header ads

ភ្នំពេញ៖ មន្ត្រី​ជាន់ខ្ពស់​ក្រសួងសុខាភិបាល​បាន​បញ្ជាក់​ជាថ្មី​ទៀត​ថា ទោះជា​បុគ្គល​នីមួយៗ​បាន​ទទួល​ការ​ចាក់​វ៉ាក់សាំង​បង្ការ​ជំងឺ​កូ​វីដ​១៩ រួចហើយ​ក្តី ក៏​មិន​មែន​ជា​ដំណោះស្រាយ​ទប់ស្កាត់​ការ​ចម្លង ​រាលដាល​នៃ​ជំងឺ​កូ​វីដ​១៩ បាន​ឡើយ​។ ក៏ប៉ុន្តែ​ទន្ទឹម​នឹង​ចាក់​វ៉ាក់សាំង បុគ្គល​គ្រប់រូប​ត្រូវ​អនុវត្ត​វិធានការ ៣​កុំ និង ៣​ការពារ​ទើប​អាច​ទប់ស្កាត់​ការ​ចម្លង​រាលដាល​ជំងឺ​កូ​វីដ​១៩ ទៅ​ក្នុង​សហគមន៍​បាន​។​

​លោក​ជំទាវ ឱ វណ្ណឌី​ន រដ្ឋលេខាធិការ និង​ជា​អ្នកនាំពាក្យ​ក្រសួងសុខាភិបាល​នៅ​ថ្ងៃ​ទី​២៨ ខែ​កុម្ភៈ ឆ្នាំ​២០២១​នេះបញ្ជាក់​ថា ការ​ចាក់​វ៉ាក់សាំង​តែ​មួយ​មុខ​មិន​មែន​ជា​ដំណោះស្រាយ​ សម្រាប់​ទប់ទល់​ឆ្លើយតប​នឹង​ការ​រាត​ត្បាត​ពី​ជំងឺ​កូ​វីដ​១៩ បាន​ឡើយ​។ លោកជំទាវ​ថា ការ​យក​ឈ្នះ​លើ​វីរុស​កូ​វីដ​–១៩ នៅ​ពេល​នេះ ក្រៅពី​ចាក់​វ៉ាក់សាំង​គឺ​ត្រូវ​អនុវត្ត​វិធានការ​រួមគ្នា​មាន ៣​ការពារ និង ៣​កុំ​។​ ទោះ​យ៉ាង​ណា លោក​ជំទាវ​រដ្ឋលេខាធិការ​បន្ថែម​ថា ការ​ចាក់​វ៉ាក់សាំង​កូ​វីដ​១៩ គឺ​បង្កើត​បាន​នូវ​កងការពារ​ដ៏​រឹងមាំ​ សម្រាប់​បុគ្គល​ក្នុង​ការ​ការពារ​ពី​ភាព​ធ្ងន់ធ្ងរ​សុខភាព ដែល​អាច​កើតមានឡើង​ពី​ការ​វាយ​លុក​របស់​វីរុស​កូ​វីដ​១៩ កាត់បន្ថយ​បាន​នូវ​បន្ទុក​ចូល​សម្រាក​ពេទ្យ និង​កាត់បន្ថយ​បានជា​អតិបរមា​នូវ​ការ​កើត​ជំងឺ​នេះ​ ក្នុង​សហគមន៍​ផង​ដែរ​។ ដូច្នេះ​ការ​ចាក់​វ៉ាក់សាំង​ក៏​កំពុងតែ​ធ្វើជា​បន្តបន្ទាប់ គួប​គ្នា​ជាមួយ​នឹង​ការអនុវត្ត​វិធានការ ៣​ការពារ និង ៣​កុំ ដើម្បី​ឆ្លើយតប​នៅ​ក្នុង​បរិបទ​ប្រយុទ្ធ​នឹង​ជំងឺ​កូ​វីដ​១៩​។​


​លោក​ជំទាវ ឱ វណ្ណឌី​ន ស្នើសុំ​ការយោគយល់​ពី​ប្រជាពលរដ្ឋ​ ដែល​ចង់​ចាក់​វ៉ាក់សាំង​បង្ការ​ជំងឺ​កូ​វីដ​១៩ ដោយ​សារ​បរិមាណ​វ៉ាក់សាំង​ដែល​រដ្ឋាភិបាល​មាននៅ​តិចតួច​នៅឡើយ ពោល​គឺ​ក្នុង​ជំហាន​ដំបូង​នេះ​ការ​ចាក់​វ៉ាក់សាំង ​សម្រាប់​តែ​ក្រុម​អាទិភាព​ដែល​ងាយ​ប្រឈម​នឹង​វីរុស​កូ​វីដ​១៩ ប៉ុណ្ណោះ​។ ទោះ​យ៉ាង​នេះ​ក្តី​លោកជំទាវ អំពាវនាវ​ដល់​បងប្អូន​ប្រជាពលរដ្ឋ​បន្ត​អនុវត្តន៍​វិធានការ​ខាងលើ ទោះជា​មិនទាន់​ដល់​វេន​ចាក់​វ៉ាក់សាំង​ក៏ដោយ ហើយ​មិន​ត្រូវ​ភ្លេចខ្លួន ឬ​មិនបាន​អនុវត្តន៍​វិធានការ​ការពារ​ខ្លួន ៣​ការពារ និង ៣​កុំនោះ​ឡើយ​។ ​លោក​ជំទាវ ឱ វណ្ណឌី​ន រដ្ឋលេខាធិការ​ក្រសួងសុខាភិបាល​អះ​អាង​ថា មានតែ​វិធានការ ៣​ការពារ និង ៣​កុំ ដែល​អាច​ជួយ​ឲ្យ​យើង​ទាំង​អស់​គ្នា​ បាន​រួច​ផុត​ពី​ការ​ចម្លង​វីរុស​កូ​វីដ​–១៩​។ លោកស្រី​បន្ត​ថា ការ​ចាក់​វ៉ាក់សាំង​បង្ការ​ជំងឺ​កូ​វីដ​១៩ ជំហាន​បន្តបន្ទាប់​ទៀត​នឹង​ចាក់​ជូន​ពលរដ្ឋ​ទូទៅ​ ដោយ​ឈរ​លើ​គោលការណ៍​ស្ម័គ្រចិត្ត និង​ឥតគិតថ្លៃដើម្បី​សុខភាព​ផ្ទាល់ខ្លួន សុខភាព​ក្រុម​គ្រួសារ និង​សុខភាព​សហគមន៍​របស់​ខ្លួន​ផង​ដែរ​៕

 

ប្រភព ៖ btv.com.kh
លោកអ្នកអាចបញ្ចេញមតិនៅទីនេះ!

Feature Ads

Previous Post Next Post