មានតំណាលរឿងពិតមួយ មានបុរសពីរនាក់ជាមិត្តថ្លើមមួយជាមួយគ្នា តែក្រោយមកម្នាក់ក្លាយជាមហាសេដ្ឋី និងម្នាក់ទៀតជាបុថុជ្ជនធម្មតា។ ថ្ងៃមួយបុរសដែលជាជនធម្មតាខ្វះខាតលុយបន្តិចបន្តួច ក៏នឹកភ្នកចង់ទៅខ្ចីសំឡាញ់ដែលជាមហាសេដ្ឋី។
ពេលបានជួបមិត្តដែលជាសេដ្ឋីហើយ ក៏បានសំណេះសំណាលពីនេះពីនោះ មុនហារមាត់ខ្ចីលុយបន្តិចបន្តួចពីមិត្ត ដែលជាសេដ្ឋី ហើយសេដ្ឋីនោះក៏មិនបានដឹងថា មិត្តខ្លួនមកដើម្បីខ្ចីលុយដែរ។ ជជែកចុះឡើងដល់វគ្គរកស៊ី សេដ្ឋីនោះក៏ត្អូញត្អែរប្រាប់សំឡាញ់ពីការលំបាករបស់ខ្លួន ដែលខ្វះទុនវិនិយោគរាប់ពាន់លានដុល្លារ ដើម្បីធ្វើគម្រោងនេះ គម្រោងនោះជាដើម ព្រមទាំងជាប់បំណុលធនាគាររាប់ពាន់លានដុល្លារទៀតផង។
មិត្តភ័ក្ដិដែលចង់ខ្ចីលុយនោះ ក្រោយពីស្តាប់ឭពីការលំបាករបស់មិត្តដែលជាសេដ្ឋីរួចមក ក៏បានលាមិត្តភ័ក្ដិដោយមិនបានខ្ចីលុយទេ ព្រោះខ្លួនគិតថា ខ្លួនខ្វះតែ ប៉ុន្មានពាន់ដុល្លារប៉ុណ្ណោះ ឯសំឡាញ់ជាសេដ្ឋីខ្វះរាប់ពាន់លានដុល្លារឯណោះ ហើយក៏មិនចង់ដាក់បន្ទុកបន្ថែមដល់មិត្តភ័ក្ដិខ្លួនដែរ៕ ប្រ. Somethearith Din
ផ្ដល់សិទ្ធិដោយ៖KQUBE
