សិល្បៈ
ពិធីស្វាគមន៍តារាចម្រៀង ខេមរៈ សិរីមន្ត ចូលផលិតកម្មរបស់អ្នកឧកញ៉ា ឡេង ណាវ៉ាត្រា បានប្រព្រឹត្តទៅយ៉ាងរលូនដោយមានការចូលរួមស្វាគមន៍ពីសំណាក់មជ្ឈដ្ឋានក្នុងនិងក្រៅសិល្បៈជាច្រើន ជាពិសេសតារាចម្រៀងនៅក្នុងទ្រនំហា្គឡាក់ស៊ីតែម្តង ។
ប៉ុន្តែអ្វីដែលធ្វើឱ្យ មហាជន និងអ្នកលេងបណ្តាញសង្គមមានការចាប់អារម្មណ៍នោះគឺកំពូលតារាចម្រៀង ព្រាប សុវត្ថិ ក៏បានចូលរួមទទួលសិស្សប្អូន ខេមរៈ សិរីមន្ត ប្រកបដោយកាយវិការកក់ក្តៅតែម្តង។
ពិតជាមិនធម្មតាពិធីស្វាគមន៍តារាចម្រៀង ខេមរៈ សិរីមន្ត បានរៀបចំធ្វើឡើងកាលពីថ្ងៃទី ១៣ម្សិលមិញនេះស្របពេលបទចម្រៀងដំបូងរបស់ឧកញ៉ារូបនេះក៏បានចេញជាផ្លូវការ ដែលមានចំណងជើងថា«ពេលខ្លះវាអេមដែរ»ដែលឃើញថាមានលក្ខណៈប្លែកជាពិសេសការ រៀបចំតែងខ្លួននិងម៉ូដសក់តែម្តង។
ស្របនឹងមានការលើកពីសំណាក់អ្នកគាំទ្រជាច្រើនថាការ បង្ហាញវត្តមានរបស់ ខេមរៈ សិរីមន្ត អាចនឹងក្លាយជាគូប្រជែងរបស់់ឧកញ៉ា ព្រាប សុវត្ថិ ពោលគឺភ្នំមួយមិនអាចមានខ្លាពីរឡើយ ។
នេះគ្រាន់តែជាពាក្យចចាមអារ៉ាមប៉ុណ្ណោះ បើក្រឡេកមើលតារាចម្រៀង ព្រាប សុវត្ថិ ឯណេះ វិញហាក់មិនបានខ្វល់ខ្វាយអ្វីឡើយដោយបានបង្ហាញទឹកមុខរីករាយនឹងចូលរួមនៅក្នុងពិធី ស្វាមគមន៍ឧកញ៉ា ខេមរៈ សិរីមន្ត យ៉ាងកក់ក្តៅដែលធ្វើឱ្យហ្វេន ហ្វេនលាន់មាត់ថា តារាចម្រៀង ព្រាប សុវត្ថិ នៅតែឈរក្នុងលំដាប់កំពូល ។
ណាមួយ ព្រាប សុវត្ថិ និង ខេមរៈ សិរីមន្ត មានទឹកដមសំឡេងផ្សេងគ្នាមិនអាចប្រៀបធៀបគ្នាបានឡើយ ។ អាចនិយាយថា វត្តមានរបស់អ្នកទាំងពីរនៅក្នុងគ្រួសារផលិតកម្មហា្គឡាក់ស៊ីនឹងកាន់តែខ្លាំងថែមមួយកម្រិតទៀត៕
