√ ម៉ុង ឫទ្ធី មានមោទនភាពកើតក្នុងត្រកូលអ្នកក្រម្នាក់តែអាចជួយប្រជាជនក្រីក្របានរាប់រយគ្រួសារ

រាជធានីភ្នំពេញ៖ លោកឧកញ៉ា ម៉ុង ឫទ្ធី ដែលគ្រប់គ្នាស្គាល់ថា ជាឧកញ៉ាដែលមានចិត្តសប្បុរស តែងតែជួយឈឺឆ្អាលជាមួយសុខទុក្ខរបស់ពលរដ្ឋក្រីក្រ ហើយត្រូវបានប្រជាពលរដ្ឋគោរពនិងស្រលាញ់ នៅល្ងាចថ្ងៃទី០៧ ខែធ្នូ ឆ្នាំ២០១៦នេះ លោកឧកញ៉ា បានបង្ហោះសារមួយក្នុងបណ្ដាញសង្គមហ្វេសប៊ុក ដោយសរសេរថា "ខ្ញុំមានមោទនភាពក្នុងខ្លួនខ្លាំងណាស់ ដែលកើតមកពីត្រកូលកសិករក្រីក្រម្នាក់ ហើយអាចជួយដល់ប្រជាជនក្រីក្របានរាប់រយគ្រួសារបានយ៉ាងនេះ"។

"ចាប់ពីម៉ោង៣រហូតដល់ថ្ងៃគងភ្នំថ្ងៃទី០៧ ខែធ្នូ ឆ្នាំ២០១៦ ក្រោយពីបានដើរមើលតាមខ្នងផ្ទះរួចហើយ ធ្វើអោយខ្ញុំមានមោទនភាពក្នុងខ្លួនខ្លាំងណាស់ ដែលកើតមកពីត្រកូលកសិករក្រីក្រម្នាក់ហើយអាចជួយដល់ប្រជាជនក្រីក្របានរាប់រយគ្រួសារបានយ៉ាងនេះ នៅដើមខែមករា ឆ្នាំ២០១៧ ខាងមុខនេះខ្ញុំនឹងត្រូវសាងសង់ផ្ទះថ្មបន្ថែមទៀតចំនួន៤០បន្ទប់ សម្រាប់ចែកជូនអោយដល់ប្រជាជន ដែលមានទំហំដូចគ្នា"។

ក្នុងសារនោះលោកបានបន្ថែមថា "អស់រយៈពេលជិតពីរឆ្នាំបានកន្លងផុតទៅហើយ ដែលខ្ញុំបានសាងសង់ផ្ទះថ្មថ្មីចំនួន១០៦ល្វែង ដែលមានទំហំ5m x 12mមានបន្ទប់ទឹក ផ្ទះបាយ បង្គន់អនាម័យទឹកភ្លើងចែកជូនទាំង១០៦គ្រួសារ ក្នុងរយៈពេលនេះប្រជាជនទាំងអស់គ្នាមិនដែលមានគ្រោះថ្នាក់ចរាចរណ៍ទេ ហើយក៏មិនដែលមានផឹកគ្រឿងស្រវឹងបង្កជម្លោះក្នុងគ្រួសារ ឬអ្នកជិតខាង បណ្ដឹងក្ដីក្ដាំដីកាកោះក៏ទេដែរ។ល។"

លោកបន្តថា"បើទោះបីជានៅមានជីវភាពមិនទាន់ធូរធារនឹងគេពិតមែន តែគ្រប់ៗផ្ទះសុទ្ធតែមានម៉ូតូពីមួយរហូតដល់បួនគ្រឿងក៏មានដែរ ក្នុងនោះផងដែរទូរស័ព្ទដៃក៏មានគ្រប់ៗផ្ទះផងដែរ មានដំណាំបន្លែបង្ការជាពិសេសទៀតនោះគឺមានស្វាយគ្រប់ៗផ្ទះដោយសារតែខ្ញុំដាំអោយ"៕