header ads

ភ្នំពេញ ៖ ​ករណីជនសង្ស័យ​ជាមន្ត្រីយោធាបាន​កាន់​កាំភ្លើងខ្លី​ទៅ​សម្លុត គំរាម​បាញ់សម្លាប់​ជនរងគ្រោះ​មួយ​គ្រួសារ ដោយសារ​ទំនាស់​បន្តិចបន្តួច ត្រូវបានព្រះរាជអាជ្ញាសម្រេច​ដោះលែង​ឲ្យ​មាន​សេរីភាព​វិញ​ហើយ កាលពី​ល្ងាច​ថ្ងៃ​ទី​២៣ ខែ​វិច្ឆិកា ឆ្នាំ​២០២០​។

ខ្មាន់កាំភ្លើង​ ដែល​តុលាការ​ដោះលែង​ឲ្យ​មាន​សេរីភាព​វិញ​នេះ​ឈ្មោះ ហ៊ីម សំបូរ ជា​វរសេនីយ៍ឯក​យោធា ក្រោយពី​កម្លាំង​កងរាជអាវុធហត្ថ​រាជធានី​ភ្នំពេញ ចាប់ខ្លួន​កាលពី​ថ្ងៃ​ទី​២២ ខែ​វិច្ឆិកា ឆ្នាំ​២០២០ តាម​ពាក្យបណ្ដឹង​របស់​ក្រុម​គ្រួសារ​ជនរងគ្រោះ។

ជនសង្ស័យ និង​សំណុំរឿង ត្រូវ​បាន​បញ្ជូន​មក​អយ្យការ ហើយ​នៅ​ថ្ងៃ​ទី​២៣ ខែ​វិច្ឆិកា ឆ្នាំ​២០២០ នេះ លោក ស៊ិត វណ្ណៈ ព្រះរាជអាជ្ញារង​អម​សាលាដំបូង​រាជធានី​ភ្នំពេញ បាន​ធ្វើការ​សាកសួរ​ឈ្មោះ ហ៊ឹម​ សំបូរ លុះដល់​ល្ងាច​ថ្ងៃ​ដដែល លោក ស៊ិត វណ្ណៈ ដែល​ទទួលបន្ទុក​ចាត់​ការ​សំណុំ​រឿង​នេះ បានសម្រេច​ដោះលែង​ឈ្មោះ ហ៊ឹម សំបូរ ឲ្យ​ត្រឡប់​ទៅវិញ​បាត់​ទៅ បើ​ទោះ​បី​តុលាការ​បាន​ទទួល​ភស្តុតាង​បទល្មើស​ ដែល​ខ្មាន់កាំភ្លើង​ដៃ​កាន់​កាំភ្លើង​ដើរ​សំដៅ​មក​ផ្ទះ​ជនរងគ្រោះ​ គំរាមកំហែង​ដល់​ផ្ទះ។

 សូមជម្រាបជូនថា កាលពី​ថ្ងៃ​ទី​១៦ ខែ​វិច្ឆិកា ឆ្នាំ​២០២០ វេលា​ម៉ោង​ប្រមាណ​២០ និង​២០​នាទី នៅ​ចំណុច​មុខ​ផ្ទះ​លេខ​២៤៦ ផ្លូវ​លេខ​២៧១ ២៧១ ភូមិ​អូរ​បែកក្អម សង្កាត់​អូរ​បែកក្អម ខណ្ឌ​សែន​សុខ រាជធានី​ភ្នំពេញ ឈ្មោះ ហ៊ឹម សំបូរ ដែល​មាន​ដី​ផ្ទះ​ជិតខាង​ជនរងគ្រោះ បាន​ដើរ​កាន់​អាវុធ​ខ្លី​មិន​ស្គាល់​ម៉ាក​ចំនួន​១​ដើម កាត់​មុខ​ផ្ទះ​ជនរងគ្រោះ​ឆ្ពោះ​ទៅ​ហាង​អ៊ុត​របស់​ជនរងគ្រោះ​មាន យីហោ «​ជី ជី សាឡ​ន​» ដោយ​បាន​ធ្វើការ​សម្លុត និង គំរាមកំហែង​បាញ់សម្លាប់​ទាំង​គ្រួសារ​ ដោយ​ពុំ​មាន​មូលហេតុ​ច្បាស់លាស់ បន្ទាប់ពី​ក្រុម​គ្រួសារ​ជនរងគ្រោះ ​បាន​សង់ផ្ទះ​រួចរាល់​នៅ​ជាប់​ដី​របស់​លោក ហ៊ឹម សំបូរ។

បើតាម​ពាក្យបណ្ដឹង​ និង​ភស្តុតាង​ ដែល​ក្រុម​គ្រួសារ​ជនរងគ្រោះ​ បាន​ដាក់​ជូន​សមត្ថកិច្ច កងកម្លាំង​អាវុធហត្ថ​ បាន​ឃាត់ខ្លួន​លោក ហ៊ឹម សំបូរ បញ្ជូន​មក​អយ្យការ​អម​តុលាការ ប៉ុន្តែ​រឿងក្ដី​នេះ​ មិនទាន់​ដោះស្រាយ​ជាមួយ​ក្រុម​គ្រួសារ​ជនរងគ្រោះ​ផង ស្រាប់តែ​ព្រះរាជអាជ្ញា​សម្រេច​ដោះលែង​ខ្មាន់កាំភ្លើង​ឲ្យ​ត្រឡប់​ទៅវិញ​បាត់ ដែល​ករណី​បែប​នេះ ​គឺជា​ហានិភ័យ​យ៉ាង​ធ្ងន់ធ្ងរ​ សម្រាប់​ក្រុម​គ្រួសារ​ជនរងគ្រោះ៕

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post