![](https://blogger.googleusercontent.com/img/b/R29vZ2xl/AVvXsEhPe3uWDGN6L6lAW2dlQ7ZN2Vy-jAESKs2NNHFgwcFr5DkLsKmAPAwuCuN_fkzBKm1hqHz5QTSpeb_mqC-cNq5DuYGiYLG5m3hxgJlM4sPCiFjGn0kRkSgRkpLyaroOQTBNM9_2qUCaoBo/s0/Thumbnail.jpg)
កូនក្មេងអាយុ៣ឆ្នាំដុតផ្ទះខ្លួនឯងឆេះអស់ទៀតហើយ! ខ្ញុំនៅតែមិនអស់ចិត្ត ថាហេតុអ្វីបានជារឿងបែបនេះនៅតែអាចកើតឡើងម្តងហើយម្តងទៀតបានដោយរបៀបណា?
រឿងដ៏គួរឱ្យអកុសលបែបនេះធ្លាប់កើតមានឡើងម្តងរួចមកហើយនៅក្នុងភូមិត្រពាំងថ្មដដែលនេះ កាលពីពេលមិនដល់មួយឆ្នាំផង ហើយសាច់រឿងក៏ស្រដៀងគ្នានឹងករណីមុនដែរ គឺទុកក្មេងតូចៗចោលនៅផ្ទះមិនមានមនុស្សចាស់មើល បណ្តោយឱ្យលេងភ្លើងរហូតដល់ធ្វើឱ្យឆេះផ្ទះរបស់ខ្លួនដោយមិនអាចមានអ្នកណាមកជួយពន្លត់ទាន់។
សំណាងហើយដែលមិនមានគ្រោះថ្នាក់ដល់អាយុជីវិតកូនតូចទាំង២នាក់ ឪពុកម្តាយបានត្រឹមតែរត់មកដល់ផ្ទះវិញទាំងត្រហេបត្រហប ឈរអោបគ្នាយំមើលទ្រព្យសម្បត្តិដែលខ្លួនខិតខំសន្សំរកមកបានទាំងអម្បាលម៉ានឆេះត្របាក់លេបដោយអគ្គីភ័យអស់រលីងត្រឹមតែក្នុងមួយប៉ប្រិចភ្នែក។
នាំគ្នាខឹងកូន វ៉ៃកូន តែវ៉ៃទៅបានអ្វីមកវិញ? ហើយតើវាពិតជាកំហុសរបស់ក្មេងឬយ៉ាងណា?
ទំនួលខុសត្រូវជាឪពុកម្តាយមានទំហំធំធេងណាស់ បង្កើតជីវិតមកហើយចាំបាច់ត្រូវតែទទួលខុសត្រូវចំពោះជីវិតរបស់ពួកគេ ពាក្យថា”ដឹងក្តី“ទាមទារវ័យ និងអាយុសមស្របណាមួយទើបអាចដឹងសេចក្តី និងដឹងការណ៍ខុសត្រូវបាន ប៉ុន្តែវាប្រហែលជាអ្វីដែលប្តីប្រពន្ធវ័យទើបតែជាង២០ឆ្នាំទាំង២នាក់នេះមិនទាន់អាចស្វែងយល់បានដោយខ្លួនឯងនៅឡើយទេ។
ម្នាក់រៀនបានត្រឹមថ្នាក់ទី៥ ហើយម្នាក់ទៀតបានត្រឹមថ្នាក់ទី៨តែប៉ុណ្ណោះ ដោយសារតែជីវភាពខ្វះខាត ទាំងពីរនាក់ប្តីប្រពន្ធត្រូវចេញទៅធ្វើការនៅក្រៅផ្ទះ ដោយទុកកូនតូចៗចោលឱ្យនៅលេងនឹងផ្ទះ ចួនកាលក៏ផ្ញើរគេឱ្យជួយមើល ចួនកាលទៀតក៏មិនមានអ្នកមើលឱ្យ។
សម្រាប់ខ្ញុំ បើទោះជាមានពាក់ព័ន្ធនឹងភាពក្រីក្រដែរក៏ដោយ ខ្ញុំនៅតែដាក់បន្ទុកខ្លាំងទៅលើការខ្វះខាតចំណេះដឹងច្រើនជាង ហើយក៏ប្រហែលជាការដែលមិនទទួលបានការអប់រំគ្រប់គ្រាន់នេះហើយដែលធ្វើឱ្យជីវភាពពួកគាត់នៅតែជួបការលំបាក។
ភាពអវិជ្ជា និងភាពក្មេងវ័យខ្វះបទពិសោធបណ្តាលឱ្យមានភាពធ្វេសប្រហែស មើលមិនឃើញពីសារៈសំខាន់នៃការបំពេញតួនាទីជាឳពុកម្តាយរបស់គេឱ្យបានត្រឹមត្រូវ ហើយគិតថាកត្តាជីវភាពសំខាន់ជាងអ្វីៗទាំងអស់។
ការយល់ឃើញបែបនេះអាចនឹងធ្វើឱ្យកូនៗរបស់ខ្លួនបាត់បង់ឱកាសទទួលបាននូវការអប់រំដូចជំនាន់របស់ខ្លួនដែរ ដែលអាចនឹងក្លាយទៅជាអន្ទាក់ធ្វើឱ្យពួកគាត់ និងជំនាន់ក្រោយទៀតជាប់នៅក្នុងភាពក្រីក្រពិបាកនឹងរើខ្លួនចេញរួចបាន។
ខ្ញុំពិតជាសង្ឃឹមថា បងប្អូនប្រជាពលរដ្ឋដែលជាឳពុកម្តាយឬអាណាព្យាបាលបានរៀនសូត្រពីបទពិសោធដ៏អាក្រក់មួយនេះ រៀនប្រុងប្រយ័ត្នឱ្យបានខ្ពស់ជាងមុន ជាពិសេសឱ្យតម្លៃទៅលើការបំពេញកាតព្វកិច្ចនៃការអប់រំបីបាច់ថែរក្សាកូនឱ្យបានល្អប្រសើរជាងមុន។ ពីរនាក់ប្តីប្រពន្ធនេះនៅក្មេងៗនៅឡើយ អាចនៅមានឱកាសច្រើនដើម្បីចាប់ផ្តើមជីវភាពសារជាថ្មី និងកសាងនូវអ្វីដែលខ្លួនបាត់បង់បាន។
ក្នុងនាមប្រធានអនុសាខាកាកបាទក្រហមកម្ពុជាស្រុកបន្ទាយស្រី ខ្ញុំបានដឹកនាំក្រុមការងារនាំយកអំណោយមនុស្សធម៌មួយចំនួនទៅជូនដល់លំនៅឋានកើតហេតុភ្លាមៗកាលពីពេលថ្មីៗនេះ ដើម្បីបានជួយសម្រាលទុក្ខលំបាកខ្លះៗក្នុងពេលដ៏សំខាន់មួយនេះ យ៉ាងហោចណាស់ក៏មិនចាំបាច់ឱ្យពួកគាត់គេងហាលភ្លៀងហាលខ្យល់នៅចំកណ្តាលខែវស្សានេះដែរ។
ប៉ុន្តែអ្វីដែលគួរឱ្យត្រេកអរបំផុតនោះគឺ «អង្គការលំនៅឋានមនុស្សជាតិកម្ពុជា»បានឆ្លើយតបជាវិជ្ជមានភ្លាមៗទៅនឹងសំណូមពរជាពិសេសរបស់រដ្ឋបាលស្រុកបន្ទាយស្រីដើម្បីសាងសង់ផ្ទះថ្មីឡើងវិញជាបន្ទាន់ជូនដល់គ្រួសារដ៏ក្រីក្រមួយនេះផងដែរ។
ខាងលើនេះគឺជាសំណេរទាំងស្រុងរបស់លោក ឃឹម ហ្វីណង់ អភិបាលស្រុកបន្ទាយស្រី រៀបរាប់នៅព្រឹកថ្ងៃទី ១១ ខែកក្កដា នេះ។
![](https://blogger.googleusercontent.com/img/b/R29vZ2xl/AVvXsEi2kL_KF6NCX_7urG5Ab8LGTlxUCGJKfqOUzz0bv4u8DToEkVlgK1kHm1ZB5cs32Z16hxjEqiUHiOQJq1OtxvA17zcwsL0VCAjHOrYrfVwjwzAqS8MwZpY1ZCfUyhyphenhyphengBg9dJLN1WicXWNA/s0/9999+%25281%2529.png)
![](https://blogger.googleusercontent.com/img/b/R29vZ2xl/AVvXsEg5gCdCxfDbMjdXc6s5d2MEO1naR0iUALaMWDIZ48PUTlGD7wFRF5bUQo8iE3aS3MAuAHPnSXDLk1wBg2RKHwwnDdL_wnO-KJaQtrMfYBBuPUro5uT9PQXf0whcnW3HmBh3aYMwYrSWewM/s0/9999+%25282%2529.png)
![](https://blogger.googleusercontent.com/img/b/R29vZ2xl/AVvXsEijlzBYIuSjPr3OxEu9j6nKczvHg0jET-YAUjUuPePn_6l5O5s2O4CoODRAgyFuMoOqH3Gu1LaUkm8uKbkD6Q-SjaSx6dnEEFp2lZRISz-QhPgFGmov1ANY0sQLngK9sY4tSmjcmFoZ3IU/s0/9999+%25283%2529.png)
![](https://blogger.googleusercontent.com/img/b/R29vZ2xl/AVvXsEgG9exRKTo1zNrD__0M85dcqxj7aeaGGyoninod_Fd8FiQwmgSxlqZLBvPCgKnxx7QS0JnJM4a1OR4ne8hZi2XeBfw5HlUbXJZ4l2zE61Cwhk3Kz06KteVLXv1I-dZO3EK6xdM8iGO7zU4/s0/9999+%25284%2529.png)
![](https://blogger.googleusercontent.com/img/b/R29vZ2xl/AVvXsEhiXScEtkX-cREaf_cd5XRUWuFEabu0dH5_WsPWTy8_pIhSIk-m1t5UfZ6qX3sXgH67cONuD0aQMqXa3riVcji0UiHS-WaEYpTWfqRR-hxbGSY16qvdyeU5IBAheimpypnGd6WuoSFCnS0/s0/9999+%25285%2529.png)
![](https://blogger.googleusercontent.com/img/b/R29vZ2xl/AVvXsEi8j6ZsTX_1Bmyqa67WFt_LqhYRc98zV2W0srRBv8-rHG5Dz2_q67nW3gYyuuAADchQKD9GmbDuDdk2TKhl8ApwtI9B7-HSXleoVuUBIbkVbGCtltI5XOICSO5Iq2DFVZIX8yglkg3hp_g/s0/9999+%25286%2529.png)
![](https://blogger.googleusercontent.com/img/b/R29vZ2xl/AVvXsEgzkhhjR3lTvJOOpBKdgIUT4sTpmAQWt7QDnXoFrl6O6k8AIr5vfzKnAMBtqE_R8mfngMiUZQrybm5lQ5PX_BddS41-PGEvX11UlDEZJ1CIwOhUwJwXY7wfZPTO9zR48unZF-tFY2s64EM/s0/9999+%25287%2529.png)
![](https://blogger.googleusercontent.com/img/b/R29vZ2xl/AVvXsEhr6rfftvXNwW5yMELGS2gvZdJv8GnAxIEcUnSFxO4Qd7-6OJ3KSzD8TtlReeqwwZJPbzwMqqs-bR4MbrVxphiYYHnGuUN6dTy2nnGAU7LpOoUGvaL7wnCjb6IKJa1qSvAYnslIcriVcvo/s0/9999+%25288%2529.png)
![](https://blogger.googleusercontent.com/img/b/R29vZ2xl/AVvXsEh4kGdgaUjgUOQ4_AXzaKhgowUPdFS8f53DbaOxU5eJgcomSv723ziaqJkOO_fFtE8bPu1gpO0hUP8gAa1xPXVDvjMhnOtXDwfcjxyQb7LciiCfiglx8H64Vs96uMRdCp9ZRd0Wx23Jod8/s0/9999+%25289%2529.png)
![](https://blogger.googleusercontent.com/img/b/R29vZ2xl/AVvXsEjDJGmqU0haF_lompHkYX1F0gpW9BbZAfLl5gDhvyW5F2KXdh_dhD8qfWJw6xLU45LLgqz0iK-gwITp3onVrxMLYRmImfARco9Eh1rxPO0Wlqi3JMEAlW7KUxRwshflUqM0dbJFJokrWzs/s0/9999+%252810%2529.png)
![](https://blogger.googleusercontent.com/img/b/R29vZ2xl/AVvXsEgfofm_UySfx6R6FPbXcsgiLlhK7PSTIgp__p06Yj6gtDTEgm83chSLHEI5VTgxfdx9n7n52lHHy9d6JSOH7kB-8cPtsOu3sIz6bJXSIm5G29osVGkudQ8eyGSiJQWQ_1WEII4N6tP9u_M/s0/9999+%252811%2529.png)
![](https://blogger.googleusercontent.com/img/b/R29vZ2xl/AVvXsEg675_Rhxp30t6a9FtkoJKDKJvaQQdT7rSMaZ0P4_PJQtGqH1PPBj-T7K4VFwAOc4XH2dqcjXdZGru8iENrPbkIIOMb-mJZl7Oku7WOkk7aP8Z9SOHureza7kec0F92Fw3LlX8p0L7uTkM/s0/9999+%252812%2529.png)