អ្នកគាំទ្រជាច្រើនបានបង្ហាញការចាប់អារម្មណ៍និងចែករំលែកជាបន្តបន្ទាប់ក្រោយឃើញគូស្នេហ៍តារាចម្រៀង ថុល សុភិទិ បានបង្ហោះសារយ៉ាងចាក់ដោតទំនងជាចង់ឌឺដល់ ម៉ាដាម ដា ដែលទើបទិញរថយន្តឱ្យគូស្នេហ៍ ប៊ឺរី តែមិនឱ្យប្រាក់ខ្លួនក្រោយរកស៊ីជាមួយគ្នាជាងមួយឆ្នាំ ។
គួរឱ្យដឹងថាកន្លងមកស្រីស្អាត ឡុង ម៉ានីន និងម៉ាដាម ដា គឺជាអ្នករាប់អានគ្នាយ៉ាងស្និទ្ធ ស្នាល ប៉ុន្តែចុងក្រោយនេះគេសង្កេតឃើញទំនាក់ទំនងអ្នកទាំងពីរហាក់មានបញ្ហាជាមួយគ្នា គ្រាន់តែអ្នកជំនួញអនឡាញល្បីៗទាំងនេះមិនបានហែកហួរគ្នាតាមបណ្តាញសង្គម។
អ្វីដែលកត់សម្គាល់ស្របពេលអ្នកជំនួញ ម៉ាដាម ដា បានទិញកាដូរថយន្តទំនើបម៉ាកហ្សីបពណ៌លឿងស្រស់កាដូដល់ លោក ប៊ឺរី ជាគូស្នេហ៍មិនបានប៉ុន្មានផងស្រាប់តែគេបានឃើញ ឡុង ម៉ានីន បានបង្ហោះសារយ៉ាងមុតស្រួចជាបន្តបន្ទាប់ថា «ទិញឡានអោយគេចឹងល្មមគិតគូរខ្ញុំខ្លះហើយរកស៊ីជាមួយជាងមួយឆ្នាំហើយអត់ទាន់បានមួយសេនទេ កុហកគ្រប់រឿង» «ជីវិតខ្ញុំតាំងពីក្ររហាមមកដល់សព្វថ្ងៃនេះមើលជាក់ស្តែងកាន់តែរីកចំរើនកាន់តែជួបរឿងល្អៗជាច្រើនដោយសារខ្ញុំ មិនចេះក្បត់អ្នកណាមុនមិនចេះសម្តែង មិនចេះកុហក មិនចេះលាបពណ៌គេ មិនចេះស៊ីញើសឈាមអ្នកណាទេ….ទេវតាមានភ្នែក»។
បន្ថែមពីនេះ ឡុង ម៉ានីន បាននិយាយថាខ្លួនមិនចង់បង្ហោះ តែឆាតហើយមិនដោះស្រាយហើយមិនតបទៀតក្រែងជាអ្នកមានហី ។ មិនតែប៉ុណ្ណោះនាងបាននិយាយថាមិនបាននិយាយចំឈ្មោះទេ តែអ្នកមិនខុសកុំយកដាក់ខ្លួន ។ អ្វីដែលកត់សម្គាល់ទោះ ឡុង ម៉ានីន មិនបាននិយាយចំៗទៅ ម៉ាដាម ដា ក្តី តែអ្នកលេងបណ្តាញសង្គមដែលជាហ្វេន ហ្វេន របស់នាងសុទ្ធតែលើកឡើងគ្រប់គ្នាថាបុគ្គលរូបនោះគ្មាននរណាក្រៅពីអ្នកជំនួញរូបស្រស់ ម៉ាដាម ដា ឡើយព្រោះអ្នកនាងទើបនឹងទិញរថយន្តតម្លៃរាប់ម៉ឺនដុល្លារផ្គាប់ចិត្តគូស្នេហ៍រូបសង្ហាលោក ប៊ឺរី ។ ប៉ុន្តែការពិតបែបណានោះគេមិនទាន់ឃើញ ម៉ាដាម ដា ចេញមុខឆ្លើយតបនោះឡើយ៕
