ខេត្តតាកែវ៖ ផ្លូវក្រាលកៅស៊ូមួយខ្សែមានប្រវែង៤គីឡូមែត្រ គិតចាប់ពីក្បាលថ្នល់បំបែក ភូមិបន្ទាយ ឃុំជីខ្មា រហូតដល់ ភូមិកន្ទួត ឃុំត្រឡាច ស្ថិតនៅក្នុងស្រុកទ្រាំង ខេត្តតាកែវ បានរងការខូចខាតស្ទើតែទាំងស្រុង មិនមានឃើញអាជ្ញាធរ ឬក៏មន្ត្រីពាក់ព័ន្ធណាចុះមកពិនិត្យឡើយ។
បើតាមសម្តីរបស់ប្រជាពលរដ្ឋ ដែលរស់នៅអមសងខាងផ្លូវ ក៍ដូចជាប្រជាពលរដ្ឋដែលធ្វើដំណើរឆ្លងកាត់តាមផ្លូវនេះ ពួកគាត់បានរអ៊ូ រទាំ ប្រាប់អ្នកយកព័ត៌មានយើងថា។ពួកគាត់ធ្វើដំណើរទៅមកម្តងៗមានការលំបាកយ៉ាងខ្លាំង បើជិះម៉ូតូម្នាក់ឯងវិញស្ទើតែពុំចង់រួច តែបើដឹកទំនិញវិញមានផលលំបាកខ្លាំងណាស់(សូម្បីតែរថយន្តក៍ជាប់ផុងទៅមុខមិនរួចផង)។ប្រភពព័ត៍មានបានបន្តទៀតថា ជួនពេលខ្លះកូនៗនឹងក្មួយរបស់គាត់បានទៅសាលារៀន គឺឆ្លងកាត់ផ្លូវនេះនឹងរងការប៉ះពាល់ដូចជារអិលដួលធ្វើឲ្យប្រឡាក់សំលៀកបំពាក់កូនរបស់គាត់ដែលជាសិស្សសាលា(ពេលនោះធ្វើអោយអារម្មណ៍កូនរបស់គាត់មិនសូវល្អផងដែរ)។
ចំណែកប្រជាពលរដ្ឋដែលជាអាជីវក លក់ដូរ រស់នៅអមសងខាងផ្លូវកំពុងរងការខូចខាតនេះ ជារៀងរាល់ថ្ងៃពួកគាត់មិនសូវសប្បាយចិត្តទេ ព្រោះនៅខាងមុខផ្ទះរបស់ពួកគាត់ មានទឹកដក់(មានភក់ជ្រាំ)ធ្វើឲ្យភ្ញៀវនាក់ទិញទំនិញមានការថយចុះ នឹងខាតបង់ប្រាក់ចំណូលជារៀងរាល់ថ្ងៃ។ បន្ទាប់មកប្រជាពលរដ្ឋដែលរស់នៅអមសងខាងផ្លូវដែលរងការខូចខាតនេះ ព្រមទាំងប្រជាពលរដ្ឋដែលជាអ្នកធ្វើដំណើរ បានសំណូមពរដល់អាជ្ញាធរ នឹងមន្ត្រីពាក់ព័ន្ធខាងលើមេត្តាចុះទៅពិនិត្យមើលផង។ ពីព្រោះពីផ្លូវក្រាលកៅស៊ូ បានប្រែពណ៍ទៅជាផ្លូវក្រាលគ្រួសក្រហមទៅហើយ។
ក្នុងករណីនេះដែរអ្នកយកព័ត៌មានយើងបានសុំកាបំភ្លឺពីលោកកេត ម៉ៅ អភិបាលស្រុកទ្រាំង លោកបានទទួលស្គាល់ថាផ្លូវនេះពិតជារងកាខូចខាតមែន ក៍ប៉ុន្តែមិនមែនជាផ្លូវរបស់ស្រុកជាអ្នកធ្វើទេ គឺជាផ្លូវខាងមន្ទីរសាធារណះការខេត្តជាអ្នកធ្វើនឹងជួសជុល។
រីឯលោកណុប នី ប្រធានមន្ទីរសាធារណៈការនឹងដឹកជញ្ជូនខេត្ត បានប្រាប់អ្នកយកព័ត៌យើងថាផ្លូវនេះមិនមែនខាងលោកជានាក់ធ្វើទេ គឺខាងមន្ទីរអភិវឌ្ឍជនបទជានាក់ធ្វើព្រោះវានៅក្នុងគំរោងរបស់គេ។
ចំណែកឯលោកប្រធានមន្ទីរអភិវឌ្ឍជនបទ បានប្រាប់អ្នកយកព័ត៌មានVD7NEWS យើងថា ផ្លូវនឹងខាងមន្ទីរបានធ្វើការជួសជុល២ដងរួចមកហើយក្នុងគំរោងឆ្នាំ២០១៦ ដោយសារតែផ្លូវនោះមិនអាចទ្រនឹងទម្ងន់ឡានដឹកទំនិញធំៗបានទើបបណ្តាលអោយខូចឡើងវិញ។ហើយលោកប្រធានមន្ទីរបានបន្តទៀតថាខាងមន្ទីរ កំពុងតែពិភាក្សា ជាមួយខេត្ត នឹងមន្ទីរសាធារណ:ការខេត្តថានឹងត្រូវធ្វើការជួសជុលឡើងវិញនៅពេលណា ពុំទាន់ដឹងនោះទេ។ បើតាមព័ត៌មានចុងក្រោយរបស់ប្រជាពលរដ្ឋថាផ្លូវនេះធ្វើឡើងមិនទាន់បានមួយឆ្នាំពេញផងបានវិលទៅស្រុកដើមវិញ ពិតជាពូកែធ្វើមែន !! ៕ ដោយ៖ រំដួល
ទស្សនាវីដេអូ
ផ្ដល់សិទ្ធិដោយ៖VD7News.com
