សង្គម
អាម៉ាប៉ាប៉ាញ៉ូសភ្នំពេញ៖ លោកហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ចុះពិនិត្យលើដំណើរការបើកសាលាឡើងវិញក្នុងដំណាក់ទី៣ នៅវិទ្យាល័យជា ស៊ីម សន្ធរម៉ុក នាព្រឹកថ្ងៃទី០២ វិច្ឆិកានេះ។
លោកបានលើកឡើងថា ការបើកដំណើរការសាលាឡើងវិញនៅពេលនេះ នៅតែមានហានិភ័យនៅឡើយ ប៉ុន្តែលោកយល់ថា វាអាចដំណើរការជាប្រក្រតី ដោយសារការបង្រៀនត្រូវបែងចែកជា២វេន គឺសិស្សពាក់កណ្តាលរៀនអានឡាញ និងពាក់កណ្តាលទៀតមករៀនក្នុងថ្នាក់ និងម្យ៉ាងទៀត រដ្ឋាភិបាលកំពុងគ្រប់គ្រងកុំឱ្យមានការឆ្លងជំងឺយ៉ាងមានប្រសិទ្ធភាព។
លោកថា ប្រសិនបើមានករណីឆ្លងវីរុសកូវីដ-១៩នៅក្នុងសាលារៀន នោះក្រសួងអប់រំនឹងធ្វើការពិភាក្សាជាមួយក្រសួងសុខាភិបាលដើម្បីបិទសាលារៀននោះ។ លោករដ្ឋមន្ត្រីបន្ថែមថា ចំពោះការបិទសាលារៀនទៀតសោត គឺក្រសួងនឹងពិចារណាថាត្រូវបិទសាលារៀននៅទូទាំងទីក្រុងភ្នំពេញឬយ៉ាងណា បើសិនជាមានករណីឆ្លងវីរុសថ្មីនេះនៅក្នុងសាលារៀន។
លោកថា៖«ប្រទេសដ៏ទៃមិនបានធ្វើចតាឡីស័កទេ យើងឃើញថាពិបាកគ្រប់គ្រងជំងឺនេះ ដោយសារមិនមានការអនុវត្តឲ្យបានម៉ឺងម៉ាត់។ ដោយឡែកកម្ពុជា អ្នកដែលធ្វើដំណើរតាមផ្លូវអាកាស និងផ្លូវគោកត្រូវធ្វើចតាឡីស័ក ១៤ ថ្ងៃសិន ដូច្នេះកម្ពុជាអាចគ្រប់គ្រងបាន»។