ជាថ្មី​ក្នុង​ខែ សីហា​ឆ្នាំ ​២០២០​នេះ​។

​សេចក្ដីជូនដំណឹង​នេះ ​ក៏​បញ្ជាក់​ពី​វិធានការ​ជាច្រើន​ចំណុច ដែល​តម្រូវឲ្យ​សាលា​ឯកជន​ទាំងនេះ ​ត្រូវ​គោរព​តាម​ផងដែរ ​ក្នុងនោះ ​រួមមាន​ការរៀបចំ​បរិស្ថាន​សាលា អគារសិក្សា​ និង​ការរៀបចំ​ថ្នាក់រៀន (​ចំនួន​សិស្ស​ក្នុង​ថ្នាក់រៀន​ដែល​គោរព​បាន​នូវ​គម្លាត​សុវត្ថិភាព​) ​ដោយ​ត្រូវ​អនុវត្តតាម​ការណែនាំ​របស់​ក្រសួងសុខាភិបាល ​និង​អង្គការ​សុខភាព​ពិភពលោក ការ​បាញ់​ថ្នាំ​សម្លាប់​មេរោគ​ជា​ទៀងទាត់ និង​ត្រូវ​បំពាក់​ឧបករណ៍​សម្រាប់​សម្លាប់​មេរោគ​តាម​ស្តង់ដារ​។

ការតម្រូវឲ្យ​បន្ត​អនុវត្ត​នូវ​វិធីសាស្ត្រ​សិក្សា​តាមបែប​ចម្រុះ​គឺ​ ការសិក្សា​ពី​ចម្ងាយ​តាម​ប្រព័ន្ធ​អេឡិចត្រូនិក​ រួម​ជាមួយ​នឹង​ការសិក្សា​នៅក្នុង​ថ្នាក់រៀន ​ព្រមទាំង​គោរព​នូវ​ពិធីសារ​សុវត្ថិភាព​សុខភាព​សិក្សា ហើយ​ក្រសួង​ក៏​នឹង​ចេញ​គោលការណ៍​ណែនាំ​ស្តីពី លក្ខខណ្ឌ​តម្រូវ​នៃ​ការ​លើកកម្ពស់​សុខភាព​សិក្សា​ក្នុង​បរិបថ​កូ​វីដ​ ជា​មូលដ្ឋាន​គោល​សម្រាប់​ការរៀបចំ​ពិធីសារ​សុវត្ថិភាព​សុខភាព​សិក្សា​របស់​គ្រឹះស្ថានសិក្សា​ផងដែរ​។ ​ចំពោះ​ករណី​ធ្វេសប្រហែស​ណាមួយ​របស់​សាលារៀន​ឯកជន​ទាំងនោះ​ ក្រសួង​អប់រំ​នឹង​ធ្វើ​ការព្រមាន ​ហើយ​ឈាន​ទៅ​ផ្អាក​ដំណើរការ​បណ្តោះអាសន្ន​៕

@Amapapa.News
លោកអ្នកអាចបញ្ចេញមតិនៅទីនេះ!

Feature Ads

Previous Post Next Post