ខេត្តពោធិ៍សាត់៖ មានផ្ទះតូចមួយដែលជុំវិញបិទបាំងទៅដោយជញ្ជាំងនិងដំបូលធ្វើពីស្លឹក ដើម្បីការពារព្យុះភ្លៀង ក្នុងសំលៀកបំពាក់ប្រឡាក់ប្រឡូសទៅដោយធូលី អាវសប្រែទៅជាអាវខ្មៅដោយសារជាប់ដី ជីវិតរស់នៅដូចជាបក្សីដែលរងចាំមេវាហើរទៅរកចំណីមកបញ្ចុក ខណៈពេលដែលកូនបក្សីទាំងនោះកំពុងត្រូវចំណីនិងភាពកក់ក្ដៅពីមេរបស់វា។ តួយ៉ាងក៏មិនខុសអ្វីពីកុមារទាំងបីនាក់នេះឡើយ ពូកគេកំពុងរង់ចាំចំណីនិងភាពកក់ក្ដៅពីសំណាក់ឪពុកម្ដាយរបស់គេ ស្របពេលដែលគ្មានដំណឹងជាយូរមកហើយ សព្វថ្ងៃកុមារអភ័ព្វទាំងបីកំពុងអត់ឃ្លានដោយសារដាច់បាយ។
មានទីលំនៅស្ថិតនៅភូមិទួលខ្មែរ ឃុំស្នាមព្រះ ស្រុកបាកាន ខេត្តពោធិ៍សាត់ យោងតាមអ្នកប្រើប្រាស់បណ្ដាញសង្គមហ្វេសប៊ុក បានចែករំលែកតៗគ្នាពីមួយទៅមួយបានឲ្យដឹងថា កុមារកម្សត់ទាំងបីនាក់បងប្អូន ត្រូវបានឪពុកម្ដាយទុកឲ្យនៅផ្ទះ ដោយពួកគាត់ត្រូវចំណាកស្រុកទៅធ្វើការនៅឯប្រទេសថៃ តែជាយូរមកហើយដែលឃើញ ម្ដាយឪពុករបស់ពួកគេផ្ញើលុយមកដើម្បីអោយពួកគេ អាចមានឱកាសទៅរៀនសូត្រ ឬទិញអង្ករច្រកឆ្នាំងនោះឡើយ។
សព្វថ្ងៃកុមារគួរឲ្យអាណិតទាំងបី កំពុងរស់ដូចជាជនទុគ្គតិ ពឹងពាក់ទាំងស្រុកទៅលើចិត្តសប្បុរស របស់អ្នកជិតខាង ដែលបានឱ្យអង្ករ១កំប៉ុង ឬ២កំប៉ុង គ្រាន់ដាំបាយហូបជាមួយបងប្អូន ក្រៅពីនេះពួកគេនាំគ្នាដើររើសករស្រូវ តែអ្វីដែលកាន់តែកម្សត់នោះពេលនេះឈឺគ្មានប្រាក់ដើម្បីទិញថ្នាំនោះទេ។
ដូចនេះសូមបងប្អូនមេត្តាចូលរួមជួយដោយក្តីអាណិតអាសូរ និងអនុគ្រោះផងទៅចុះ ក្នុងនាមខ្មែរជួយខ្មែរ និងជួយចែករំលែកព័ត៌មាននេះផង ដើម្បីឱ្យអ្នកសប្បុរសបានដឹងនឹងបានជួយពួកគាត់ទាន់ពេលគាត់ត្រូវការ៕
ផ្ដល់សិទ្ធិដោយ៖KQUBE
