សិល្បៈ
លោក លុយ វណ្ណធី អតីតបេក្ខជន X Factor Cambodia ដ៏មានសមត្ថភាព ធ្លាប់មានភាពលេចធ្លោរផងដែរនៅពេលប្រឡងកម្មវិធីនេះកន្លងមក តែថ្មីៗនេះលោកបានចេញមកប្រកាសថា លោកនឹងទៅបម្រើការងារក្នុងផលិតកម្ម Galaxy Navatra ជាបុគ្គលិកតន្រ្តីករ ក្នុងគោលបំណងដើម្បីបំពេញតម្រូវទីផ្សារចម្រៀងឱ្យកាន់តែមានវិសាលភាពបន្ថែម។
អតីតបេក្ខជន X Factor រូបនេះបានលើកឡើងទាំងស្រុងថា ៖ «សូមអរគុណក្រុមហ៊ុន Galaxy Navatra ដែលបានជ្រើសរើសរូបខ្ញុំបាទជាបុគ្គលិកតន្រ្តីកររបស់ក្រុមហ៊ុន។ ចូលបាន២ខែហើយ ក្រុមហ៊ុនក៏កំពុងជ្រើសរើសបុគ្គលិកផ្នែកសិល្បៈបន្ថែមផងដែរ»។
នៅពេលថ្មីនេះៗ ខាងផលិតកម្មហ្គាឡាក់ស៊ីណាវ៉ាត្រា បានប្រកាសប្រាប់មហាជន ក៏ដូចជាអ្នកសិល្បៈថា ខាងផលិតកម្មបានបើកទ្វារចំហរយ៉ាងទូលាយទទួលស្វាគមន៍ចំពោះអ្នកមានសមត្ថភាព ជាច្រើននាក់ អាចមកចូលរួមចាប់ដៃគ្នាជាមួយផលិតកម្មផងដែរ។ តាមរយៈទំព័រហ្វេបុកផ្លូវការរបស់អ្នកឧកញ៉ា ឡេង ណាវ៉ាត្រា បានប្រកាសថា ៖
«ឱកាសការងារសម្រាប់បងប្អូន ដែលជាតារាចម្រៀងអាជីពស្រាប់ ខ្ញុំសូមជម្រាបជូនដំណឹងដល់បងប្អូនទាំងអស់ បន្ទាប់ពីផលិតកម្ម Galaxy Navatra ទទួលបានកំពូលតារាចម្រៀងឧកញ៉ា ព្រាប សុវត្ថិ ឧកញ៉ា ខេមរៈ សិរីមន្ត បងប្រុសខេម និងកញ្ញា តន់ ចន្ទសីម៉ា ត្រូវបានក្រុមហ៊ុន Sponsor ជាច្រើនជជែកសហការការប្រគំតន្ត្រី 25 ខេត្តក្រុង រាប់រយConcert។
ដូច្នេះក្រុមហ៊ុនត្រូវការជ្រើសរើសទាំងតារាចម្រៀង និងតារាRap ត្រូវមានលក្ខណៈសម្បត្តិគ្រប់គ្រាន់ តាមលក្ខន្តិកៈរបស់ក្រុមហ៊ុន អាចដាក់ពាក្យចូល និងមានការងារធ្វើច្រៀងតាម Concert តែម្ដង និងជ្រើសរើសបុគ្គលិកជាច្រើនផ្នែក ក្នុងការងារសិល្បៈ ដូចជានិពន្ធ បច្ចេកទេស គ្រប់គ្រងឆាក គ្រប់គ្រងកម្មវិធីផ្សេងៗ។ សូមទាក់ទងតាមលេខ Telegram 070677464»៕
