header ads

សេដ្ឋកិច្ច

អាម៉ាប៉ាប៉ាញ៉ូស

ក្រសួងរតនាគារសហរដ្ឋអាមេរិកបានប្រើច្បាប់សកលលម៉ែកនីតស្គី(Global Mangitsky Act) ដាក់​ទណ្ឌ​កម្ម​ប្រឆាំង​ក្រុមហ៊ុនUnion Development Group ដែល​គ្រប់​គ្រងដោយរដ្ឋចិន ដោយសារ​សកម្ម​ភាព​ពុក​រលួយ​របស់​ក្រុមហ៊ុននេះនៅ​លើ​ទឹក​កម្ពុជា​។ នេះបើ​តាមសេចក្ដីប្រកាស​ព័ត៌​មាន​របស់​ក្រសួង​អាមេ​រិក​នេះ​កាល​ពី​ថ្ងៃ​អង្គារ៌​ទី​១៥កញ្ញា។

សេចក្ដីប្រកាសព័ត៌មាននេះបន្តថា ការចាត់វិធានការនេះ គឺបង្ហាញពីរបៀបដែលគណ​បក្ស​កុម្មុយនិស្តចិន សហ​ការ​ជា​មួយក្រុមហ៊ុននានា ដើម្បីពង្រីកឥទ្ធិពលរបស់​ខ្លួន​រួម​ទាំង​តាមរយៈការធ្វើការងារជាមួយមន្រ្តីពុករលួយ ដើម្បី​ប្រើ​កម្លាំងយោធាប្រឆាំង​នឹង​ប្រជា​ជនស្លូតត្រង់ ក្នុងការ​ប៉ុន​ប៉ង​ដោយ​ឥត​លាក់​លៀម​ដើម្បី​ទទួល​បាន​ប្រាក់​ចំណេញ​ខុសច្បាប់។

ក្រសួងរតនាគារអាមេរិកអះអាងថា មានរបាយការណ៍គួរឱ្យទុកចិត្តថា គម្រោងអភិវឌ្ឍន៍​ឆ្នេរ​នៅ​តំបន់​តារា​សាគរ​ក្នុង​ខេត្ត​កោះកុងដោយក្រុមហ៊ុនចិននេះថា អាចត្រូវបាន​ប្រើ​ជា​កន្លែងឈរជើងដោយយោធាចិន ហើយប្រសិនបើ​ដូច្នេះ វានឹងរំលោភរដ្ឋធម្មនុញ្ញកម្ពុជា និងអាចគំរាមកំហែងដល់ស្ថេរភាពភាពតំបន់ឥណ្ឌូនិងប៉ាស៊ីហ្វិក ដែលអាច​ប៉ះ​ពាល់​ដល់​​អធិបតេយ្យភាពរបស់ប្រទេសកម្ពុជា និងសន្តិសុខរបស់សម្ព័ន្ធមិត្តរបស់​សហ​រដ្ឋ​អាមេរិក។

កាលពីឆ្នាំ២០០៨ រដ្ឋាភិបាលកម្ពុជាបានជួលដីរយៈពេល៩៩ឆ្នាំឱ្យក្រុមហ៊ុនUnion Development Group ដើម្បី​អភិវឌ្ឍគម្រោងតំបន់តារាសាគរនៅលើទីតាំង​ដែល​មាន​ទំហំ​ជិត២០ភាគរយ នៃឆ្នេរសមុទ្រសរុប​របស់​ប្រទេស​។ គម្រោងនេះ គឺមានការអភិ​វឌ្ឍន៍​កំពង់ផែ ព្រលានយន្តហោះ និងទីក្រុងរណប។

សេចក្ដីប្រកាសដដែលបញ្ជាក់ថាទៀតថា ដោយសារមានការជាប់ពាក់ព័ន្ធនឹងអតីតមន្រ្តី​យោធាកម្ពុជាម្នាក់ គឺ​កម្លាំង​យោធាបានឈូសឆាយដីដែលបានជួល ដោយ​ប្រើ​ប្រាស់​អំពើ​ហិង្សាទៅលើពលរដ្ឋ ហើយបន្ទាប់មក លោក គុន គីម អតីត​អគ្គមេបញ្ជាការ​រង​នៃ​កង​យោធពល​ខេមរភូមិន្ទ​ បានទទួលអត្ថ​ប្រយោជន៍​ហិរញ្ញ​វត្ថុ​យ៉ាង​ច្រើន​ពី​ទំនាក់​ទំនង​នេះជាមួយក្រុមហ៊ុនចិន ខណៈដីមួយចំនួន កំពុងស្ថិតក្នុងការសង្ស័យថា នៅក្នុងឧទ្យាន​ជាតិបុទុម​សាគរ​ជាតំបន់សម្រាប់ការពារធម្មជាតិ។

ការដាក់ទណ្ឌកម្មនេះ គឺដើម្បីបង្កក់ទ្រព្យសម្បត្តិនិងផលប្រយោជន៍ទាំងអស់ របស់ក្រុម​ហ៊ុន ស្ថាប័នពាក់ព័ន្ធ និង​បុគ្គលទាំងអស់ដែលមានកម្មសិទ្ធិផ្ទាល់ឬដោយប្រយោល ៥០ ភាគរយឬច្រើនជាងនេះ ដើម្បីរាយការណ៍ទៅ​ការិយា​ល័យ​គ្រប់គ្រង​ទ្រព្យ​សម្បត្តិបរ​ទេស​(OFAC)របស់ក្រសួងរតនាគារសហរដ្ឋអាមេរិក។

បទបញ្ញត្តិរបស់ OFAC ជាទូទៅគឺហាមឃាត់រាល់ប្រតិបត្តិការទាំងអស់ដោយពលរដ្ឋ​អា​មេ​រិក ឬអ្នកស្ថិតនៅក្នុង​សហ​រដ្ឋអាមេរិក ដែលពាក់ព័ន្ធនឹងទ្រព្យសម្បត្តិឬផល​ប្រយោជន៍​ណាមួយ​នៅក្នុងទ្រព្យសម្បត្តិរបស់អ្នក​ត្រូវ​ទណ្ឌ​កម្ម​ទាំងនោះ។

ការហាមឃាត់ទាំងនោះ រួមមានការចូលរួមវិភាគទានឬការផ្តល់មូលនិធិ ទំនិញ ឬសេវា​កម្ម ដើម្បី​ជា​ប្រយោជន៍ដល់បុគ្គលដែលត្រូវបានរារាំង ឬការទទួលបានវិភាគទាន ឬការ​ផ្ដល់មូលនិធិទំនិញឬសេវា​កម្ម​ណា​មួយ​ពី​បុគ្គលដែលរងទណ្ឌកម្មនេះ។

អ្នក​នាំ​ពាក្យ​ស្ថាន​ទូត​ចិន​ប្រចាំ​កម្ពុជា​បាន​ជំទាស់​និង​ថ្កោល​ទោស​ចំពោះ​ការ​ដាក់​ទណ្ឌ​កម្ម​នេះ រួម​ទាំង​ស្នើ​ឱ្យ​សហ​រដ្ឋ​អា​មេ​រិក​ដក​ការ​ដាក់​ទណ្ឌ​កម្ម​វិញ​ជា​បន្ទាន់ ដោយ​បាន​ថា សហ​រដ្ឋ​អាមេ​រិក​បាន​ប្រែ​ក្រឡាស់​រឿង​ពិត ចោទ​ប្រកាន់​មិន​សម​ហេតុ​ផល និង​បាន​ប្រើ​ច្បាប់​ក្នុង​ប្រទេស​ខ្លួន​ដើម្បី​ដាក់​ទណ្ឌ​កម្ម​ក្រុម​ហ៊ុន​ចិន​ក្នុង​ទឹក​កម្ពុជា ដែល​ជា​សកម្ម​ភាព​ប្រើ​អំណាច​គាប​សង្កត់​យ៉ាង​ខ្លាំង​។

អ្នកនាំពាក្យស្ថានទូតនេះបន្តថា ការគាបសង្កត់ មិនត្រឹមតែប៉ះពាល់អត្ថប្រយោជន៍​សិទ្ធិ​ស្រប​ច្បាប់​របស់​សហ​គ្រាស​របស់​ខ្លួន​ទេ ប៉ុន្តែ​រឹត​តែរំលោភបំពានទាំងស្រុង​លើ​អធិ​បតេយ្យ​ភាពរបស់ប្រទេសកម្ពុជា។ ស្ថាន​ទូត​ចិន​បញ្ជាក់​ថា គម្រោងអភិវឌ្ឍន៍នៅតំបន់​តា​រា​សាគរ គឺជាគម្រោងអនុលោមតា​មច្បាប់​និង​បទ​បញ្ញត្តិ​នា​នា​របស់​កម្ពុជា និងដើម្បី​រួម​ចំណែកលើកកម្ពស់សេដ្ឋកិច្ចនិងសង្គមរបស់កម្ពុជា៕

@Amapapa.News
លោកអ្នកអាចបញ្ចេញមតិនៅទីនេះ!

Feature Ads

Previous Post Next Post