សិល្បៈ
ប្រកាសជាសាធារណៈថាឈប់ពីអាជីពសិល្បៈមិនប៉ុន្មានថ្ងៃផងពេលនេះ តារាចម្រៀង និងសម្តែង លោក បញ្ញា សិទ្ធ បែរជាប្រាប់ថាលោកត្រៀមតំណាងឱ្យប្រទេសកម្ពុជាទៅចូលរួមប្រកួតនៅក្នុងកម្មវិធី Miss & Mister Celebrity International 2022 នៅប្រទេសម៉ាឡេស៊ីនៅក្នុងពេលប៉ុន្មានខែខាងមុខនេះ ។
គេចាំបានថាកាលពីប៉ុន្មានថ្ងៃមុនលោក បញ្ញា សិទ្ធ បានបង្ហោះសារនៅលើគណនិយផ្ទាល់ខ្លួនថាលោកបញ្ចប់អាជីពសិល្បៈហើយ តែមិនបានបញ្ជាក់ពីមូលហេតុក្នុងការចាកចេញពីការងារសិល្បៈនោះឡើយប៉ុន្តែមិនប៉ុន្មានថ្ងៃផងមុននេះបន្តិចលោកបានបញ្ជាក់ថាលោកត្រៀមបណ្តើរកញ្ញា លីវ ជីលី អតីត Miss Grand Cambodia 2020 ទៅចូលរួមប្រកួតនៅប្រទសម៉ាឡេស៊ីនៅកំឡុងចុងខែធ្នូខាងមុខនេះ។
ជាមួយគ្នានេះដែរ លោក បញ្ញា សិទ្ធ បានបង្ហោះសារដែលមានអត្ថន័យថា«បើខ្ញុំបាទ បញ្ញា សិទ្ធ នឹង កញ្ញា លីវ ជីលី ទៅប្រលងកម្មវិធី Miss & Mister Celebrity International 2022 នៅប្រទេសម៉ាឡេស៊ី យ៉ាងម៉េចដែរ ?? ពួកយើងនឹងតំណាងឱ្យប្រទេសកម្ពុជាទៅប្រលងនៅប្រទេសម៉ាឡេស៊ីចំនួន 20 ប្រទេសរួមគ្នា 19-26 ខែ ឆ្នូ 2022 ខាងមុខនេះ »។
ចំពោះការប្រកាសរបស់តារាចម្រៀងលោក បញ្ញា សិទ្ធ ក៏ទទួលបានការលើកកម្លាំងចិត្ត និង សាទរពីសំណាក់មិត្តភក្តិក្នុងនិងក្រៅសិល្បៈជាច្រើនដោយម្នាក់សុទ្ធតែបានជូនពរឱ្យលោក និង កញ្ញា លីវ ជីលី ទទួលបានជោគជ័យនៅក្នុងកម្មវិធីប្រកួតមួយនេះ។ លោក បញ្ញា សិទ្ធ បានបង្ហាញការអរគុណចំពោះការលើកទឹកចិត្តនិងការស្រឡាញ់ចូលចិត្តរបស់មហាជនមកលើរូបលោក ។អ្វីដែលកត់សម្គាល់ពេលនេះលោក បញ្ញា សិទ្ធ បានឱ្យដឹងថាលោកកំពុងស្នាក់ នៅប្រទេសម៉ាឡេស៊ី ។
គិតមកដល់សព្វថ្ងៃលោក បញ្ញា សិទ្ធ បានប្រឡូកអាជីពសិល្បៈមិនតិចជាង ១០ឆ្នាំទេ តែបើ និយាយពីប្រជាប្រិយភាពរបស់លោកហាក់នៅមានកម្រិតនៅឡើយ។លោកក៏ត្រូវគេចាត់ចូលជាតារាដែលមានមុខមាត់និងរូបរាងស្រស់សង្ហាមិនធម្មតាដែរហើយជារឿយៗលោក៏មិនខ្លាចក្នុងការសម្ញែងរាងបង្ហាញសាច់ដុំបង្អួតភ្នែកអ្នកគាំទ្រឡើយ ៕
