សង្គម
លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា នៅថ្ងៃទី ៣១ ខែមករានេះ បានចេញសេចក្ដីប្រកាសព័ត៌មានជម្រាបមកលោក លោកស្រី ប្រធានមន្ទីរអប់រំ យុវជន និងកីឡារាជធានី ខេត្ត ដោយក្រសួងអប់រំ យុវជន និងកីឡានឹងរៀបចំកម្មវិធីប្រឡង ប្រណាំង អានអត្ថបទ ស្មូតកំណាព្យ និងតែងនិពន្ធ ជ្រើស រើសជ័យលាភីថ្នាក់ជាតិចំណាត់ថ្នាក់លេខ១ ដល់លេខ៣ ទទួលពានរង្វាន់សម្តេចតេជោ ហ៊ុន សែន ដើម្បីអបអរសាទរទិវាជាតិអំណានលើកទី៧ នៅថ្ងៃទី ១១ ខែមីនា ឆ្នាំ២០២២ ក្រោមប្រធានបទ «អំណានជួយលើកកម្ពស់គុណភាពជីវិតក្នុងសង្គមឌីជីថល»។
អាស្រ័យដូចបានជម្រាបជូនខាងលើ សូមលោក លោកស្រី ប្រធានរៀបចំដំណើរការប្រឡង ប្រណាំងជ្រើសរើសជ័យលាភីលេខ១ ថ្នាក់ក្រោមជាតិទាំងបីវិញ្ញាសាដោយថតជាវីដេអូ និងស្នាដៃសំណៅដើម របស់ជ័យលាភីផ្នែកតែងនិពន្ធ រួចបញ្ជូនមកនាយកដ្ឋានអភិវឌ្ឍកម្មវិធីសិក្សាឱ្យបានមុនថ្ងៃទី ២២ ខែកុម្ភៈ ឆ្នាំ២០២២ ជាកំហិត ។
សម្រាប់វិញ្ញាសាប្រឡងប្រណាំង
-ការតែងនិពន្ធ (អត្ថបទពាក្យកាព្យ ឬពាក្យរាយ) សម្រាប់សិស្សមធ្យម សិក្សាទុតិយភូមិ។
-ការស្មូតកំណាព្យ សម្រាប់សិស្សមធ្យមសិក្សាបឋមភូមិ
-ការអានអត្ថបទ សម្រាប់សិស្សបឋមសិក្សា(សិស្សថ្នាក់ទី៤ ដល់ទី៦)។
សម្រាប់កាលបរិច្ឆេទប្រឡង ប្រណាំងយកជ័យលាភីថ្នាក់ជាតិ នៅថ្ងៃទី៩ ដល់ទី១០ ខែមីនា ឆ្នាំ២០២២
ទីកន្លែងប្រឡងប្រណាំងនៅអគាររដ្ឋបាលថ្មីក្រសួងអប់រំ យុវជននិងកីឡា
សូមទំនាក់ ទំនងលេខទូរសព្ទ និងតេឡេក្រាម ០១២ ៩២ ៨៦ ៩១៕
