សង្គម
រយៈពេលជាង៤ឆ្នាំមកនេះ ថាយូរក៏ពិតមែន ប៉ុន្តែសម្រាប់បេក្ខភាពក្នុងកម្មវិធីប្រឡងចម្រៀងលំដាប់ពិភពលោក The Voice Kids Cambodia រដូវកាលទី ១ គឺ ឡុង លីងគ័ង្គ ប្រហែលជាលោកអ្នកបានស្គាល់ហើយ ដែលជាតារាចម្រៀងវ័យក្មេង ពោរពេញទៅដោយសមត្ថភាព និងទេពកោសល្យសិល្បៈ។
ប៉ុន្មានឆ្នាំមកនេះ លីងគ័ង្គ បានប្រែប្លែកខ្លាំងដែលវ័យកាន់តែច្រើន រូបរាងកាន់តែធំ ហើយបើទោះបីជា មិនបានទទួលពានក្នុងកម្មវិធីក៏ពិតមែន ប៉ុន្តែទីផ្សារសិល្បៈក៏មិនសូវដាច់ ដែលទទួលបានប្រជាប្រិយភាពខ្លាំងផងដែរពីមហាជន។
អ្វីដែលគួរឲ្យកត់សម្គាល់មួយទៀតនោះគឺ លីងគ័ង្គ មិនមែនជាអ្នកនៅភ្នំពេញនេះទេ តែដើម្បីក្ដីស្រមៃ សុខចិត្តមកឃ្លាតឆ្លាយពីជីដូន ឪពុកម្ដាយ មកបន្តការរៀនសូត្រ និងការងារសិល្បៈនៅភ្នំពេញទាំងវ័យក្មេងបែបនេះ ហើយក៏មិនដែលបោះបង់ការសិក្សានោះដែរ។
លីងគ័ង្គ កាលពីពេលថ្មីៗនេះ បានរៀបរាប់ពីការតស៊ូរៀនសូត្រ និងជីវិតផ្ទាល់ខ្លួនយ៉ាងមានន័យថា៖ «ឃ្លាតពីជីដូន ឪពុកម្ដាយ នៅខេត្ត ដើម្បីបន្តការរៀនសូត្រនៅភ្នំពេញ។ ការរៀនសូត្រពិតជាពិបាក តែការពិបាកនេះមិនអាចឈ្នះសេចក្ដីខំប្រឹងរបស់ខ្ញុំបានទេ មករៀននៅភ្នំពេញជាការប្ដេជ្ញាចិត្តរបស់អូន ដូចនេះអូនមានតែពាក្យថាតស៊ូជានិច្ច»៕
