សិល្បៈ ៖ កាលពីថ្ងៃទី១៩ ខែធ្នូ ឆ្នាំ២០១៦ម្សិលមិញនេះ អ្នកលេងបណ្ដាញសង្គមហ្វេសប៊ុកជាច្រើនចាប់អារម្មណ៍ព័ត៌មានគ្រឹះស្ថាន មីក្រូហិរញ្ញវត្ថុ ពិភពថ្មី ចេញសេចក្ដីប្រកាសឲ្យកញ្ញា ឯក សុជាតា ហៅ សាសា ចូលខ្លួនដោះស្រាយករណីរំលោះរថយន្ត ដោយបានសង្កត់ធ្ងន់ថា សាសា មិនបានបំពេញកាតព្វកិច្ចជាកូនបំណុល ទើបតែនៅពេលនេះ សាសា បានចេញមុខបញ្ជាក់តាមរយៈលោក តាន់ ចន្ថា អ្នកយកព័ត៌មាន Kqube.net តបទៅឃ្លាំងលក់ឡានបង់រំលោះ ពិភពថ្មី វិញ។
សាសា ប្រាប់ថា នាងពិតជាបានទិញរថយន្តម៉ាក Porsche ពណ៌ ស សេរីឆ្នាំ២០១២ ពាក់ស្លាកលេខ ភ្នំពេញ 2AD-7888 ពីគ្រឹះស្ថានមីក្រូហិរញ្ញវត្ថុ ពិភពថ្មី ពិតមែន តែបញ្ហាខាង ពិភពថ្មី ចេញសារឲ្យនាងចូលទៅដោះស្រាយនោះ គឺដោយសារបញ្ហាបុគ្គលិកថ្មីរបស់ ពិភពថ្មី មិនបានដឹងពីឯកសារចាស់ ទើបផ្សាយព័ត៌មាននេះចេញ ដូច្នេះហើយទើប សារនេះត្រូវបានលុបចេញភ្លាមៗវិញ ពេលនាងបានឆ្លើយតប។
សាសា បន្តថា Kqube.net រថយន្តម៉ាក Porsche នេះ នាងបានទិញនៅឆ្នាំ២០១៣ ហើយនាងក៏ទទួលស្គាល់ថា ពេលកន្លងមកពិតជាមានបញ្ហាក្នុងការបង់រំលោះខ្លះៗពិតមែន ប៉ុន្តែខាងពិភពថ្មីគេក៏យោគយល់ដែរ ដូច្នេះហើយបើសិនរឿងខាងលើជារឿងពិតគេមិនលុបសារចេញភ្លាមៗវិញទេ ហើយរឿងនេះខាងពិភពថ្មីក៏បានឲ្យជំនួយការទាក់ទងមកនាង ហើយគាត់ក៏សុំទោសផងដែរ ដែលធ្វើឲ្យកើតមានរឿងនេះកើតឡើង។
សាសា បន្តថា រឿងនេះនាងក៏ចង់ទៅជួបខាងពិភពថ្មីដែរ ពោលគឺបើនាងនិយាយតែមាត់ក៏មិនសូវមានន័យដែរ គឺនាងចង់រកលិខិតបញ្ជាក់ពីក្រុមហ៊ុនថា ជារឿងយល់ច្រឡំផងដែរ ។ អតីតពិធីការិនីស្ថានទូរទស្សន៍ CTN រូបនេះបន្តថា ពេលនេះនាងកំពុងនៅតាមខេត្ត ប្រហែលជាថ្ងៃស្អែកទើបនាងបានឡើងមកភ្នំពេញវិញ ហ្នឹងបានទៅជួបខាងពិភពថ្មី ដើម្បីបញ្ជាក់រឿងនេះឲ្យបានច្បាស់៕
ផ្តល់សិទ្ធិដោយ៖KQUBE
