សង្គម
លោកឧកញ៉ា ឬទ្ធី សំណាង ប្រធានក្លិបក្លិបបាល់ទាត់ភ្នំពេញក្រោនដែលបានទទួលមរណភាពនាថ្ងៃទី១១ ខែឧសភា ឆ្នាំ២០២២នេះដោយរោគាពាធ។ ចំពោះការបាត់បង់នេះ ក្លិបបាល់ទាត់ បណ្តាម្ចាស់ក្លិប កីឡាករ អតីតកីឡាករ និងអ្នកស្រឡាញ់វិស័យបាល់ទាត់ជាច្រើន បានសំដែងការសោកស្តាយ និងសរសេររំលែកទុក្ខចំពោះក្រុមគ្រួសារលោក ឬទ្ធី សំណាង។
លោក ឬទ្ធី សំណាង ត្រូវបានចាត់ទុកជាបុគ្គលមួយរូបដែលបានប្រឹងប្រែងលើកស្ទួយវិស័យបាល់ទាត់នៅកម្ពុជា នារយៈពេលជាច្រើនឆ្នាំកន្លងមកនេះ ហើយជាពិសេសគឺការពង្រឹងធនធានមនុស្សនៅក្លិបភ្នំពេញក្រោនរបស់លោកតែម្ដង។
សហព័ន្ធកីឡាបាល់ទាត់កម្ពុជា (FFC) បានបញ្ជាក់ថា «ការប្រកួតល្ងាចនេះក្រុមជម្រើសជាតិកម្ពុជាបុរសយើងនឹងប្រើខ្សែដៃអាវខ្មៅ (armband) ដើម្បីជាការកាន់ទុក្ខដល់មរណៈភាពរបស់លោកឧកញ៉ា ឬទ្ធី សំណាង។» ដើម្បីបង្ហាញពីការដឹងគុណចំពោះលោក ឬទ្ធី សំណាង ។
FFC ក៏បានលើកឡើងថា៖ ការបាត់បង់លោកឧកញ៉ា ឬទ្ធី សំណាង គឺជាការបាត់បង់នូវឥស្សរជនមួយរូប ដែលតែងតែចូលរួមក្នុងសកម្មភាពនៃការអភិវឌ្ឍន៍វិស័យបាល់ទាត់កម្ពុជានាពេលកន្លងមកជាមួយនឹងស្នាដៃ និងការលះបង់ដ៏ធំធេង។ យើងខ្ញុំទាំងអស់គ្នា សូមបួងសួងដល់ដួងវិញ្ញាណក្ខន្ធ លោកឧកញ៉ា ឬទ្ធី សំណាង សូមបានបដិសន្ធិក្នុងសុគតិភពកុំបីឃ្លៀងឃ្លាតឡើយ។
