សិល្បៈ
មានការភ្ញាក់ផ្អើលជាខ្លាំងដោយថ្មីៗនេះ អតីតបេក្ខភាព Top4 ក្នុងកម្មវិធីប្រឡងចម្រៀងលំដាប់ពិភពលោក Cambodian Idol រដូវកាលទីបួនត្រៀមបញ្ចេញសមត្ថភាពសម្តែងរឿង ប្រភេទ BL GL ក្នុងពេលឆាប់ៗខាងមុខនេះឱ្យស្ថានីយទូរទស្សន៍ហង្សមាស ។
ខណៈសន្ទុះនៃការគាំទ្រប្រុសស្អាតទាំងបួនដែលមានដូចជាកម្លោះតូច លីម តិចម៉េង ថុល ថុភិទិ នាង ដាវីន និងលោកគ្រូពេទ្យ ស៊ឹម ច័ន្ទពន្លឺ ពីសំណាក់ទស្សនិកជននៅតែខ្លាំងបើទោះការប្រឡងចម្រៀងបានបញ្ចប់មួយរយៈហើយក្តី ។
អ្វីដែលកត់សម្គាល់ថ្មីៗនេះមានការលើកឡើងពីសំណាក់ អ្នក ដឹកនាំរឿងនៅក្នុងផលិតកម្មហង្សមាសលោក កៅ សីហា បានឱ្យដឹងថាលោកបានត្រៀមរឿងចំនួនបីសម្រាប់ប្រុសស្អាតទាំងបួនដែលរឿងនេះជាប្រភេទរឿងBL GL ( LGBTQ )ដែលលោកបានដកស្រង់ចេញពីតថភាពពិតនៅក្នុងសង្គមនាពេលបច្ចុប្បន្នរួមនឹងការសម្រួលសាច់រឿង ពី MV ដែលលោកបានដឹកនាំសម្ដែងកាលពីជាង១០ឆ្នាំ តាមរយៈបទ «ហេតុអ្វីស្រឡាញ់គេ » «បារម្ភគេជាងសង្សារខ្លួនឯង» និងបទ «បងធម៌»។
ការលើកឡើងរបស់លោក កៅ សីហា ដែលជាអ្នកដឹកនាំរឿង«រាជនីភូមិគ្រឹះ»នោះបានធ្វើឱ្យអ្នកលេងបណ្តាញសង្គមជាអ្នកគាំទ្រតារាទើបនឹងរះទាំងបួនមានការរីករាយជាខ្លាំងហើយរំពឹងថាទស្សនីយភាពថ្មីរបស់ Top4 តាមរយៈរឿងប្រភេទ BL GL នឹងទទួលបានការគាំទ្រខ្លាំងព្រោះ កន្លងមកបេក្ខជនទាំងបួនត្រូវបានហ្វេន ហ្វេន យកទៅកាត់តក្នុងរូបភាពប្លែកៗមើលទៅគួរឱ្យអស់សំណើច ។ បើតាមគម្រោងរឿងទាំងនេះនឹងត្រូវចាក់បញ្ចាំងនៅក្នុងទូរទស្សន៍ហង្សមាសផងដែរ ៕
