ភ្នំពេញ៖ មានករណីធ្លាក់ដែកសរសៃមួយទៀតហើយ បណ្តាលឲ្យចំឡានមួយគ្រឿងដែលកំពុងធ្វើដំណើរតាមផ្លូវ នារសៀលថ្ងៃទី១ ខែមករា ឆ្នាំ២០២១ នេះនៅចំណុចខុនដូកំពុងសាងសង់ ឈ្មោះ Agile ស្ថិតនៅតាមផ្លូវលេខ៩៥ សង្កាត់បឹងកេងកង៣ ខណ្ឌបឹងកេងកង ។
អ្នកឃើញហេតុការណ៍ អះអាងថាមិនបណ្ដាលឲ្យមានគ្រោះថ្នាក់ដល់មនុស្សឡើយ ដែលនេះសំណាងហើយចំថ្ងៃបុណ្យចូលឆ្នាំសកល មិនសូវមានការមមាញឹក កុំអីពិតជាគ្រោះថ្នាក់ខ្លាំងមែនទែនហើយ។
ប្រជាពលរដ្ឋ សំណូមពរឲ្យអាជ្ញាធរមានវិធានការចំពោះការដ្ឋានសំណង់មួយផង ព្រោះនេះមិនមែនជាលើកទី១នោះទេ ។
រថយន្តខាងលើត្រូវបានគេស្គាល់ថាជារបស់ពិធីករប្រចាំប៉ុស្តិ៍ទូរទស្សន៍ហង្សមាស គឺលោក សុខ រ៉ាស៊ី ទោះជាយ៉ាងណា គេឃើញភាគីខាងការដ្ឋានសំណង់ កំពុងធ្វើការចរចារជាមួយពិធីករល្បីឈ្មោះគឺលោក សុខ រ៉ាស៊ី ដើម្បីបញ្ចប់រឿងផងដែរ តែលោកបានឲ្យដឹងផងដែរថា សំណាងហើយដែលលោកជិះក្នុងរថយន្តគ្រាន់តែរងការខូចខាត ចុះបើធ្លាក់ត្រូវចំអ្នកជិះម៉ូតូវិញ មិនដឹងមានគ្រោះថ្នាក់យ៉ាងណានោះទេ ៕
