ខ្ញុំបាទឈ្មោះ ព្រិន សុវណ្ណដាវី ភេទប្រុស អាយុ ២៧ឆ្នាំ ជាគ្រូបង្រៀននៅវិទ្យាល័យគូលែន ស្រុកគូលែន ខេត្តព្រះវិហារ។
ខ្ញុំបាទបានស្គាល់ មិត្តភក្តិម្នាក់តាមហ្វេសប៊ុក នៅថ្ងៃទី ០៧ ខែវិច្ឆកា ឆ្នាំ២០១៦ ដែលមានគណនី ហ្វេសប៊ុកឈ្មោះ Ebenezer Smith ដែលអះអាងខ្លួនឯងថារស់នៅទីក្រុង Manchester Unit ចក្រភពអង់គ្លេស។ គាត់សុំស្គាល់ខ្ញុំ ហើយសុំខ្ញុំធ្វើជាកូនធម៌ គាត់សព្វថ្ងៃមេម៉ាយ ហើយជាវិស្វករ។
តាមរយៈការសរសេរសារទាក់ទងគ្នាជាភាសាអង់គ្លេស ខ្ញុំបានរៀបរាប់ពីស្ថានភាពនៅក្នុងប្រទេស កម្ពុជា ពីវិស័យអប់រំ និងពីរមណីដ្ឋានធម្មជាតិ ប្រាសាទបុរាណជាច្រើនដែលមាននៅក្នុងដែនដីសុវណ្ណភូមិ។គាត់មានការចាប់អារម្មពីប្រទេសកម្ពុជា ហើយចង់មកលេងខ្ញុំ និងគ្រួសារនៅទីនេះទៀតផង។ ប្រហែលជា ប្រាំថ្ងៃ បន្ទាប់ពីបានទំនាក់ទំនងគ្នាតាមរយៈសារឆ្លើយឆ្លង គាត់ក៏បានសុំអាស័យដ្ឋានរបស់ខ្ញុំ និងលេខទូរស័ព្ទ របស់ខ្ញុំ គាត់មានអំណោយពិសេសសម្រាប់ខ្ញុំ។ ស្អែកឡើង ក៏ឃើញសារគាត់ផ្ញើមក នូវសំបុត្រផ្ញើអីវ៉ាន់ និង កេសដាក់អីវ៉ាន់ ទំងន់៨គីឡូ ជារូបភាព ហើយព្រមទាំងសរសេរជាភាសាអង់គ្លេសថា៖
សួស្តី អ្នកជាទីស្រឡាញ់របស់ខ្ញុំ! តើអ្នកសុខសប្បាយទេ? ទាំងនេះជាកាដូ ដែលខ្ញុំផ្ញើជូនអ្នក កូនសម្លាញ់នៅក្នុងនោះមានដូចជា កុំព្យួទ័រ ទូរស័ព្ទiPhone និងគ្រឿងអលង្ការមួយចំនួន និងលុយ ១៥.០០០ ដុល្លា (Hello my love, how are you? This is a gift that i sent to you, my dear inside the luggage you have, laptops, iPhone, some jewelry, and $15,000 in cash.)
ខ្ញុំសង្ស័យថាជាការបោកប្រាស់ ខ្ញុំក៏តាមដានមើល មានហេតុផលជាច្រើនដែលបញ្ជាក់ថាការបោក ប្រាស់ដូចជា៖ រូបថតសំបុត្រផ្ញើអីវ៉ាន់ និង រូបទំនិញ ជារូបភាពកាត់ត ហើយមិត្តភក្តិក្នុងគណនីហ្វេសប៊ុករបស់ គាត់ គ្មានជនជាតិបរទេស មានតែជនជាតិខ្មែរ។ ខ្ញុំក៏សង្កេតតាមដាន ធ្វើជាជឿគេ ធ្វើជាមនុស្សល្ងង់ ហើយគាត់ថាប្រហែលជាថ្ងៃពុធ ឬព្រហស្បត្តិ៍ គឺអីវ៉ាន់ទៅដល់ហើយ មិនបាច់បារម្មទេ ក្រុមហ៊ុនគេនឹងទាក់ទង។
ព្រឹកមិញថ្ងៃទី ១៦ ខែវិច្ឆកា ឆ្នាំ២០១៦ មានលេខទូរស័ព្ទ ០១០៨៥២៤៣០ បានខលមកខ្ញុំ ដែលជា មនុស្សស្រីបាននិយាយថា ជំរាបសួរ តើបងឈ្មោះ ព្រិន សុវណ្ណដាវីមែនទេ បងនៅឯណា មានពុកធម៌ ឈ្មោះEbenezer Smith មកពីចក្រអង់គ្លេស បានផ្ញើទំនិញ ក៏ប៉ុន្តែមិនទាន់បានបង់.......(ខ្ញុំស្តាប់មិនសូវបាន) តម្រូវ អោយបង់លុយចំនួន ៤០០ដុល្លា ដោយផ្ញើចូលតាមទ្រូម៉ាន់នី ខ្ញុំក៏សួរថាតើទំនិញមានអ្វីខ្លះ គាត់ថាមិនដឹង ព្រោះមិនទាន់បានស្កែនផង លុះត្រាតែបង់លុយសិនទើបគេស្កែនអោយ ខ្ញុំតបវិញថាខ្ញុំមិនទាន់មានលុយទេ ចាំមើលល្ងាចខ្ញុំទៅសួរបងខ្ញុំសិន គាត់លក់សណ្តែកសៀង តើចាំល្ងាចខ្ញុំអាចបានទេ ព្រោះពេលនេះខ្ញុំមិន មានលុយផង ហើយក៏មិនសូវស្គាល់ភ្នំពេញផង ខ្ញុំត្រេកអរណាស់។ គាត់បន្តទៀតថា ទំនិញមិនចាំបាច់មក ទទួលនៅភ្នំពេញទេ គឺក្រុមហ៊ុនជាអ្នកចាត់ចែង។
ចុងក្រោយខ្ញុំសង្ឈឹមថា ប្រជាពលរដ្ឋ និងយុវជនទាំងអស់ សូមធ្វើការគិតពិចារណា រាល់សកម្មភាព ឆបោករបស់ជនខិលខូច ព្រោះនៅស្រុកខ្មែរយើងសំបូរណាស់ ហើយប្រជាជនជាច្រើនចាញ់បោកគេ ដោយបង់ខាតប្រាក់កាស ទាំងពេលវេលា។
ខ្ញុំសង្ឈឹមថាទូរទស្សន៍ ក៏ដូចជាសារពត៌មាននៅក្នុងស្រុកខ្មែរ ជួយផ្សព្វ ផ្សាយពីល្បិចបោកប្រាស់របស់ជនខិលខូច ដើម្បីអោយប្រជាពលរដ្ឋមានមូលដ្ឋានក្នុងការពិរចារណា ព្រោះថាវាពិតជាមានការជះឥទ្ធិពលយ៉ាងខ្លាំងដល់សង្គមខ្មែរយើង។ សូមអរគុណ (ពីខ្ញុំព្រិន សុវណ្ណដាវី លេខទូរស័ព្ទ 0967105968/0885819753)
