«មិនឱ្យលុយធីបទៅពួកវា»នៅតែជាផ្ទាំងស៊ីបដែលលោកស្រី ទ្រី ដាណា កំពុងទទួលរងការរិះគន់ពីសំណាក់មហាជន ។ថ្មីៗនេះទៀតសោតលោកស្រីក៏កាន់តែមួរម៉ៅក្រោយបានឃើញផលិតកម្មសាស្ត្រាហ្វ្រីមស៊ែរឡើងវិញនៅភាពយន្តជីវិតរបស់ខ្លួនដែលមានចំណងជើងថា«លុយធីប »។ ជាមួយគ្នានោះថៅកែពេជ្ររូបនេះបានបបួលអ្នកសរសេរ និងដឹកនាំរឿងមួយនេះមកស្បថថែមទៀតផង។
គួររំឮកថាក្រោយពីល្បីឡើងវិញរឿងលុយធីបពេលនេះផលិតកម្ម សាស្រ្តាហ្វ្រីម ដែលជាផលិតកម្មមួយដែលទទួលបានការគាំទ្រពីសំណាក់មហាជនតាមរយៈការផលិតរឿងខ្លីៗដែលមាននៅក្នុងសង្គមជាក់ស្តែងពិតៗនោះបានបង្ហោះរឿងដែលមានចំណងជើងថា«លុយធីប»សារឡើងវិញដោយភ្ជាប់ខេបសិនខ្លីថា«លុយធីបមានអំណាច»។បើទោះបីភាពយន្តជីវិតរឿង«លុយធីប»នេះជារឿងចាស់ក្តី តែអ្នកលេងបណ្តាញសង្គមជាច្រើនបានចូលរួមទៅបញ្ចេញមតិជាច្រើនដោយភ្ជាប់ទៅនឹងរឿងលុយធីបរបស់ថៅកែពេជ្រ ដែលទើបផ្ទុះឡើងក្តៅនេះ ។
អ្វីដែលកត់សម្គាល់បើទោះរឿងខ្លី«លុយធីប»របស់ផលិតកម្មសាស្ត្រាហ្វីមបានចេញផ្សាយតាំងពីអំឡុងខែឧសភាឆ្នាំ ២០២៣ ក្តី តែក្រោយពីផេករបស់ផលិតកម្មមួយនេះស៊ែររឿងនេះឡើងវិញស្របនឹងខ្លួនកំពុងទទួលរងការរិះគន់ជាមួយរឿងនេះបានធ្វើឱ្យលោកស្រី ទ្រី ដាណា ផ្ទុះកំហឹងនឹងបានបោះសម្តីថា «មួយទៀត សុំអ្នកសរសេរ និងដឹកនាំរឿង លុយធីប មកស្បថផង ព្រោះផលិតរឿង លើសពីការពិត សម្ដែងលើសពេក។
ឃើញរឿងផលិតយូរដែរហើយ តែឥឡូវគេយកមកបង្ហោះស្របពេលជាមួយខ្ញុំ ហើយកាន់តែធ្វើអោយគេយល់ច្រឡំ។ ហើយអ្នកដែលយករឿងនេះមកផុសឡើងវិញ ស្របពេលដែលកំពុងមានបញ្ហា មកទាំងអស់ផងចង់អោយស្បថថា រឿងនេះជារឿងពិតអត់ ធ្លាប់ឃើញនៅណា បានសរសេរ និងដឹកនាំសម្ដែងមកលើសចឹង។ បើគ្មានបញ្ហាអី មិនមែនសុខៗ គេមកស្ដីថា គំរោះគំរើយបែបនេះទេ។ មានហេតុ ទើបមានផល»៕