សង្គម
ពិធីករដ៏ល្បីឈ្មោះមួយរូបគឺ លោក អេង ឬទ្ធី ដែលជាស្វាមីតារាជើងចាស់ អ្នកនាង ស៊ឹមសូលិកា កំពុងតែជោគជ័យលើមុខជំនួញហើយ ស្រាប់តែថ្មីៗនេះក៏កំពុងជោគជ័យលើការងារផងដែរ ក្រោយពីត្រូវបានលោកជំទាវ ហ៊ុន ម៉ាណា អគ្គនាយិកាវិទ្យុ និងទូរទស្សន៍បាយ័ន ប្រគល់តួនាទីដ៏ធំមួយ។
មានសិល្បករជាច្រើនបានចូលរួមផ្ញើសារត្រេកអរ ព្រមទាំងទទួលបាច់ផ្កាផងដែរ ក្រោយទទួលតំណែងជាប្រធានក្រុមពិធីករ-ពិធីការិនី ផ្នែកសិល្បៈរបស់ អគ្គនាយកដ្ឋានវិទ្យុ និងទូរទស្សន៍បាយ័ន នៃក្រុមហ៊ុនបាយ័នព័ត៌មាន។
ជាមួយគ្នានេះដែរ លោក អេង ឬទ្ធី បានសម្ដែងក្តីរំភើប ត្រេកអរ ដោយថ្លែងអំណរគុណថា «អរគុណសន្តិភាព អរគុណទេវតាដើរដី សូមគោរពអរគុណលោកជំទាវ ហ៊ុន ម៉ាណា អគ្គនាយិកានៃអគ្គនាយកដ្ឋានវិទ្យុ និងទូរទស្សន៍បាយ័ន ដែលជានិច្ចកាលតែងតែផ្តល់នូវក្តីមេត្តា ករុណាដល់រូបខ្ញុំបាទ ។ សូមទេវតាតាមថែរក្សាលោកជំទាវ និងស្វាមី បុត្រាបុត្រីព្រមទាំងក្រុមគ្រួសារ ជួបប្រទះតែព្រះពុទ្ធពរបួនប្រការ អាយុ វណ្ណ: សុខ: ពល: កុំបីឃ្លៀងឃ្លាតឡើយ»
