ភ្នំពេញ ៖ ការអនុវត្តការណែនាំអប់រំ និងឃាត់ដើម្បីធ្វើការផាកពិន័យ ចំពោយានយន្ត ដែល កែច្នៃ បង្កសំឡេងរំខាននេះ សមត្ថកិច្ចធ្វើការសហការ ជាមួយក្រសួងបរិស្ថាន ដើម្បីប្រើប្រាស់ ម៉ាស៊ីនក្នុងការវាស់កម្រិតសំឡេង ដែលបង្កដោយយានយន្ត គ្រប់ប្រភេទ ម្យ៉ាងវិញទៀត ចំពោះអ្នកប្រើប្រាស់ យានយន្តកែច្នៃ ស៊ី ម៉ាំង និងត្រូវធ្វើការណែនាំអប់រំ ធ្វើការ ផាកពិន័យតាមច្បាប់ អនុវត្តរឹតបន្តឹង ច្បាប់ ចរាចរណ៍ ផ្លូវគោក និង នាំយកយានយន្ត មករក្សាទុក នៅកន្លែង សមត្ថកិច្ច មិនឲ្យលើសរយៈពេល ៣ ថ្ងៃឡើយ។
ជាក់ស្ដែងមានម៉ូតូធំៗចំនួនរាប់រយគ្រឿង ដែលមានបំពង់សំឡេងឮរំខានដល់ការរស់នៅបងប្អូនប្រជាពលរដ្ឋនៅរាជធានីភ្នំពេញ ត្រូវបានសមត្ថកិច្ចធ្វើការឃាត់ និងតម្រូវឲ្យម្ចាស់ម៉ូតូទាំងអស់នោះ ដោះស៊ីម៉ាំងធ្វើកិច្ចសន្យា បន្ទាប់មកអនុញ្ញាតឲ្យពួកគេត្រឡប់ទៅផ្ទះវិញ ប៉ុន្តែតែប្រសិនបើម្ចាស់ទាំងនោះមិនព្រមធ្វើតាមកិច្ចសន្យាទេ នឹងត្រូវពិន័យយ៉ាងធ្ងន់ធ្ងរ។
សូមជម្រាបជូនថាការចុះប្រតិបត្តិការ ត្រួតពិនិត្យនូវម៉ូតូធំៗទាំងនោះ គឺបានធ្វើឡើងបន្ទាប់ពី ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានណែនាំទៅដល់ នគរបាល ខណ្ឌ ទាំង ១៤ ត្រូវលុបបំបាត់ឲ្យបាន ចំពោះសកម្មភាពនៃការប្រើប្រាស់មធ្យោបាយដែលបានកែច្នៃបំពង់ស៊ីម៉ាំងនៅលើដងផ្លូវ សាធារណៈ ដើម្បីធានានូវ សុខសុវត្ថិភាព សណ្តាប់ធ្នាប់រួមចំណែករក្សាបរិស្ថានសង្គមឲ្យមានភាពល្អប្រសើរនោះ។
